Vəzifəli şəxsin gəlirləri üzrə məhdudiyyətlər müəyyənləşir.

Bu, Milli Məclisin Hüquq siyasəti və dövlət quruculuğu və Müdafiə, təhlükəsizlik və korrupsiya ilə mübarizə komitələrinin birgə iclasında müzakirəyə çıxarılan “Maraqlar toqquşması haqqında” qanun layihəsində əksini tapıb.

Layihəyə əsasən, vəzifəli şəxs vergidən azad və ya güzəştli vergi rejimli, habelə "Kraudfanding haqqında" qanunda göstərilən ərazilərdə və ya dövlətlərdə yerləşən, yaxud qeydiyyata alınmış emitentin qiymətli kağızlarından gəlir götürə bilməz.

Vəzifəli şəxs elmi, pedaqoji və yaradıcılıq fəaliyyəti istisna olmaqla, bilavasitə, başqa və ya uydurma şəxslər vasitəsilə sahibkarlıq, kommersiya, başqa ödənişli fəaliyyətlə məşğul ola bilməz. Vəzifəli şəxs sahibkarlıq, kommersiya və başqa ödənişli fəaliyyət göstərmədən və xidməti vəzifələrinin icrası ilə əlaqədar olmadan əmanətlərdən (depozitlərdən), qiymətli kağızlardan, rentadan, royaltidən və ya icarədən Azərbaycan Respublikasının qanunvericiliyinə uyğun olaraq gəlir götürə bilər. Vəzifəli şəxs xidməti vəzifələrinin icrası ilə əlaqədar əldə etdiyi ictimaiyyətə açıqlanmayan (insayder) məlumatlardan istifadə edərək birbaşa və ya dolayı yolla qiymətli kağızları ala, sata və ya digər şəkildə ticarətini həyata keçirə, maddi və sair nemət, üstünlük və güzəştin əldə edilməsi ilə nəticələnəcək fəaliyyət göstərə bilməz. Hüquqi şəxslərin idarəetmə orqanlarında (o cümlədən icra orqanında, direktorlar (müşahidə) şurasında) və ya təftiş komissiyasında (audit komitəsində) dövləti və ya bələdiyyəni təmsil etdiyi hallar istisna olmaqla, vəzifəli şəxs sahibkarlıq subyektinin idarəetmə orqanlarının (o cümlədən icra orqanının, direktorlar (müşahidə) şurasının), təftiş komissiyasının (audit komitəsinin) tərkibinə daxil ola, onları təmsil edə bilməz.

“Maraqlar toqquşması haqqında” qanun layihəsi hazırlanıb

Qanun layihəsi Milli Məclisin Hüquq siyasəti və dövlət quruculuğu və Müdafiə, təhlükəsizlik və korrupsiya ilə mübarizə komitələrinin birgə iclasında müzakirəyə çıxarılıb.

Qanun layihəsi 5 fəsil, 27 maddədən ibarətdir, vəzifəli şəxslərin fəaliyyətində səmərəliliyin və şəffaflığın yüksəldilməsi, onların dövlət və ictimai maraqlara cavab verən fəaliyyətinin təmin edilməsi və cəmiyyətdə onlara etimadın artırılması üçün vəzifəli şəxslərin fəaliyyətində maraqlar toqquşmasının qarşısının alınması və nəticələrinin aradan qaldırılması ilə bağlı məsələləri tənzimləyir, habelə onların xidməti vəzifələrini icra etdikləri və ondan sonrakı dövrdə maraqlar toqquşmasının qarşısının alınması məqsədilə tətbiq edilən məhdudiyyətləri (qadağaları) müəyyən edir.

Layihəyə əsasən, maraqlar toqquşmasının idarə edilməsi prinsipləri sırasına vicdanlı davranış, dövlət və ya ictimai maraqların üstünlüyü, maraqlar toqquşması risklərinin erkən aşkar edilməsi və bu risklərə cavab tədbirlərinin çevikliyi, vəzifəli şəxsin fəaliyyətində şəffaflıq, vəzifəli şəxsin fəaliyyətinə etimad hüququnun qorunması, vəzifəli şəxsin fəaliyyətində hesabatlılıq və məsuliyyət, dürüstlük, obyektivlik və qərəzsizlik daxildir.

Maraqlar toqquşmasının qarşısının alınması istiqamətində ilkin tədbirlər sırasında isə vəzifəli şəxs tərəfindən aktivlərin özgəninkiləşdirilməsi, qanunla nəzərdə tutulmuş hallar istisna olmaqla, konkret iş üzrə qərar qəbul etmə prosesində iştirakdan imtina edilməsi, normativ hüquqi aktlarda vəzifəli şəxs üçün nəzərdə tutulmuş hər hansı məhdudiyyətə (qadağaya) zidd təklifin rədd edilməsi, maraqlar toqquşması davam etdikdə vəzifədən azad olunması ilə bağlı müraciət edilməsi var.

Qəbul olunacağı təqdirdə qanun dərc olunduğu gündən 6 ay sonra qüvvəyə minəcək.

Hər gün yeni vakansiyalar - AzVak.az-da

© APA