“Monetri” Bank Olmayan Kredit Təşkilatı MMC 3 milyon manat həcmində istiqraz emissiyasına hazırlaşır.

Marja.az emissiya prospektinə istinadən xəbər verir ki, BOKT hər birinin nominal dəyəri 100 manat olan 30 min ədəd faizli, təmin edilməmiş, sənədsiz, adlı istiqraz buraxmağı planlaşdırır.

İstiqrazların illik faiz dərəcəsi 13% təşkil edəcək. Qiymətli kağızların tədavül müddəti 1 il nəzərdə tutulub.

Faiz ödənişləri hər 3 təqvim ayından bir həyata keçiriləcək. Beləliklə, nominal dəyəri 100 manat olan bir istiqraz üzrə hər rübdə 3,25 manat, bir il ərzində isə ümumilikdə 13 manat faiz ödəniləcək.

Emissiyanın tam yerləşdirilməsi halında “Monetri” investorlar qarşısında bir il ərzində ümumilikdə 390 min manat faiz ödənişi həyata keçirəcək. Müddətin sonunda isə 3 milyon manatlıq nominal əsas borc geri qaytarılmalıdır.

İstiqrazlar təmin edilməmiş formada buraxılır.

Hər gün yeni vakansiyalar - AzVak.az-da

Emissiya prospektinə əsasən, istiqrazların ilkin yerləşdirilməsi “Bakı Fond Birjası” QSC-nin ticarət platformasında kütləvi təklif üsulu ilə həyata keçiriləcək.

Yerləşdirmə müddətində investorlar istiqrazların dəyərini anderrayterin hesablaşma agenti olan “Azər Türk Bank” ASC-də açılmış hesaba köçürəcəklər.

İstiqrazlar dövlət qeydiyyatına alındıqdan sonra onların Bakı Fond Birjasının listinqinə daxil edilməsi üçün müraciət olunması nəzərdə tutulur.

“Monetri”nin aktivləri 35,2 milyon manatı keçib

BOKT-un audit olunmuş maliyyə hesabatlarına görə, 2025-ci ilin sonunda “Monetri”nin cəmi aktivləri 35 milyon 204 min manat təşkil edib. 2024-cü ilin sonunda bu göstərici 23 milyon 619 min manat idi. Beləliklə, şirkətin aktivləri bir il ərzində təxminən 49% artıb. 2023-cü ilin sonu ilə müqayisədə isə aktivlər təxminən iki dəfə böyüyüb. Həmin dövrdə “Monetri”nin aktivləri 17 milyon 672 min manat təşkil etmişdi.

Kredit portfeli 29 milyon manata çatıb

“Monetri”nin xalis kredit portfeli 2025-ci ilin sonunda 29 milyon 47 min manat olub. 2024-cü ildə kredit portfeli 20 milyon 903 min manat, 2023-cü ildə isə 14 milyon 958 min manat təşkil etmişdi. Beləliklə, kredit portfeli 2025-ci ildə illik müqayisədə təxminən 39%, iki il ərzində isə 94% böyüyüb. Şirkətin əsas məhsul kateqoriyalarına lizinq, qızıl girovlu kreditlər, daşınmaz əmlak girovlu kreditlər və istehlak mallarının kreditləşdirilməsi daxildir.

Xalis mənfəət 5,4 milyon manatı keçib

2025-ci ildə “Monetri”nin gəlirləri 11 milyon 777 min manat təşkil edib. Bu göstərici 2024-cü ildə 7 milyon 567 min manat, 2023-cü ildə isə 4 milyon 549 min manat olub. Şirkətin 2025-ci ildə xalis mənfəəti 5 milyon 442 min manata çatıb. 2024-cü ildə xalis mənfəət 4 milyon 29 min manat, 2023-cü ildə isə 1 milyon 702 min manat təşkil etmişdi. Beləliklə, xalis mənfəət 2025-ci ildə əvvəlki illə müqayisədə təxminən 35%, 2023-cü illə müqayisədə isə 3,2 dəfəyə yaxın artıb.

Vergidən əvvəl mənfəət 2025-ci ildə 6 milyon 114 min manat olub.

2026-cı ildə aktivlər 38,9 milyon manata yüksəlib

Prospektdə yer alan prudensial hesabat məlumatlarına görə, 30 iyun 2026-cı il tarixinə “Monetri”nin cəmi aktivləri 38 milyon 858,96 min manata yüksəlib.

Xalis kredit portfeli 30 milyon 192,07 min manat təşkil edib. Ümumi kredit portfeli 31 milyon 716,70 min manat olsa da, kreditlər üzrə 1 milyon 524,63 min manat xüsusi ehtiyat çıxıldıqdan sonra xalis kredit portfeli bu səviyyədə formalaşıb.

Şirkətin yüksək likvidli aktivləri arasında 1 milyon 89,28 min manat pul vəsaiti və cari hesab qalıqları, 500 min manat banklarda müddətli depozitlər və 4 milyon 497,19 min manat investisiyalar yer alıb.

30 iyun 2026-cı il tarixinə “Monetri”nin cəmi öhdəlikləri 9 milyon 445,08 min manat, o cümlədən banklardan cəlb edilmiş kreditləri 9 milyon 25,40 min manat təşkil edib.

Şirkətin cəmi kapitalı 29 milyon 413,88 min manata yüksəlib. Bunun 10 milyon manatı nizamnamə kapitalı, 19 milyon 413,88 min manatı isə bölüşdürülməmiş xalis mənfəətdir.

“Monetri” 2026-cı ilin ilk yarısını 1 milyon 572,66 min manat xalis mənfəətlə başa vurub.

Əsas səhmdar BƏƏ şirkətidir

“Monetri” BOKT-un nizamnamə kapitalı 10 milyon manatdır. Şirkətin 83%-lik və ya 8,3 milyon manatlıq payı Birləşmiş Ərəb Əmirliklərində qeydiyyatdan keçmiş “Practical Solutions Middle East FZ LLC” şirkətinə məxsusdur. “Çaparxana Kəndli Fermer Təsərrüfatı” MMC və Faiq Ağababa oğlu Məmmədovun hər biri BOKT-da 8,5%-lik və ya 850 min manatlıq paya sahibdir.

Həmçinin “Monetri” “TBC Kredit” MMC-nin kapitalında 100%-lik iştirak payına malikdir.

2023–2025-ci illərin göstəriciləri “Monetri”nin həm aktivlər, həm kredit portfeli, həm də mənfəət baxımından sürətli böyümə mərhələsində olduğunu göstərir. Aktivlərin iki ilə təxminən iki dəfə, xalis mənfəətin isə 3 dəfədən çox artması şirkətin əməliyyat miqyasının əhəmiyyətli dərəcədə genişləndiyini göstərir.

2026-cı ilin ilk yarısında da aktivlər 2025-ci ilin sonuna nisbətən 10,4%, xalis kredit portfeli isə təxminən 3,9% artıb. Eyni dövrdə kapitalın 24,3 milyon manatdan 29,4 milyon manata yüksəlməsi balans strukturunda kapital bazasının gücləndiyini göstərir.

3 milyon manatlıq istiqraz emissiyası uğurla tam yerləşdirilərsə, şirkətin bazardan cəlb etdiyi yeni vəsait onun maliyyələşmə mənbələrinin şaxələndirilməsi baxımından əlavə imkan yaradacaq. Bununla belə, istiqrazların təmin edilməmiş olması investor üçün emitentin kredit riskinin əsas qiymətləndirmə amili olaraq qalır.

İş elanları AzVak.az-da