“Kontur Arxitektura Layihə-Sənaye” QSC 2025-ci ili 3 milyon 166,95 min manat xalis mənfəətlə başa vurub.

Marja.az şirkətin Maliyyə Hesabatlarının Beynəlxalq Standartlarına uyğun hazırlanmış konsolidə edilmiş maliyyə hesabatlarına istinadən xəbər verir ki, 2024-cü ildə QSC-nin xalis mənfəəti 1 milyon 62,8 min manat təşkil etmişdi.

Beləliklə, şirkətin xalis mənfəəti 2025-ci ildə 2 milyon 104,15 min manat və ya 198% artıb. Başqa sözlə, “Kontur Arxitektura Layihə-Sənaye”nin illik xalis mənfəəti təxminən 3 dəfə yüksəlib.

Gəlirləri 45 milyon manatı keçib

Ötən il şirkətin əsas əməliyyat gəlirləri 45 milyon 145,97 min manata çatıb. Bu göstərici 2024-cü ildə qeydə alınmış 19 milyon 777,91 min manatla müqayisədə 25 milyon 368,06 min manat və ya 128,3% çoxdur.

Satışın maya dəyəri üzrə xərclər 4 milyon 142,01 min manatdan 8 milyon 806,31 min manata yüksəlib. Xərclərdə 4 milyon 664,3 min manat və ya 112,6% artım qeydə alınıb.

Gəlirlərin maya dəyərindən daha sürətli artması nəticəsində şirkətin ümumi mənfəəti 15 milyon 635,91 min manatdan 36 milyon 339,66 min manata çatıb. Ümumi mənfəət 20 milyon 703,76 min manat və ya 132,4% artıb.

Şirkətin ümumi mənfəət marjası 2024-cü ildəki 79,1%-dən 2025-ci ildə 80,5%-ə yüksəlib.

Sair əməliyyat xərcləri 4 dəfədən çox artıb

Hesabat dövründə “Kontur Arxitektura Layihə-Sənaye”nin inzibati xərcləri 31,1% artaraq 11 milyon 936,9 min manat olub.

Ən kəskin artım sair əməliyyat xərclərində qeydə alınıb. Bu xərc maddəsi 4 milyon 240,36 min manatdan 18 milyon 857,64 min manata çatıb. Beləliklə, sair əməliyyat xərcləri 14 milyon 617,29 min manat və ya 344,7% artıb.

Amortizasiya xərcləri isə 70,9% yüksələrək 1 milyon 570,53 min manat təşkil edib.

Xərclərdəki ciddi artıma baxmayaraq, gəlirlərin daha sürətli böyüməsi şirkətin əməliyyat mənfəətini artırıb. QSC-nin əməliyyat mənfəəti 1 milyon 368,1 min manatdan 3 milyon 974,59 min manata çatıb. Artım 2 milyon 606,5 min manat və ya 190,5% təşkil edib.

Vergidən əvvəlki mənfəət 2 milyon 588,22 min manat və ya 188,9% artaraq 3 milyon 958,69 min manata yüksəlib. Mənfəət vergisi xərci isə 791,74 min manat olub.

Şirkətin xalis mənfəət marjası 2024-cü ildəki 5,4%-dən 2025-ci ildə 7%-ə yüksəlib.

Hər gün yeni vakansiyalar - AzVak.az-da

Aktivləri 25 milyon manatı ötüb

31 dekabr 2025-ci il tarixinə “Kontur Arxitektura Layihə-Sənaye”nin cəmi aktivləri 25 milyon 365,5 min manat təşkil edib. Şirkətin aktivləri bir il ərzində 2 milyon 873,02 min manat və ya 12,8% artıb.

Torpaq, tikili və avadanlıqların dəyəri 2 milyon 508,14 min manat və ya 48,2% artaraq 7 milyon 707,14 min manata çatıb. Uzunmüddətli debitor borcları dəyişməyərək 12 milyon manat səviyyəsində qalıb.

Şirkətin pul vəsaitləri 187,54 min manatdan 2 milyon 372,35 min manata yüksəlib. Artım 2 milyon 184,81 min manat və ya təxminən 12,7 dəfə olub.

Eyni zamanda, qısamüddətli debitor borcları 2 milyon 734,25 min manatdan 422,27 min manata düşüb. Azalma 2 milyon 311,99 min manat və ya 84,6% təşkil edib.

Öhdəliklər də artıb

Şirkətin cəmi öhdəlikləri 2025-ci ilin sonunda 9 milyon 257,78 min manat olub. Öhdəliklər illik müqayisədə 1 milyon 95,54 min manat və ya 13,4% artıb.

Uzunmüddətli öhdəliklər 6 milyon 650 min manatdan 7 milyon manata yüksəlib. Şirkətin uzunmüddətli kreditor borcları 1 milyon manat və ya 16,7% artaraq 7 milyon manata çatıb. Bununla yanaşı, 2024-cü ilin sonunda 650 min manat olan uzunmüddətli faiz xərci yaradan öhdəliklər 2025-ci ilin sonunda sıfıra enib.

Qısamüddətli öhdəliklər 745,54 min manat və ya 49,3% artaraq 2 milyon 257,78 min manat olub. Vergi və sair məcburi ödənişlər üzrə öhdəliklər 119,3% artaraq 1 milyon 325,28 min manata, qısamüddətli kreditor borcları isə 32,5% artaraq 850,81 min manata çatıb.

Qısamüddətli aktivlərin qısamüddətli öhdəliklərə nisbəti 2,11 dəfədən 1,49 dəfəyə düşüb. Bu, pul vəsaitlərinin əhəmiyyətli artmasına baxmayaraq, qısamüddətli öhdəliklərin daha sürətlə yüksəldiyini göstərir.

Kapitalı 16,1 milyon manata çatıb

“Kontur Arxitektura Layihə-Sənaye”nin cəmi kapitalı 1 milyon 777,48 min manat və ya 12,4% artaraq 16 milyon 107,72 min manata çatıb.

Şirkətin ödənilmiş nizamnamə kapitalı dəyişməyərək 322 min manat olub. Bölüşdürülməmiş mənfəət isə 12,7% artaraq 15 milyon 785,72 min manat təşkil edib.

Kapitalın aktivlərdə payı 63,5% olub. Bu göstəricinin 2024-cü ilin sonundakı 63,7%-ə yaxın qalması balansın maliyyələşmə strukturunun əsasən sabit olduğunu göstərir.

Hesabat “Kontur Arxitektura Layihə-Sənaye”nin 2025-ci ildə gəlirlərini iki dəfədən çox artırdığını və xalis mənfəətini təxminən üçqat yüksəltdiyini göstərir. Mənfəət marjalarının yaxşılaşması gəlir artımının maliyyə nəticələrinə müsbət təsir etdiyini təsdiqləyir.

Bununla belə, sair əməliyyat xərclərinin 4 dəfədən çox, qısamüddətli öhdəliklərin isə təxminən 50% artması xərc və likvidlik dinamikasının diqqətdə saxlanılmasını zəruri edir.

Qeyd edək ki, 24 mart 2000-ci ildə təsis edilmiş “Kontur Arxitektura Layihə-Sənaye” QSC-nin səhmlərinin 100%-i Rzayev Rizvan İlyas oğluna məxsusdur. Şirkət “ULT GRUP” MMC-nin də 100%-lik pay sahibidir. Törəmə şirkət 2024 və 2025-ci illərdə kommersiya fəaliyyəti göstərməyib.

“Kontur Arxitektura Layihə-Sənaye” QSC Torpaq işləri, yol tikintisi, dəmir yolu xətlərinin tikintis, nəqliyyat qurğularının layihələndirilməsi, dəmir yollarının layihələndirilməsi, mühəndis sistemlərinin layihələndirilməsi,elektrik təchizatı sistemlərinin layihələndirilməsi, nəzarət-ölçü cihazları, yanğın-mühafizə siqnalizasiya və avtomatik yanğınsöndürmə sistemlərinin layihələndirilməsi, layihələrin xüsusi bölmələrinin işlənilməsi, tikintinin təşkilinin layihələndirilməsi, smetaların tərtib edilməsi xidmətləri təklif edir.

İş elanları AzVak.az-da