Hörmüz boğazının yenidən açılmasına dair razılaşmanın yaxın vaxtlarda əldə olunacağına ümidlərin azalması nəticəsində əvvəlki sessiyada kəskin bahalaşan neftin qiymətləri çərşənbə axşamı Asiya ticarətində sabitləşib.

Marja xəbər verir ki, Brent markalı neftin oktyabr fyuçerslərinin qiyməti 0,2% artaraq bir barel üçün 87,92 dollara, West Texas Intermediate (WTI) markalı neftin fyuçersləri isə 0,27% bahalaşaraq 82,35 dollara yüksəlib.

Hörmüz sazişi ilə bağlı şübhələr nefti kəskin bahalaşdırıb

ABŞ və İranın son hərbi hücumlarla əlaqədar qarşılıqlı təzminat tələbləri irəli sürməsindən sonra Hörmüz boğazının yenidən açılmasına dair razılaşmanın yaxın vaxtlarda əldə olunacağına ümidlər azalıb. Bunun fonunda Brent və WTI fyuçersləri bazar ertəsi keçirilən ticarət sessiyasını 5%-dən çox artımla başa vurub.

Tərəflər Hörmüz boğazındakı vəziyyətlə bağlı bir-birinə zidd açıqlamalar da veriblər. Vaşinqton su yolunun açıq qaldığını bildirsə də, Tehran boğazı minalar və pilotsuz uçuş aparatları vasitəsilə bağladığını bəyan edib.

ABŞ Prezidenti Donald Tramp bazar ertəsi İranın təzminat tələbinə cavab olaraq son münaqişə zamanı həlak olan şəxslərə görə Tehranın kompensasiya ödəməsini tələb edib.

Bu qarşılıqlı tələblər ABŞ rəsmilərinin mühüm su yolunun yenidən açılmasına dair razılaşmanın yaxın olduğu barədə son açıqlamalarına baxmayaraq irəli sürülüb. Həmin açıqlamalar fonunda neftin qiymətləri ötən həftə kəskin ucuzlaşmışdı.

İran Hörmüz boğazından keçəcək yeni gəmiçilik marşrutlarının müəyyənləşdirilməsi ilə bağlı Omanla yekun razılaşmaya yaxın olduğunu bildirib. Bununla belə, Tehran boğazın yenidən açılmasından əvvəl ABŞ-nin digər şərtləri də yerinə yetirməli olduğunu vurğulayıb. Bu şərtlərə təzminatın ödənilməsi və bütün sanksiyaların ləğvi daxildir.

ABŞ və İsrailin İrana qarşı müharibəsindən əvvəl dünya üzrə neft tədarükünün təxminən beşdə biri Hörmüz boğazından keçirdi. Boğaz iyunda ABŞ ilə İran arasında əldə olunan sülh razılaşmasından sonra qısa müddətə yenidən açılsa da, İranın regiondan keçən gəmilərə hücumlarını bərpa etməsi fonunda gəmi hərəkəti yenidən kəskin azalıb.

Hörmüz boğazının bağlı qalması neftin qiymətlərini dəstəkləyən əsas amillərdən biridir.

Husilərin hücumları tədarüklə bağlı narahatlığı artırır

Tədarükün pozulması ilə bağlı narahatlığı artıran daha bir amil kimi, İranın dəstəklədiyi Yəmən husiləri həftəsonu “Saudi Aramco” şirkətinin Cizan şəhərində yerləşən neft emalı zavoduna zərbə endirdiklərini açıqlayıblar.

Husilər Qırmızı dənizdə gəmilərə və neft infrastrukturuna hücum etməklə İran müharibəsində yeni cəbhə açacaqları ilə hədələyiblər. Bu isə tədarükün pozulması ilə bağlı narahatlığı daha da gücləndirib və neftin bahalaşmasına əlavə təkan verib.

Husilər ötən ay Qırmızı dənizdə Səudiyyə Ərəbistanına qarşı dəniz blokadası elan etmişdilər.

İş elanları AzVak.az-da