Azərbaycanın ixracı 4,75 milyard dollar artdı – 21,8 milyardı keçdi

Marja.az Dövlət Gömrük Komitəsinin 2025 və 2026-cı illər üzrə aylıq ixrac və idxal statistikasının müqayisəsi əsasında müəyyən edib ki, 2026-cı ilin 8 ayında Azərbaycanın ixracının dəyəri 21 milyard 815 milyon dollar təşkil edib. 2025-ci ilin eyni dövründə ixrac 17 milyard 65 milyon dollar olmuşdu. Beləliklə, illik müqayisədə ixrac 4 milyard 749,7 milyon dollar və ya 27,8% artıb.

Neft-qaz ixracı artıb, amma ümumi ixracdakı payı azalıb

Neft-qaz sektoruna daxil olan malların ixracı 2026-cı ilin ilk 8 ayında 15 milyard 536,2 milyon dollar olub. Ötən ilin eyni dövründə bu göstərici 14 milyard 665,9 milyon dollar idi. İxracın dəyəri 870,3 milyon dollar və ya 5,9% artsa da, neft-qaz mallarının ümumi ixracdakı payı 85,94%-dən 71,22%-ə düşüb. 

Xam neft ixracının həcmi azalıb, gəlir 886 milyon dollar artıb

Azərbaycanın xam neft və xam neft məhsulları ixracından əldə etdiyi gəlir 2026-cı ilin ilk 8 ayında 9 milyard 281,9 milyon dollara yüksəlib. 2025-ci ilin eyni dövründə 15,925 milyon ton xam neft 8 milyard 396 milyon dollara ixrac edilmişdi. Bu il fiziki həcm 7,8% azalaraq 14,678 milyon tona düşsə də, ixracın dəyəri 10,6% və ya 885,9 milyon dollar artıb.

Neft məhsulları ixracından gəlir 2 dəfə artıb

Xam məhsullardan başqa neft və neft məhsullarının ixracı 233,3 milyon dollardan 466,8 milyon dollara yüksəlib. İxracın dəyəri 100,1% artaraq faktiki olaraq iki dəfə yüksəlib. Fiziki həcm də 438,7 min tondan 617,4 min tona çataraq 40,7% artıb.

Azərbaycanın qaz ixracından gəliri 286 milyon dollar azalıb

Qaz halında təbii qaz ixracının dəyəri 5 milyard 996,9 milyon dollardan 5 milyard 710,9 milyon dollara düşüb. Beləliklə, qaz ixracından daxilolma 286 milyon dollar və ya 4,8% azalıb. İxrac olunan qazın həcmi isə 16,453 milyard kubmetrdən 16,378 milyard kubmetrə geriləyib.

Neft koksu ixracından gəlir 89% artıb

Neft koksu ixracının dəyəri 38,34 milyon dollardan 72,28 milyon dollara yüksəlib. Artım 88,5% təşkil edib. Eyni zamanda ixrac olunan neft koksunun miqdarı 125,2 min tondan 181,6 min tona, yəni 45,1% artıb.

Neft bitumu ixracı 3 dəfədən çox artıb

Neft bitumunun ixrac dəyəri 1,12 milyon dollardan 3,74 milyon dollara yüksəlib. İllik artım 233% təşkil edib. Fiziki həcm isə 4,29 min tondan 12,31 min tona yüksələrək 2,9 dəfə artıb.

Neft-qaz sektorunda “digər” malların ixracı 2,9 dəfə artıb

Neft-qaz sektorunun “digər” mallar üzrə ixracı 242,5 min dollardan 703,3 min dollara yüksəlib. Beləliklə, bu istiqamət üzrə ixracın dəyəri təxminən 190% artıb.

Hər gün yeni vakansiyalar - AzVak.az-da