ABŞ-ın Apple şirkəti Avropa İttifaqında tətbiq tərtibatçıları üçün kommersiya şərtlərini yeniləyib və indiyədək tətbiqin hər quraşdırılmasına görə tutulan “Core Technology Fee” ödənişini ləğv edib.

Marja-nın məlumatına görə, ABŞ-ın texnologiya nəhəngi bildirib ki, dəyişikliklər Avropa Komissiyası ilə aparılan müzakirələr və əməkdaşlıq nəticəsində hazırlanıb. Yeni qaydalar Apple ilə Avropa Komissiyası arasında tətbiqlərin alternativ üsullarla paylanması və ödəniş mexanizmləri ilə bağlı yaranmış fikir ayrılıqlarının aradan qaldırılmasına yönəlib.

Yeni kommersiya modeli 1 oktyabr 2026-cı ildən qüvvəyə minəcək.

Apple-ın məlumatına görə, Avropa İttifaqında tətbiq paylayan bütün tərtibatçılar bundan sonra vahid kommersiya şərtləri əsasında fəaliyyət göstərəcəklər. Şirkət bunun qaydaların sadələşdirilməsinə və müxtəlif paylama modelləri arasında fərqlərin azaldılmasına imkan verəcəyini bildirir.

Əsas dəyişikliklərdən biri “Core Technology Fee”nin tamamilə ləğv edilməsidir. Əvvəlki modeldə müəyyən həddən yuxarı tətbiq quraşdırmalarına görə tərtibatçılardan əlavə ödəniş tutulurdu.

Yeni sistemə əsasən, App Store-dan kənarda paylanan tətbiqlərdə həyata keçirilən rəqəmsal əməliyyatlardan Apple 5% komissiya alacaq.

Şirkət müxtəlif ödəniş üsulları üçün fərqli komissiya dərəcələri müəyyən edib.

Apple-ın öz tətbiqdaxili alış sistemindən istifadə edilən əməliyyatlarda komissiya 26% olacaq. Alternativ ödəniş sistemləri vasitəsilə həyata keçirilən əməliyyatlara 20%, istifadəçinin ödəniş üçün xarici internet saytına yönləndirildiyi əməliyyatlara isə 15% komissiya tətbiq ediləcək.

Kiçik bizneslər, “Mini Apps Partner Program” və “Video Partner Program” proqramlarının iştirakçıları, eləcə də avtomatik yenilənən və bir ildən artıq davam edən abunəliklər üçün daha aşağı komissiya dərəcələrinin tətbiqi nəzərdə tutulur.

Yeni qaydalar tərtibatçılara Apple-ın tətbiqdaxili alış sistemi ilə yanaşı, alternativ ödəniş üsullarını da istifadəçilərə təqdim etmək imkanı verəcək. Beləliklə, Avropa İttifaqında fəaliyyət göstərən tətbiq sahiblərinin ödəniş infrastrukturu seçimləri genişlənəcək.

Apple eyni zamanda uşaqların təhlükəsizliyinin qorunması ilə bağlı əlavə məhdudiyyətlər müəyyən edib.

App Store-da uşaqlar üçün nəzərdə tutulan tətbiqlərdə xarici keçidlər vasitəsilə ödənişə icazə verilməyəcək. Bundan əlavə, 13 yaşdan aşağı istifadəçilərin satınalma məqsədilə xarici internet saytlarına yönləndirilməsinə imkan verilməyəcək.

18 yaşdan aşağı istifadəçilərin alternativ ödəniş sistemləri və ya xarici keçidlər vasitəsilə həyata keçirdikləri əməliyyatlarda isə valideyn razılığı mexanizminin tətbiqi məcburi olacaq.

Apple-ın yeni kommersiya modeli Avropa İttifaqında rəqəmsal bazarların tənzimlənməsi fonunda App Store biznes modelinin dəyişdirilməsi istiqamətində atılan növbəti mühüm addım kimi qiymətləndirilir.