Azərbaycan Respublikasının Prezidenti İlham Əliyevin 20–21 iyul 2026-cı il tarixlərində Almaniyaya rəsmi səfəri çərçivəsində, 21 iyul 2026-cı ildə Berlində Almaniya–Azərbaycan Biznes Şurasının yaradılması və fəaliyyətinə dair Birgə Bəyannamə imzalanıb. Sənədi Azərbaycan Respublikasının iqtisadiyyat naziri Mikayıl Cabbarov, AHK Azərbaycanın icraçı direktoru Nərgiz Vik və Alman İqtisadiyyatının Şərq Komitəsinin icraçı direktoru Mixael Harms imzalayıblar.

Alman-Azərbaycan Xarici Ticarət Palatasιnın yaydığı məlumata görə, yeni Biznes Şurası iki ölkənin dövlət qurumları, biznes assosiasiyaları və şirkətləri arasında daimi institusional dialoq platforması kimi fəaliyyət göstərəcək. Şura biznes mühitinə, bazara girişə, investisiyalara və sektorlar üzrə əməkdaşlığa dair məsələlərin müzakirəsinə, praktiki tövsiyələrin hazırlanmasına və konkret layihələrin irəli aparılmasına imkan yaradacaq.

Platformanın əsas məqsədlərinə aşağıdakılar daxildir:

- birgə təşəbbüslərin və investisiya layihələrinin müəyyənləşdirilməsi;

- potensial biznes tərəfdaşlarının tapılmasına dəstək göstərilməsi;

- bilik və texnologiya transferinin təşviqi;

- xüsusilə kiçik və orta müəssisələrin yeni bazarlara çıxışının dəstəklənməsi;

- biznes görüşlərinin və sektorlar üzrə dialoq formatlarının təşkili;

- tematik işçi qruplarının yaradılması;

- şirkətlərarası əlaqələndirmə və əməkdaşlıq mexanizmlərinin inkişaf etdirilməsi.

Qeyd edilib ki, Almaniya və Azərbaycan arasında əməkdaşlıq üçün enerji və yaşıl texnologiyalar, sənaye və maşınqayırma, nəqliyyat və logistika, rəqəmsallaşma, kənd təsərrüfatı və qida sənayesi, su idarəçiliyi, ağıllı infrastruktur, turizm və peşə təhsili prioritet sahələr sırasındadır. Almaniyanın texnologiya və mühəndislik təcrübəsi Azərbaycanın iqtisadi şaxələndirmə və sənaye modernləşməsi məqsədləri ilə geniş şəkildə uzlaşır.

Hazırda Azərbaycanda Almaniya kapitalı ilə 200-dən çox müəssisə fəaliyyət göstərir. Bu, ikitərəfli iqtisadi əlaqələrin möhkəm bazaya malik olduğunu göstərir və yeni Şuranın qarşılıqlı investisiyaların, birgə istehsalın, lokalizasiyanın və üçüncü bazarlara çıxış imkanlarının genişləndirilməsinə əlavə töhfə verməsi gözlənilir.

Azərbaycanın Avropa ilə Mərkəzi Asiya arasında, xüsusilə Orta Dəhliz boyunca strateji mövqeyi nəqliyyat, logistika və dayanıqlı təchizat zəncirləri sahəsində yeni əməkdaşlıq imkanları yaradır. Liman və dəmir yolu infrastrukturu, rəqəmsal logistika həlləri və tranzit vaxtının azaldılması Almaniya və Azərbaycan biznesi üçün praktiki əməkdaşlıq istiqamətləridir.

Orta Dəhliz 6 oktyabr 2026-cı ildə Bakıda keçiriləcək Almaniya–Azərbaycan Bağlantı Konfransının da əsas mövzusu olacaq. AHK Azərbaycanın Azərbaycan Hökuməti ilə əməkdaşlıq çərçivəsində təşkil etdiyi konfrans infrastruktur, nəqliyyat, logistika, yaşıl enerji və rəqəmsallaşma üzrə investisiyaların səfərbər edilməsinə həsr olunacaq və Biznes Şurasının yaratdığı institusional impulsu konkret layihə və tərəfdaşlıqlara çevirmək üçün növbəti mühüm platforma rolunu oynayacaq.

İş elanları AzVak.az-da