2026-cı ilin ilk yarısında Azərbaycanın cari əməliyyatlar balansında 4 milyard 737,7 milyon ABŞ dolları profisit yaranıb. Bu, ötən ilin eyni dövrü ilə müqayisədə təxminən 2 dəfə çoxdur.

Marja.az xəbər verir ki, bu barədə Azərbaycan Mərkəzi Bankının “2026-cı ilin 6 ayı üzrə Tədiyə balansı” hesabatında bildirilir.

2025-ci ilin ilk 6 ayında cari əməliyyatlar balansının profisiti 2 milyard 317,4 milyon dollar olmuşdu. Bu il profisitin ÜDM-ə nisbəti 12,4%-ə çatıb. Mərkəzi Bank bunu makroiqtisadi sabitlik baxımından müsbət göstərici kimi qiymətləndirir.

Neft-qaz sektoru üzrə cari əməliyyatlar balansının profisiti illik müqayisədə 23,6% artaraq 9 milyard 59,1 milyon dollara yüksəlib. Digər sektorlar üzrə kəsir isə 13,7% azalaraq 4 milyard 321,4 milyon dollar təşkil edib.

Xarici ticarət profisiti 48%-ə yaxın artıb

2026-cı ilin yanvar-iyun aylarında Azərbaycanın xarici ticarət dövriyyəsi 22,4 milyard dollar olub. Xarici ticarət balansında 6 milyard 155,3 milyon dollarlıq profisit yaranıb. Bu göstərici ötən ilin eyni dövrü ilə müqayisədə 47,9% çoxdur.

Ümumi ixrac 16,9% artaraq 14 milyard 289,3 milyon dollara, idxal isə 0,9% artaraq 8 milyard 134 milyon dollara çatıb.

Neft-qaz sektoru üzrə ixrac 16,7% artaraq 12 milyard 296,6 milyon dollar olub. Bunun 7,6 milyard dolları xam neftin, 4,2 milyard dolları təbii qazın, 0,5 milyard dolları isə neft emalı məhsullarının payına düşüb.

Qeyri-neft-qaz ixracı isə 18% artaraq təxminən 2 milyard dollara çatıb.

Nəqliyyat xidmətlərindən 941 milyon dollarlıq profisit

İlk 6 ayda Azərbaycanla xarici ölkələr arasında xidmətlər üzrə əməliyyatların ümumi həcmi 9,2 milyard dollar olub. Xidmətlər balansında 1 milyard dollardan çox kəsir qeydə alınsa da, bu göstərici illik müqayisədə 1,2% azalıb.

Nəqliyyat xidmətləri üzrə vəziyyət isə müsbət olub. Qeyri-neft-qaz sektoru üzrə nəqliyyat xidmətlərinin ixracı 6,6% artıb, idxalı 1,7% azalıb. Nəticədə nəqliyyat xidmətləri üzrə profisit 9,9% artaraq 941,1 milyon dollara çatıb.

Turizm xidmətləri üzrə dövriyyə 14,7% azalaraq 1,4 milyard dollar təşkil edib. Turizm xidmətlərinin ixracı 747,8 milyon dollar, idxalı 700,6 milyon dollar olub və nəticədə 47,2 milyon dollarlıq profisit yaranıb.

Azərbaycana pul baratları 40% artıb

Hesabat dövründə xarici ölkələrdən Azərbaycana göndərilən pul baratlarının həcmi 40,2% artaraq 0,7 milyard dollara çatıb.

Azərbaycandan xaricə köçürülən pul baratları isə 12,7% azalaraq 0,2 milyard dollar olub. Nəticədə pul baratları üzrə müsbət saldo 82,8% artaraq təxminən 0,5 milyard dollara yüksəlib.

Azərbaycan xaricə 5 milyard dollar birbaşa investisiya yatırıb

2026-cı ilin ilk yarısında Azərbaycana birbaşa xarici investisiya formasında 3,7 milyard dollar sərmayə cəlb olunub. Eyni zamanda, Azərbaycandan xarici iqtisadiyyata yönəldilmiş birbaşa investisiyaların həcmi 5 milyard dollar təşkil edib.

Ölkə iqtisadiyyatına yatırılmış birbaşa xarici investisiyaların 76,1%-i neft-qaz sektorunun payına düşüb.

Qeyri-neft-qaz sektoruna cəlb edilmiş birbaşa xarici investisiyalar isə 19,6% artaraq 0,9 milyard dollara yüksəlib.

Azərbaycanın strateji valyuta aktivləri 85,8 milyard dollara çatıb

Hesabat dövründə tədiyə balansının ehtiyat aktivlərinin reallaşmış hissəsi 1,4 milyard dollar artıb. 2026-cı ilin ilk yarısının sonunda Azərbaycanın strateji valyuta aktivləri 0,7 milyard dollar artaraq 85,8 milyard dollara çatıb.