ABŞ Prezidenti Donald Tramp Hörmüz boğazı yaxınlığındakı İran hədəflərinə genişmiqyaslı hücumların həyata keçirildiyini açıqlayıb və İranın cavab verməsi halında daha ağır zərbələrin endiriləcəyi ilə hədələyib.

Marja xəbər verir ki, Tramp sosial media hesabında yaydığı açıqlamada ABŞ-nin Hörmüz boğazı yaxınlığındakı İran hədəflərini vurduğunu bildirib.

Hücumların genişmiqyaslı və güclü olduğunu qeyd edən Tramp, əməliyyatın İranın Hörmüz boğazında yenidən dəniz minaları yerləşdirmək cəhdinə və İordaniyadakı ABŞ hərbi bazasına raket hücumuna cavab olaraq həyata keçirildiyini deyib.

Tramp hazırda Hörmüz boğazında mina olmadığını, minaların tamamilə təmizləndiyini və ya zərərsizləşdirildiyini iddia edib.

ABŞ ordusunun hücumlara başladığını açıqlamasından sonra İran mediası Keşm adası, Bəndər-Abbas, Sirik, Çabahar və Konarakda partlayış səslərinin eşidildiyini bildirib.

Tramp İranın İordaniyadakı ABŞ hərbi bazasına 8 raket atdığını bildirib və həmin raketlərin hamısının uğurla zərərsizləşdirildiyini iddia edib.

ABŞ Prezidenti İranın son hücumlara cavab verməsi halında Tehranın yenidən və daha ağır şəkildə hədəfə alınacağını bildirib.

Tramp ABŞ-nin daha böyük hücum variantını da hazır vəziyyətdə saxladığına qeyd edərək, mümkün növbəti hücumun belə planlaşdırılan ən böyük əməliyyat olmayacağını deyib.

O bildirib ki, İrana qarşı daha böyük hücum “gözləmə rejimindədir” və proses başa çatdıqda İran İslam Respublikasından “çox az şey qalacaq”.

Tramp "Truth" hesabında yazıb:

"ABŞ hazırda, elə bu dəqiqələrdə Hörmüz boğazı yaxınlığındakı İran hədəflərinə zərbələr endirir. Zərbələr genişmiqyaslı və güclüdür.

Bu hücumlar İranın Hörmüz boğazına yenidən dəniz minaları yerləşdirmək cəhdin qarşı keçirilib. Onların bu cəhdi uğursuzluğa düçar olub— hazırda boğazda heç bir mina yoxdur, onların hamısı tamamilə təmizlənib və ya partladılıb. Həmçinin hücumlar iranlıların İordaniyadakı hərbi bazamıza atdığı səkkiz raketə cavab olaraq həyata keçirilir. Həmin raketlərin hamısı uğurla vurularaq zərərsizləşdirilib.

Əgər uğursuz İran dövləti bu tam əsaslandırılmış hücuma cavab olaraq əks-zərbə endirsə, onlar yenidən, bu dəfə daha sərt və daha yüksək səviyyədə vurulacaqlar. Ən böyük hücum hələ qarşıdadır və o başa çatanda İran İslam Respublikasından çox az şey qalacaq!

Prezident DONALD J. TRAMP"