Marja.az “Azərenerji” ASC-nin 31 dekabr 2025-ci il tarixində bitən il üzrə konsolidə edilmiş maliyyə hesabatlarına istinadən xəbər verir ki, xalis mənfəətin azalması əsas əməliyyat fəaliyyətinin zəifləməsi ilə bağlı olmayıb. Əksinə, şirkətin həm gəlirləri, həm də əməliyyat mənfəəti artıb. Yekun nəticəni əsasən xarici valyuta əməliyyatları üzrə yaranan mənfi dönüş aşağı çəkib.

Gəliri 1,6 milyard manatı keçib

2025-ci ildə “Azərenerji” ASC-nin cəmi gəlirləri 1 milyard 628 milyon 791 min manat təşkil edib. Şirkətin gəlirləri əvvəlki illə müqayisədə 160 milyon 464 min manat və ya 10,9% artıb.

Elektrik enerjisinin satışından gəlirlər 112 milyon 728 min manat və ya 7,8% artaraq 1 milyard 564 milyon 204 min manata çatıb. Digər satışlardan əldə edilən gəlirlər isə 15 milyon 620 min manatdan 64 milyon 104 min manata yüksəlib. Beləliklə, bu istiqamətdə gəlirlər 48 milyon 484 min manat və ya 4,1 dəfə artıb.

Elektrik şəbəkəsinə qoşulma haqlarından gəlirlər isə 1 milyon 231 min manatdan 483 min manata düşüb.

Əməliyyat mənfəəti 35% artıb

“Azərenerji” ASC-nin əməliyyat xərcləri 2025-ci ildə 93 milyon 516 min manat və ya 7,3% artaraq 1 milyard 370 milyon 191 min manata yüksəlib. Xərclərin artım tempinin gəlirlərin artımından aşağı qalması şirkətin əsas fəaliyyət üzrə mənfəətini gücləndirib.

Şirkətin əməliyyat mənfəəti 66 milyon 948 min manat və ya 34,9% artaraq 191 milyon 652 min manatdan 258 milyon 600 min manata çatıb. Əməliyyat mənfəət marjası da 13,1%-dən 15,9%-ə yüksəlib.

Yanacaq xərcləri 0,9% azalaraq 679 milyon 894 min manat təşkil etsə də, köhnəlmə və amortizasiya xərcləri 12,9% artaraq 330 milyon 480 min manata, işçi xərcləri 8,3% artaraq 136 milyon 736 min manata çatıb.

Təmir və texniki xidmət xərcləri 27,8% artaraq 85 milyon 420 min manat, alınmış elektrik enerjisi üzrə xərclər isə 26,3% artaraq 46 milyon 7 min manat olub.

Valyuta əməliyyatlarında 116 milyon manatlıq mənfi dönüş

Şirkətin əməliyyat mənfəəti artsa da, xarici valyuta əməliyyatlarının nəticəsi xalis mənfəəti ciddi şəkildə aşağı çəkib.

2024-cü ildə “Azərenerji” ASC xarici valyuta mübadiləsindən 130 milyon 198 min manat gəlir və 67 milyon 686 min manat zərər qeydə almışdı. Nəticədə valyuta əməliyyatları üzrə 62 milyon 512 min manat xalis müsbət nəticə yaranmışdı.

2025-ci ildə isə valyuta gəlirləri 66% azalaraq 44 milyon 296 min manata düşüb, valyuta zərəri 45,2% artaraq 98 milyon 265 min manata yüksəlib. Beləliklə, şirkət valyuta əməliyyatları üzrə 53 milyon 969 min manat xalis mənfi nəticə ilə üzləşib.

İllik müqayisədə valyuta əməliyyatlarının maliyyə nəticəsinə təsiri 116 milyon 481 min manat pisləşib. Bu dəyişiklik əməliyyat mənfəətindəki güclü artımın xalis mənfəətə ötürülməsinin qarşısını alıb.

“Azərenerji” ASC-nin vergidən əvvəlki mənfəəti 44 milyon 948 min manat və ya 19,3% azalaraq 187 milyon 391 min manat olub. Mənfəət vergisi xərci isə 1,1% artaraq 59 milyon 146 min manata çatıb. Nəticədə effektiv vergi yükü 25,2%-dən 31,6%-ə yüksəlib.

Şirkətin xalis mənfəət marjası 11,8%-dən 7,9%-ə geriləyib. İlin cəmi məcmu gəliri isə 26,3% azalaraq 127 milyon 868 min manat təşkil edib.

İş elanları AzVak.az-da

Aktivlər yarım milyard manatdan çox artıb

2025-ci ilin sonunda “Azərenerji” ASC-nin cəmi aktivləri 6 milyard 431 milyon 244 min manata çatıb. Aktivlər bir il ərzində 518 milyon 992 min manat və ya 8,8% artıb.

Əmlak, tikili və avadanlıqların dəyəri 263 milyon 987 min manat və ya 5,4% artaraq 5 milyard 119 milyon 462 min manat olub. Bu aktivlərin alınması üçün verilmiş avanslar isə 2,6 dəfə artaraq 251 milyon 182 min manata yüksəlib. Sözügedən dinamika şirkətin əsas fondlara və yeni layihələrə sərmayə qoyuluşunu genişləndirdiyinə işarə edir.

Uzunmüddətli aktivlər 8,3% artaraq 5 milyard 462 milyon 502 min manata çatıb və cəmi aktivlərin təxminən 85%-ni təşkil edib.

“Azərenerji” ASC-nin qısamüddətli aktivləri 11,5% artaraq 968 milyon 742 min manata yüksəlib. Lakin bu artım əsasən əvəzləşdirilə bilən ƏDV hesabına formalaşıb. Sözügedən göstərici 144 milyon 622 min manat və ya 23,3% artaraq 765 milyon 74 min manata çatıb və qısamüddətli aktivlərin 79%-ni təşkil edib.

Ticarət və digər debitor borcları 35,2% artaraq 55 milyon 622 min manata yüksəlib. Nağd pul və pul vəsaitlərinin ekvivalentləri isə 60 milyon 280 min manat və ya 48,5% azalaraq 63 milyon 998 min manata düşüb.

Öhdəliklərdə ağırlıq qısamüddətli borclara keçib

“Azərenerji” ASC-nin cəmi öhdəlikləri 277 milyon 684 min manat və ya 9,8% artaraq 3 milyard 98 milyon 371 min manata çatıb.

Uzunmüddətli öhdəliklər 2,8% azalaraq 1 milyard 437 milyon 912 min manata düşsə də, qısamüddətli öhdəliklər 318 milyon 793 min manat və ya 23,8% artaraq 1 milyard 660 milyon 459 min manata yüksəlib.

Şirkətin ümumi kredit və borc vəsaitləri 7,5% azalaraq 1 milyard 155 milyon 92 min manata düşüb. Bununla belə, uzunmüddətli borclar 17,5% azaldığı halda, qısamüddətli borclar 9,5% artıb. Qısamüddətli borcların ümumi borclanmadakı payı 37,1%-dən 44%-ə yüksəlib.

Mənfəət vergisindən başqa digər vergi öhdəlikləri 54,2% artaraq 532 milyon 589 min manata, qısamüddətli ticarət və digər kreditor borcları isə 12,5% artaraq 495 milyon 636 min manata çatıb.

Likvidlik göstəricisi zəifləyib

Balans rəqəmlərinə əsasən, qısamüddətli aktivlərin qısamüddətli öhdəliklərə nisbəti 64,7%-dən 58,3%-ə düşüb. Dövriyyə kapitalı çatışmazlığı isə 473 milyon 165 min manatdan 691 milyon 717 min manata yüksəlib.

Nağd vəsaitlərin təxminən yarıbayarı azalması, qısamüddətli öhdəliklərin sürətlə artması və qısamüddətli aktivlərin böyük hissəsinin əvəzləşdirilə bilən ƏDV-dən ibarət olması likvidliyin idarə edilməsinə diqqətin artırılmasını tələb edən siqnallardır.

Kapital 3,3 milyard manatı keçib

2025-ci ilin sonunda “Azərenerji” ASC-nin cəmi kapitalı 241 milyon 308 min manat və ya 7,8% artaraq 3 milyard 332 milyon 873 min manata çatıb.

Nizamnamə kapitalı dəyişməyərək 1 milyard 760 milyon 495 min manat qalıb. Əlavə ödənilmiş kapital 131 milyon 987 min manat artaraq 3 milyard 288 milyon 378 min manata yüksəlib. Yığılmış zərər isə 109 milyon 698 min manat azalaraq 1 milyard 710 milyon 859 min manata düşüb.

Kapitalın aktivlərdəki payı 52,3%-dən 51,8%-ə enib. Buna baxmayaraq, aktivlərin yarıdan çoxunun kapital hesabına maliyyələşdirilməsi şirkətin balansında böyük kapital bazasının qorunduğunu göstərir.

“Azərenerji” ASC-nin 2025-ci il hesabatında iki fərqli mənzərə diqqət çəkir. Şirkətin əsas əməliyyat fəaliyyəti güclənib: gəlirlər ikirəqəmli templə, əməliyyat mənfəəti isə təxminən 35% artıb. Aktivlərin və kapitalın böyüməsi, həmçinin ümumi borclanmanın azalması da müsbət məqamlardır.

Digər tərəfdən, valyuta əməliyyatlarında yaranan 116 milyon manatdan çox mənfi dönüş xalis mənfəəti 26% azaldıb. Nağd vəsaitlərin kəskin azalması, qısamüddətli öhdəliklərin sürətli artması və borclanmanın müddət strukturunda qısamüddətli hissənin yüksəlməsi isə hesabatın əsas risk siqnallarıdır.

“Azərenerji” Açıq Səhmdar Cəmiyyəti ölkənin elektroenergetika sisteminin fəaliyyətini təmin etməklə, elektrik enerjisinin istehsalı və ötürülməsinin, vahid mərkəzdən idarə olunan elektrik stansiyalarının, yarımstansiyaların, sistemtəşkiledici yüksək gərginlikli – 110, 220, 330, 500 kilovoltuq elektrik verilişi xətlərinin və onların dispetçer idarəetmə vasitələrinin koordinasiyasını həyata keçirir. Səhmləri dövlətə məxsusdur.

“Azərenerji” ASC-nin prezidenti Baba Rzayevdir.

Hər gün yeni vakansiyalar - AzVak.az-da