Azərbaycan Mərkəzi Bankının 2024–2026-cı illəri əhatə edən Maliyyə Sektorunun İnkişafı Strategiyasında nəzərdə tutulan hədəf və təşəbbüslərin təxminən 85 faizi indiyədək icra olunub.

Marja.az xəbər verir ki, bunu Azərbaycan Mərkəzi Bankının sədri Taleh Kazımov jurnalistlərə açıqlamasında bildirib.

Onun sözlərinə görə, mövcud strategiyanın icrası üzrə müəyyən nəticələr əldə edilsə də, qarşıya qoyulan bütün məqsədlərə hələ nail olunmayıb.

“Strategiya üzrə müəyyən etdiyimiz hədəflərin və təşəbbüslərin, bildiyim qədər, 85 faizini indiyədək icra etmişik. Düşünürəm ki, bu, yaxşı göstəricidir. Amma istəyərdim ki, daha yüksək olsun”, – deyə Mərkəzi Bankın sədri qeyd edib.

Kazımov mövcud strategiyanın icra nəticələrindən tam razı olmadığını da bildirib. O vurğulayıb ki, 2024–2026-cı illəri əhatə edən strategiyanın yekun nəticələri barədə 2027-ci ilin birinci rübündə ictimaiyyətə hesabat təqdim olunacaq.

Həmin hesabatda strategiya üzrə əldə edilən uğurlar, qarşıya çıxan çətinliklər və icrası başa çatdırılmayan təşəbbüslər barədə ətraflı məlumat veriləcək.

2027–2030-CU İLLƏR ÜZRƏ YENİ STRATEGİYA HAZIRLANIR

Taleh Kazımov bildirib ki, Mərkəzi Bank artıq maliyyə sektorunun növbəti inkişaf strategiyasının hazırlanmasını yekunlaşdırmaq üzrədir. Yeni strategiya 2027–2030-cu illəri əhatə edəcək.

“2027–2030-cu illər üzrə Maliyyə Sektorunun İnkişafı Strategiyasının hazırlanması prosesi, demək olar ki, başa çatır. Əvvəlki strategiya kimi, bunu da ictimaiyyətə təqdim edəcəyik”, – deyə sədr bildirib.

Onun sözlərinə görə, yeni strategiyanın əsas istiqamətləri də 2027-ci ilin birinci rübündə açıqlanacaq. Mərkəzi Bank qarşıdakı strategiyanın icrası barədə də hər il hesabat verməyi planlaşdırır.

Kazımov qeyd edib ki, son üç-dörd ildə Mərkəzi Bankın ictimaiyyətlə kommunikasiya yanaşması əhəmiyyətli dərəcədə dəyişib və bu istiqamətdə şəffaflığın artırılması strategiyanın əsas prinsiplərindən biridir.

“Biz həm uğurlarımızı, həm də uğursuzluqlarımızı sizinlə paylaşacağıq”, – deyə Mərkəzi Bankın sədri vurğulayıb.