İran İslam İnqilabı Keşikçiləri Korpusunun sözçüsü Hüseyn Muhibbi ABŞ-ın İrana qarşı mümkün yeni hücumu ilə bağlı sərt açıqlamalar verib.

Marja xəbər verir ki, Muhibbi televiziya proqramında çıxışı zamanı ABŞ və İsrailin İrana qarşı yeni hücum ehtimalını dəyərləndirib.

“Əgər yeni hücum olarsa, müdafiəmiz və hücumlarımız ciddi şəkildə dəyişəcək. Yeni hücum baş verərsə, silahları və müharibənin coğrafiyasını dəyişəcəyik. Yeni imkanlarla təchiz edilmiş yeni silahları döyüş meydanına çıxaracağıq və dünya təəccüblənəcək. Hədəflərimiz əvvəlki hədəflər deyil. İndiyədək hücuma məruz qalmamış yeni hədəflər müəyyən etmişik”, – Muhibbi bildirib.

İranın uzunmüddətli müharibəyə hazır olduğunu deyən sözçü qeyd edib ki, Tehran münaqişənin müxtəlif mərhələlərdə davam edə biləcəyini nəzərə alır.

“Bizim fikrimizcə, müharibənin müxtəlif mərhələləri olur. Müharibə bitmir, davam edir. İnqilab Keşikçiləri müharibəyə onsuz da hazır idi, indi isə daha da hazırlıqlıdır”, – o deyib.

“Regionda yeni nizamı İran müəyyən edir” iddiası

Muhibbi bildirib ki, İnqilab Keşikçiləri Korpusu indiyədək ABŞ ilə birbaşa əlaqə saxlamayıb və silahlı qüvvələr diplomatik proseslərdə iştirak etmir. Onun sözlərinə görə, ordunun əsas vəzifəsi ölkənin müdafiəsidir.

O, həmçinin ABŞ-ın regiondakı hegemonluğunun başa çatdığını və yeni regional nizamın Vaşinqton deyil, Tehran tərəfindən müəyyən edildiyini iddia edib.

Muhibbi ABŞ-ın uzun illər yüksək müdafiə imkanlarına malik olması təsəvvürü yaradaraq region ölkələrində hərbi bazalar qurduğunu söyləyib. O, həmin bazaların İran tərəfindən vurulduğunu və istifadəyə yararsız vəziyyətə gətirildiyini də iddia edib.

XXX

ABŞ Prezidenti Donald Tramp bu həftə BMT Baş Assambleyası çərçivəsində İran Prezidenti Məsud Pezeşkianla görüşməyə açıq ola biləcəyini bildirib.

Fox News-un Tramp ilə müsahibəsinə istinadən yaydığı məlumata görə, ABŞ Prezidenti İranla bağlı hazırda “qərar vermə mərhələsində” olduğunu deyib. Tramp, həmçinin İran məsələsində “çox da uzaq olmayan gələcəkdə böyük hadisələrin” baş verə biləcəyini bildirib. O, Tehranın davranışı ilə bağlı sərt ifadələr işlədib. Trampın Pezeşkianla BMT Baş Assambleyası çərçivəsində görüşə “yəqin ki, açıq” olacağını bildirməsi digər mənbələr tərəfindən də təsdiqlənib.

Bazar iştirakçıları ABŞ-İran müharibəsinin dayandırılmasına yönəlmiş diplomatik səyləri, eləcə də yüklərin Hörmüz boğazından keçməyə davam etdiyini göstərən məlumatları izləyirlər.

Bu fonda Brent markalı neftin bir barelinin qiyməti 102 dollardan aşağı düşüb, ABŞ-ın WTI markalı xam nefti isə 98 dollar ətrafında ticarət olunub.

ABŞ Mərkəzi Komandanlığının (CENTCOM) rəhbəri admiral Bred Kuperin sözlərinə görə, son iki həftə ərzində Hörmüz boğazı vasitəsilə xam neft və mayeləşdirilmiş təbii qazın daşınması son altı ayın ən yüksək səviyyəsinə çatıb. Kuper videomüraciətində boğazın əsas tranzit marşrutlarının minalardan təmizləndiyini və Fars körfəzindəki müttəfiqlərin “son bir neçə ay ərzində” bu marşrutla 1 milyard bareldən çox xam neft daşıdığını bildirib.

Guotai Junan Futures şirkətinin baş neft analitiki Xuyi Zhao bildirib ki, bazar tədarük şəraitinin pisləşdiyi mərhələdən çatışmazlığın ən ağır dövrünün geridə qala biləcəyi yeni mərhələyə keçir.

Bununla belə, analitik neft qiymətlərində davamlı eniş üçün zəruri şərtlərin hələ formalaşmadığını və Brent neftinin 100 dollar ətrafında sabitləşə biləcəyini qeyd edib.

Bu arada, Qətərin energetika naziri Saad Əl-Kaabi ABŞ-ın maliyyə naziri Skott Bessentin strateji əhəmiyyətli Hörmüz boğazının iki il ərzində əhəmiyyətini itirəcəyi barədə fikri ilə razılaşmayıb. Əl-Kaabi bazar günü Nyu-Yorkda keçirilən Qətər İqtisadi Forumunda çıxışı zamanı bildirib ki, bu, Bessentin şəxsi mövqeyi ola bilər, lakin onun fikrincə, belə yanaşma yanlışdır.

İş elanları AzVak.az-da