Amazon-un avtonom nəqliyyat vasitələri istehsal edən “Zoox” şirkəti ABŞ-də kommersiya robotaksi xidmətini gələn həftə Las-Veqasda istifadəyə verəcəyini açıqlayıb.

Marja xəbər verir ki, şirkət ABŞ-nin yol hərəkəti təhlükəsizliyi tənzimləyicisinin insan müdaxiləsi olmadan işləyən robotaksilərin kommersiya məqsədilə istifadəsinə icazə verməsindən cəmi bir neçə gün sonra ödənişli səfərlərə başlayacağını bildirib.

Elektriklə işləyən “Zoox” robotaksiləri üz-üzə yerləşdirilmiş iki sıra oturacaqları və faytonu xatırladan qeyri-adi dizaynı ilə diqqət çəkir. Şirkət indiyədək Las-Veqas, San-Fransisko, Ostin və Mayamidə həyata keçirilən sınaq proqramları çərçivəsində sərnişinləri ödənişsiz daşıyıb.

“Zoox”un kommersiya fəaliyyətinə başlaması ABŞ-nin robotaksi bazarında rəqabəti daha da gücləndirir. “Alphabet”ə məxsus “Waymo” artıq bir sıra şəhərlərdə ödənişli sürücüsüz nəqliyyat xidməti göstərir. “Tesla” da robotaksi xidmətini istifadəyə verib. Şirkətlər avtonom nəqliyyat sifarişi bazarındakı fəaliyyətlərini genişləndirmək uğrunda rəqabət aparırlar.

“Zoox” bazar ertəsindən etibarən Las-Veqasda sərnişinlərdən gediş haqqı almağa başlayacağını açıqlayıb. Qiymətlərin digər taksi sifarişi platformalarının “komfort” kateqoriyasındakı tariflərə yaxın olacağı bildirilib. “Komfort” kateqoriyası standart xidmətlə müqayisədə, adətən, 20–40% yüksək ödəniş müqabilində daha yeni və geniş avtomobillər təqdim edir.

Şirkət digər şəhərlərdə ödənişli xidmətə nə zaman başlayacağı ilə bağlı hər hansı təqvim açıqlamayıb.

“Zoox” ABŞ Milli Avtomobil Yollarında Hərəkətin Təhlükəsizliyi Administrasiyasından (NHTSA) nəqliyyat vasitələrində insan idarəetmə vasitələrinin olmasını tələb edən federal qaydalardan azadolma alan ilk avtonom nəqliyyat sifarişi şirkəti olub. Bu qərar mövcud avtomobilləri avtonom nəqliyyat vasitələrinə çevirmək əvəzinə, robotaksiləri sıfırdan hazırlayan şirkətlər üçün mühüm dönüş nöqtəsi kimi qiymətləndirilir.

Lakin verilən icazə qarşıdakı iki il ərzində ildə maksimum 2 min 500 avtomobillə məhdudlaşdırılıb.