Qızılın qiyməti cümə günü cüzi yüksəlsə də, ABŞ-da faiz artımı gözləntilərinin güclənməsi fonunda ardıcıl üçüncü həftəni də ucuzlaşma ilə başa vurmağa hazırlaşır.

Marja xəbər verir ki, investorlar ABŞ-da açıqlanacaq istehlak qiymətləri indeksi (CPI) məlumatlarını gözləyirlər. Bazar iştirakçıları hesab edirlər ki, göstəricilər ABŞ Federal Ehtiyat Sisteminin (Fed) pul siyasətinin gələcək istiqaməti ilə bağlı əlavə siqnallar verə bilər.

Bakı vaxtı ilə saat 16:00-a olan məlumata görə, qızılın qiyməti 0,3% artaraq bir unsiya üçün 4331 dollara yüksəlib. Bununla belə, qiymətli metal həftənin əvvəlindən indiyədək 2%-dən çox dəyər itirib.

ABŞ-da qızıl fyuçersləri isə 1% azalaraq 4 364,70 dollara düşüb.

Cümə axşamı açıqlanan məlumatlara görə, ABŞ-da son tələb üzrə İstehsalçı Qiymətləri İndeksi (PPI) avqustda 0,4% artıb. İyul ayı üzrə artım göstəricisi isə 0,1%-ə yuxarı istiqamətdə yenidən nəzərdən keçirilib.

Məlumatların açıqlanmasından sonra investorlar Fed-in gələn həftə keçiriləcək iclasında faiz dərəcəsini artıracağına dair gözləntilərini gücləndiriblər. Bunun ardınca spot qızıl təxminən 2% ucuzlaşıb.

“Exness”in maliyyə bazarları üzrə baş strateqi Wael Makarem bildirib ki, gözləntilərdən daha güclü inflyasiya göstəricisi bir neçə faiz artımı ehtimalını gücləndirə bilər.

Onun sözlərinə görə, belə ssenari ABŞ xəzinə istiqrazlarının gəlirliliyini və dolları yüksəldərək qızıl üzərində əlavə təzyiq yarada bilər.

Makarem həmçinin Yaxın Şərqdə davam edən gərginliyin inflyasiya gözləntilərini artırmaqla qızıl bazarına təzyiq göstərməyə davam edə biləcəyini qeyd edib.

Qızıl ənənəvi olaraq inflyasiyadan qorunma aləti hesab edilsə də, faiz dərəcələrinin yüksəlməsi gəlir gətirməyən qiymətli metal üçün mənfi amil sayılır.

Bununla yanaşı, Yaxın Şərqdə geosiyasi risklər yüksək olaraq qalır. İranla əlaqəli husilərin Yəmənin Mocha liman şəhərinə nəzarəti ələ keçirdiyi və Qırmızı dəniz sahili boyunca irəlilədiyi bildirilir.

Neft qiymətləri də yüksəlir. Əsas iki neft markası mayın ortalarından bəri ilk dəfə həftəni bir barel üçün 100 dollardan yuxarı səviyyədə başa vurmağa hazırlaşır.

Digər qiymətli metallarda isə spot gümüş 0,3% ucuzlaşaraq 63,39 dollar/unsiyaya düşüb və həftə ərzində 4%-dən çox dəyər itirib.

Platin 0,2% azalaraq 1773,93 dollara, palladium isə 0,3% ucuzlaşaraq 1 278,51 dollara geriləyib. Hər iki metalın həftəni enişlə başa vuracağı gözlənilir.

İş elanları AzVak.az-da