Azərbaycan Mərkəzi Bankının (AMB) rəsmi valyuta ehtiyatları 2026-cı ilin avqust ayında kəskin artıb.

Marja.az Azərbaycan Mərkəzi Bankının məlumatlarına istinadən xəbər verir ki, 31 avqust 2026-cı il tarixinə rəsmi valyuta ehtiyatları 15 milyard 301,3 milyon ABŞ dolları təşkil edib.

31 iyul 2026-cı il tarixinə ehtiyatların həcmi 13 milyard 767,9 milyon dollar idi.

Beləliklə, cəmi bir ay ərzində Mərkəzi Bankın valyuta ehtiyatları 1 milyard 533,4 milyon dollar və ya 11,1% artıb.

İlin əvvəlindən artım 3,8 milyard dollara yaxınlaşıb

2025-ci ilin sonunda Azərbaycanın rəsmi valyuta ehtiyatları 11 milyard 514,9 milyon dollar təşkil etmişdi. 2026-cı ilin ilk 8 ayında ehtiyatlar 3 milyard 786,4 milyon dollar və ya 32,9% artıb.

Bir ildə 4 milyard dollardan çox artım

2025-ci ilin avqust ayının sonunda rəsmi valyuta ehtiyatları 11 milyard 249,4 milyon dollar idi. Beləliklə, son bir ildə ehtiyatların həcmi 4 milyard 51,9 milyon dollar və ya 36% artıb.

2026-cı ilin avqustundakı 15,3 milyard dollarlıq göstərici təqdim olunan 2025–2026-cı illər üzrə statistikanın ən yüksək səviyyəsidir.

Hər gün yeni vakansiyalar - AzVak.az-da

Mərkəzi Bankın valyuta bazarına müdaxiləsi ilə bağlı məlumat

Tədiyə balansının cari əməliyyat balansında profisitin və maliyyə sektorunda dedollarlaşma prosesinin davam etməsi fonunda valyuta bazarında təklif tələbi üstələyib. Bu şəraitdə cari ilin avqust ayında Mərkəzi Bank tərəfindən 1,5 milyard ABŞ dolları məbləğində alış yönlü müdaxilə həyata keçirilib.

Marja.az xəbər verir ki, bu barədə Azərbaycan Mərkəzi Bankının valyuta bazarına müdaxiləsi ilə bağlı məlumatında bildirilir.

Qeyd edilib ki, nəticədə, cari ilin ötən dövründə Mərkəzi Bankın valyuta ehtiyatları 3,8 mlrd. ABŞ dolları məbləğində və ya 33% artaraq tarixi maksimuma - 15,3 mlrd. ABŞ dollarına yüksəlib.

Valyuta bazarından alınmış xarici valyutanın tam və ya bir hissəsinin bundan sonra bazarda formalaşacaq tələbdən asılı olaraq tarazlığın təmin edilməsi məqsədilə yenidən bazara yönəldilməsi istisna edilmir.

Makroiqtisadi sabitliyin qorunması məqsədilə Mərkəzi Bank valyuta bazarında alış və ya satış yönlü əməliyyatlarda iştirakını davam etdirəcəyi təqdirdə bu barədə məlumat açıqlanacaqdır.

İş elanları AzVak.az-da