Azərbaycan Respublikasının Prezidenti İlham Əliyevin müvafiq Sərəncamına əsasən, kənd təsərrüfatının inkişafındakı xidmətlərinə görə Prime Cotton-un regional rəhbəri Bahəddin Dəyyan oğlu Leysanov 3-cü dərəcəli “Əmək” ordeni ilə təltif olunub.

Pambıqçılıq sahəsində uzunillik fəaliyyəti və zəngin idarəetmə təcrübəsi ilə seçilən Bahəddin Leysanov ölkəmizdə pambıqçılığın inkişafına, istehsal və emal proseslərinin təkmilləşdirilməsinə, eləcə də aqrar sektorun regional potensialının gücləndirilməsinə mühüm töhfələr verib.

Əmək fəaliyyətinin əhəmiyyətli hissəsini pambıqçılıq sənayesinə həsr edən Bahəddin Leysanov müxtəlif dövrlərdə pambıq emalı müəssisələrində rəhbər vəzifələrdə çalışıb. Onun peşəkar fəaliyyəti Neftçala rayonunda pambıqçılığın inkişafı, istehsal infrastrukturunun formalaşdırılması və sahənin davamlı fəaliyyətinin təmin edilməsi ilə sıx bağlıdır.

Hazırda Prime Cotton-da regional rəhbər vəzifəsində fəaliyyət göstərən Bahəddin Leysanov tabeliyində olan regionlarda pambıq istehsalının təşkili, fermerlərlə əməkdaşlığın inkişaf etdirilməsi, aqrotexniki proseslərin koordinasiyası və istehsal göstəricilərinin yüksəldilməsi istiqamətində fəaliyyətini davam etdirir.

Azərbaycanın pambıqçılıq sektorunun aparıcı şirkətlərindən biri olan Prime Cotton ölkədə pambıq istehsalından emalına qədər geniş fəaliyyət zəncirini əhatə edir. Şirkət müasir aqrotexniki yanaşmaların tətbiqi, fermerlərlə uzunmüddətli tərəfdaşlıq münasibətlərinin qurulması, məhsuldarlığın artırılması və yerli pambıq məhsullarının beynəlxalq bazarlarda mövqeyinin gücləndirilməsi istiqamətində fəaliyyət göstərir.

Prime Cotton-un regional idarəetmə strukturu şirkətin istehsal strategiyasının yerlərdə həyata keçirilməsində, fermer təsərrüfatları ilə səmərəli əməkdaşlığın təmin olunmasında və pambıqçılığın dayanıqlı inkişafında mühüm rol oynayır. Bu baxımdan, Bahəddin Leysanov kimi təcrübəli rəhbərlərin fəaliyyəti şirkətin strateji hədəflərinə nail olunmasına və regionlarda aqrar sektorun inkişafına töhfə verir.

Bahəddin Leysanovun uzunillik fəaliyyəti daha əvvəl də dövlət səviyyəsində qiymətləndirilib. O, 2024-cü ildə “Heydər Əliyevin 100 illiyi (1923–2023)” yubiley medalı ilə təltif olunan şəxslər sırasında yer alıb.

Bahəddin Leysanovun 3-cü dərəcəli “Əmək” ordeni ilə təltif olunması onun kənd təsərrüfatı sahəsindəki çoxillik əməyinə və peşəkar xidmətlərinə verilən yüksək dövlət qiymətidir. Bu təltif eyni zamanda Prime Cotton üçün qürurverici hadisədir.

Prime Cotton rəhbərliyi və kollektivi Bahəddin Leysanovu yüksək dövlət təltifi münasibətilə təbrik edir, ona möhkəm cansağlığı və gələcək fəaliyyətində yeni nailiyyətlər arzulayır.