Özbəkistan Respublikasının Namanqan vilayətinin hakimi Şovkat Şokircanoviç Abdurazakovun rəhbərlik etdiyi nümayəndə heyəti Azərbaycana səfəri çərçivəsində "Prime Cotton" şirkətini ziyarət edib.

Nümayəndə heyətini salamlayan "Prime Cotton" MMC-nin Baş İcraçı direktoru Tural Əlizadə Azərbaycan və Özbəkistan arasında mövcud tarixi və mədəni yaxınlığın bu gün iqtisadi, sənaye, təhsil və investisiya sahələrində inkişaf edən əməkdaşlıqla daha da möhkəmləndiyini bildirib. O, xüsusilə pambıqçılıq və tekstil sənayesində tərəflərin malik olduğu təcrübə və potensialın yeni əməkdaşlıq imkanları yaratdığını vurğulayıb.

Tural Əlizadə çıxışında bildirib:

“Biz bugünkü görüşə sadəcə tanışlıq kimi deyil, praktiki əməkdaşlığın başlanğıcı kimi baxmaq istərdik. Namanqanın güclü tekstil və sahibkarlıq potensialı ilə "Prime Cotton"un pambığın bütün dəyər zənciri üzrə formalaşdırdığı təcrübənin bir araya gəlməsi qarşılıqlı faydalı layihələr üçün real imkanlar yarada bilər. Məqsədimiz müzakirələri konkret təşəbbüslərə və uzunmüddətli tərəfdaşlığa çevirməkdir.”

Görüş zamanı tərəflər pambıqçılıq və tekstil sənayesi üzrə əməkdaşlıq perspektivləri, qarşılıqlı təcrübə mübadiləsi, müasir istehsal və aqrotexnologiyaların tətbiqi, tekstil müəssisələri və klasterləri arasında əlaqələrin inkişaf etdirilməsi, eləcə də potensial investisiya və ixrac imkanları ətrafında fikir mübadiləsi aparıblar.

Görüşdə təhsil və peşəkar kadr hazırlığı sahəsində əməkdaşlıq perspektivləri də müzakirə olunub. Bu çərçivədə Namanqan Dövlət Texniki Universiteti ilə birgə layihələrin həyata keçirilməsi, sənaye ilə təhsil arasında praktiki əməkdaşlığın genişləndirilməsi, tələbə və mütəxəssislər üçün təcrübə proqramlarının təşkili imkanları ətrafında fikir mübadiləsi aparılıb.

Nümayəndə heyətinə "Prime Cotton"un fəaliyyəti və istehsal potensialı barədə ətraflı məlumat verilib. Bildirilib ki, şirkət pambığın dəyər zəncirinin müxtəlif mərhələlərində — kənd təsərrüfatı və aqronomiyadan başlayaraq pambığın emalı, lif və iplik istehsalına qədər fəaliyyət göstərir. Eyni zamanda müasir texnologiyaların tətbiqi, mexanizasiya, su resurslarından səmərəli istifadə, məhsul keyfiyyətinin yüksəldilməsi və dayanıqlı inkişaf Prime Cotton-un əsas fəaliyyət istiqamətləri sırasındadır.

Müzakirələrdə Özbəkistanın tekstil sənayesində formalaşdırdığı təcrübə ilə Azərbaycanın pambıqçılıq və tekstil sektorundakı potensialının qarşılıqlı əməkdaşlıq üçün yeni imkanlar yarada biləcəyi qeyd olunub. Tərəflər mövcud imkanların konkret əməkdaşlıq təşəbbüslərinə çevrilməsinin və qarşılıqlı əlaqələrin davam etdirilməsinin əhəmiyyətini vurğulayıblar.

Görüş gələcək əməkdaşlıq perspektivləri, qarşılıqlı maraq doğuran istiqamətlər və potensial birgə təşəbbüslər ətrafında məhsuldar fikir mübadiləsi ilə yekunlaşıb.

Hər gün yeni vakansiyalar - AzVak.az-da