Azərbaycanın informasiya texnologiyaları sahəsində fəaliyyət göstərən “Rabalon” şirkəti beynəlxalq texnologiya istehsalçısı “ManageEngine” ilə əməkdaşlığının coğrafiyasını genişləndirərək Mərkəzi Asiyanın dörd ölkəsində yeni bazarlara çıxır.

Marja.az xəbər verir ki, bu barədə “Rabalon” şirkətinin yaydığı məlumatda bildirilir.

Məlumata əsasən, şirkət bundan sonra “ManageEngine” məhsullarını Qazaxıstan, Özbəkistan, Qırğızıstan və Türkmənistan bazarlarında da rəsmi şəkildə təqdim edəcək.

Genişlənmə çərçivəsində həmin ölkələrdə fəaliyyət göstərən müəssisələrə informasiya texnologiyaları infrastrukturunun idarə olunması, biznes proseslərinin avtomatlaşdırılması və kibertəhlükəsizlik sahələrində müasir texnoloji həllər təklif ediləcək.

“Rabalon” şirkəti bildirib ki, mövcud tərəfdaşlığın yeni bazarları əhatə etməsi onun regional inkişaf strategiyasında mühüm mərhələdir.

Şirkətin əsas məqsədi Mərkəzi Asiya ölkələrində fəaliyyət göstərən bizneslərin texnoloji imkanlarını genişləndirmək, İT infrastrukturunun idarə edilməsinin səmərəliliyini artırmaq və rəqəmsal təhlükəsizlik sahəsində qabaqcıl həlləri daha əlçatan etməkdir.

Qeyd edək ki, “Rabalon” və “ManageEngine” arasında əməkdaşlıq uzun müddətdir davam edir. Tərəflər 2023 və 2024-cü illərdə Azərbaycanda İT idarəetməsi və kibertəhlükəsizlik sahələrinə həsr olunmuş beynəlxalq tədbirlər təşkil ediblər.

“ManageEngine” beynəlxalq “Zoho Corporation” şirkətinin tərkibində fəaliyyət göstərən, korporativ İT idarəetməsi, şəbəkə monitorinqi, informasiya təhlükəsizliyi və biznes proseslərinin avtomatlaşdırılması üçün proqram təminatı təqdim edən texnologiya şirkətidir.

“Rabalon” isə İT konsaltinq, sistem inteqrasiyası, infrastrukturun idarə olunması və kibertəhlükəsizlik sahələrində xidmətlər göstərir. Şirkətin rəsmi internet saytındakı məlumatlara əsasən, Azərbaycanla yanaşı, ABŞ, Qazaxıstan və Özbəkistanda da ofisləri mövcuddur.