Apple bu gün “Surprise and shine” tədbirini keçirəcək. Bank of America-nın fikrincə, Con Ternusun Apple şirkətinin baş icraçı direktoru (CEO) kimi qatılacağı ilk məhsul təqdimatında investorların diqqəti şirkətin ilk qatlanan iPhone modelinə, mümkün qiymət artımlarına və yeni iPhone-ların satışa çıxarılma qrafikindəki dəyişikliklərə yönələcək.

Marja xəbər verir ki, Apple səhmləri üzrə “Al” tövsiyəsi və 380 dollar hədəf qiyməti müəyyən edən Bank of America analitiki Vamsi Mohanın sözlərinə görə, əsas diqqət qatlanan iPhone-a, Pro modellərinin qiymətlərində əhəmiyyətli artıma və daha ucuz iPhone 18 modellərinin təqdimatının 2027-ci ilin yazına keçirilməsinə yönələcək.

Mediada yayılan məlumatlara görə, “Fold” və ya “Ultra” adlandırılması ehtimal edilən qatlanan iPhone-un başlanğıc qiyməti 2099 dollar təşkil edəcək. Beləliklə, bu model Apple tarixinin ən bahalı iPhone-u ola bilər. Reuters-in 8 sentyabr tarixli ayrıca materialında isə qiymətin 2 500 dollardan yuxarı ola biləcəyi qeyd edilir

Mohan yaddaş və məlumat saxlama komponentlərinin bahalaşması səbəbindən iPhone 18 Pro və iPhone 18 Pro Max modellərinin qiymətlərinin 150-200 dollar artırılacağını gözləyir.

Analitik qeyd edib ki, baza iPhone 18, iPhone 18 Air və iPhone 18e modellərinin təqdimatının yaz mövsümünə keçirilməsi Apple-ın ənənəvi təqdimat qrafikində ciddi dəyişiklik olacaq. Bu halda ilin sonundakı bayram alış-verişi mövsümündə satışda əsasən premium iPhone modelləri olacaq.

Mohan bildirib ki, təqdimatların iki mərhələyə bölünməsi daha bahalı modellərin satışdakı payını və orta satış qiymətini (ASP) yüksəldə bilər. Bununla yanaşı, qiymətə daha həssas olan istehlakçıların daha ucuz modellərin satışa çıxmasını gözləyərək telefonlarını yeniləməyi təxirə salması riski də yaranır.

Analitik həmçinin qeyd edib ki, Apple səhmləri əvvəlki təqdimatlardan dərhal sonra tez-tez “sell the news” (“xəbəri sat”) effekti ilə mülayim ucuzlaşma nümayiş etdirib, lakin sonrakı 30-60 gün ərzində yenidən bahalaşıb.

Mohanın fikrincə, üÜç yeni iPhone modelindən əlavə, Apple təqdimatda Apple Watch Series 12 və Apple Watch Ultra 4, AirPods 5 və yenilənmiş ağıllı ev məhsullarını da nümayiş etdirə bilər.

Yeni üç iPhone modelinin hamısının iOS 27 əməliyyat sistemi ilə satışa çıxarılacağı gözlənilir.

İş elanları AzVak.az-da