Avrozonada inflyasiya təxminən son üç ilin ən yüksək səviyyəsinə yüksəlib. Bu göstərici Avropa Mərkəzi Bankının (AMB) gələn həftə faiz dərəcəsini artıracağına dair gözləntiləri daha da gücləndirib.

Marja xəbər verir ki, Eurostat-ın məlumatına görə, avqust ayında istehlak qiymətləri illik müqayisədə (ötən ilin avqust ayı ilə müqayisədə) 3,3% artıb. İyulda illik inflyasiya 2,9% təşkil etmişdi.

Beləliklə, Avrozonada inflyasiya 2023-cü ilin sentyabrından bəri ən yüksək səviyyəyə çatıb. Göstərici Bloomberg-in sorğusunda iştirak edən iqtisadçıların median proqnozuna uyğun olub.

Ərzaq və enerji kimi qiymətləri daha dəyişkən olan komponentlərin nəzərə alınmadığı baza inflyasiya isə gözlənilmədən 2,4%-ə geriləyib. Bazarların yaxından izlədiyi xidmət sektorunda inflyasiya da 3%-ə düşüb.

İran müharibəsinin inflyasiyanı AMB-nin 2%-lik hədəfindən xeyli yuxarı səviyyədə saxlaması və Avrozona iqtisadiyyatının gözləniləndən daha dayanıqlı olması investorların faiz artımı gözləntilərini gücləndirib.

Bazar iştirakçıları AMB-nin iyun ayında həyata keçirdiyi ilk faiz artımından sonra daha bir artıma gedəcəyini gözləyirlər.

Sentyabrın 10-da faiz dərəcəsinin 0,25 faiz bəndi artırılması artıq bazarlar tərəfindən tam qiymətləndirilib. İnvestorlar bunun ardınca əlavə faiz artımlarının da mümkün olacağını gözləyirlər.

Enerji qiymətləri 14,3% artıb

Avrozona inflyasiyasının əsas komponentlərinə nəzər saldıqda, avqust ayında ən yüksək illik qiymət artımının enerji sektorunda qeydə alındığı görünür.

Enerji qiymətləri iyulda 10,3% artdığı halda, avqustda illik artım 14,3%-ə yüksəlib.

Xidmət sektorunda qiymət artımı iyuldakı 3,3%-dən avqustda 3%-ə geriləyib.

Enerji istisna olmaqla sənaye məhsullarında illik inflyasiya iyuldakı 0,9%-dən 1,2%-ə yüksəlib.

Ərzaq, alkoqol və tütün məhsullarında qiymət artımı isə dəyişməyərək 1,2% təşkil edib.

Eurostat-ın məlumatına görə, Avrozonada işsizlik səviyyəsi avqust ayında 6,4% olub. Bazar gözləntisi işsizliyin 6,3% təşkil edəcəyi istiqamətində idi.

İş elanları AzVak.az-da