Dünyanın tanınmış sürətli xidmət restoran şəbəkələrindən “Subway” Azərbaycanda genişlənməsini davam etdirir. Şəbəkənin növbəti restoranının Bakıda “Dəniz Mall” ticarət mərkəzində açılması planlaşdırılır.

Marja.az-ın əldə etdiyi məlumata görə, “Subway”ın Azərbaycandakı inkişaf planı çərçivəsində “Dəniz Mall” yeni lokasiyalardan biri olacaq. Şəbəkənin Azərbaycan üzrə nümayəndələrindən Cihan Bıçakçı da “Univerium”da altıncı restoranın açılışından sonra növbəti filialların “Dəniz Mall” və Elmlər metrosu ərazisində açılacağını açıqlayıb.

Hazırda “Dəniz Mall”ın rəsmi saytındakı restoran siyahısında “Subway” hələ göstərilmir. Bu da filialın açılış mərhələsində olduğunu göstərir. Açılışın dəqiq tarixi hələ ictimaiyyətə açıqlanmayıb.

İlk 3 ayda 6 restoran açıb

“Subway” Azərbaycanda sürətli genişlənmə strategiyası həyata keçirir. Şirkət nümayəndəsinin məlumatına görə, brend ilk üç ay ərzində ölkədə 6 filial açıb və genişlənməni “hər ay ən azı 1 yeni filial” strategiyası ilə davam etdirməyi planlaşdırır. Sonuncu — altıncı restoran “Univerium”da, Ceyhun bəy Hacıbəyli küçəsi 133 ünvanında fəaliyyətə başlayıb.

“Subway”ın Azərbaycandakı ilk üç restoranı eyni vaxtda Ağ Şəhərdə — 8 Mərkəzi Bulvar, “Caspian Plaza”da — Cəfər Cabbarlı küçəsi 44 və Elmlər/ATU ərazisində — Hüseyn Cavid prospekti 40D ünvanlarında açılıb. İlk üç restoran iyunun əvvəlində fəaliyyətə başlayıb, brendin Azərbaycandakı rəsmi açılış mərasimi isə iyunun 17-də keçirilib.

Daha sonra şəbəkə “Sea Breeze” ərazisində dördüncü restoranını açıb. “Sea Breeze” restoranının açılışı iyulun əvvəlində baş tutub.

Avqustun 7-də isə “Gənclik Mall”da — Fətəli Xan Xoyski küçəsi 14 ünvanında növbəti restoran istifadəyə verilib. Bu obyekt şəbəkənin Azərbaycandakı beşinci restoranı olub.

Ardınca “Univerium”da — Ceyhun bəy Hacıbəyli küçəsi 133 ünvanında altıncı restoran açılıb. Şirkətin açıqlamasına görə, bu restoran 18 nəfərlik komanda və 42 nəfərlik oturacaq tutumu ilə fəaliyyət göstərir və “Fresh Forward 2.0” konseptində hazırlanıb.

Beləliklə, “Dəniz Mall” filialı mövcud 6 restorandan sonra açılacağı halda, “Subway”ın Azərbaycandakı 7-ci restoranı olacaq.

“Subway” Azərbaycana 2026-cı ildə daxil olub

“Subway” 2026-cı ilin yanvarında “N Sky Build” MMC ilə master-françayzinq müqaviləsi bağlayaraq Azərbaycan bazarına daxil olduğunu elan edib. Müqaviləyə əsasən, “N Sky Build” Azərbaycanda “Subway” restoranlarının idarə edilməsi və inkişaf etdirilməsi üzrə eksklüziv hüquqlar əldə edib.

Şəbəkənin qısa müddətdə Ağ Şəhər, “Caspian Plaza”, Elmlər/ATU, “Sea Breeze”, “Gənclik Mall” və “Univerium” kimi müxtəlif lokasiyalarda fəaliyyətə başlaması brendin Azərbaycan bazarında sürətli ekspansiya strategiyasına üstünlük verdiyini göstərir. “Dəniz Mall” isə bu genişlənmənin növbəti mərhələsi olacaq.

Hər gün yeni vakansiyalar - AzVak.az-da