ABŞ Enerji İnformasiya Administrasiyası (EIA) davam edən İran münaqişəsi nəticəsində Yaxın Şərqdən neft təklifinin azalması və qlobal ehtiyatların sürətlə tükənməsi fonunda 2026 və 2027-ci illər üçün neft qiymətləri üzrə proqnozlarını yüksəldib.

Marja xəbər verir ki, EIA artıq Brent markalı neftin spot bazarda 2026-cı il üzrə orta qiymətinin bir barel üçün təxminən 91 dollar olacağını gözləyir. Bu, əvvəlki proqnozla müqayisədə təxminən 5% artım deməkdir.

ABŞ-ın West Texas Intermediate (WTI) markalı neftinin orta qiyməti üzrə proqnoz da təxminən 5% artırılaraq bir barel üçün 84,65 dollara çatdırılıb.

Ötən həftəsonundan etibarən ABŞ və İran regiondakı gəmiçilik və enerji infrastrukturuna qarşı qarşılıqlı hücumlar həyata keçirib. Eskalasiya nəticəsində Brent neftinin qiyməti çərşənbə günü bir barel üçün 100 dolları keçib.

Qlobal neft ehtiyatları 400 milyon barel azalıb

EIA-nın hesablamalarına görə, 2026-cı ilin əvvəlindən indiyədək qlobal neft ehtiyatları təxminən 400 milyon barel azalıb və ilin sonunadək azalma davam edəcək. Bunun əsas səbəblərindən biri Yaxın Şərqdə böyük həcmdə neft hasilatının və ixracının dayanmasıdır.

Regionda dayandırılmış neft hasilatının həcmi iyulda gündəlik 5 milyon barel olduğu halda, avqustda 6,7 milyon barelə yüksəlib.

EIA hasilatın tədricən bərpa olunacağını gözləyir

Administrasiya qarşıdakı aylarda Hörmüz boğazından neft daşımalarının tədricən artması hesabına Yaxın Şərqdə hasilatın yüksələcəyini proqnozlaşdırır. Bununla belə, regiondan neft ixracına tətbiq olunan bəzi məhdudiyyətlərin 2026-cı ilin sonunadək davam edəcəyi gözlənilir.

EIA-nın proqnozuna görə, Yaxın Şərqdə xam neft hasilatı 2027-ci ilin ikinci rübünədək münaqişədən əvvəlki orta səviyyələrdən aşağı qalacaq.

2026-cı ilin dördüncü rübündə regionda dayandırılmış neft hasilatının gündəlik orta hesabla 5,7 milyon barel təşkil edəcəyi gözlənilir.

EIA həmçinin ABŞ-ın yenilənmiş blokada tədbirlərinin və sanksiyalarının İranın neft ixracını məhdudlaşdıracağını və ölkədə hasilatın azalmasına səbəb olacağını proqnozlaşdırır.