“Azərbaycan Beynəlxalq Bankı” ASC-nin (ABB) müştərilərə verdiyi kreditlərin ümumi məbləği 2026-cı ilin iyun ayının sonunda 7 milyard 601,97 milyon manat təşkil edib.

Marja.az ABB-nin maliyyə hesabatına istinadən xəbər verir ki, ötən ilin sonunda Bankın ümumi kredit portfeli 7 milyard 79,98 milyon manat təşkil etmişdi. Beləliklə, hesabat dövründə portfel 521,98 milyon manat və ya 7,4% böyüyüb.

İpoteka kreditlərində ikirəqəmli artım

ABB-nin kredit portfelində ən yüksək artım tempi daşınmaz əmlak kreditləri üzrə qeydə alınıb. Bu istiqamət üzrə kreditlərin məbləği 226,79 milyon manat və ya 14,6% artaraq 1 milyard 777,54 milyon manata çatıb. Ötən ilin sonunda bu göstərici 1 milyard 550,75 milyon manat idi.

İpoteka kreditləri eyni zamanda kredit portfelində ən böyük mütləq artımı təmin edən istiqamət olub. Bu kreditlərin ümumi portfeldə payı 21,9%-dən 23,4%-ə yüksəlib.

İstehlak kreditləri 2,16 milyard manata yaxınlaşıb

ABB-nin istehlak kreditləri hesabat dövründə 175,45 milyon manat və ya 8,8% artaraq 2 milyard 159,69 milyon manat təşkil edib. Ötən ilin sonunda Bankın istehlak kreditləri portfeli 1 milyard 984,24 milyon manat səviyyəsində idi.

İstehlak kreditlərinin ABB-nin ümumi kredit portfelində payı 28,4% təşkil edib.

Biznes kreditləri portfelin əsas hissəsi olaraq qalır

ABB-nin biznes kreditlərinin həcmi 119,74 milyon manat və ya 3,4% artaraq 3 milyard 664,73 milyon manata çatıb. Müqayisə üçün, ötən ilin sonunda biznes kreditləri 3 milyard 544,99 milyon manat təşkil etmişdi. Artım tempinin digər kredit istiqamətləri ilə müqayisədə aşağı olmasına baxmayaraq, biznes kreditləri ABB-nin kredit portfelində 48,2%-lik payla ən böyük seqment olaraq qalır.

Bank BTB-nin aktiv və öhdəliklərinin ABB-yə ötürülməsi prosesi başa çatıb

BTB Bank-nın aktiv və öhdəliklərinin ötürülməsi üzrə prosesin başa çatması nəticəsində ABB müvafiq aktiv və öhdəlikləri öz üzərinə götürərək müştərilər qarşısında öhdəliklərin icrasını və bank xidmətlərinin fasiləsiz göstərilməsini təmin edib.

Ehtiyatlar 638 milyon manatı keçib

Mümkün kredit zərərləri üçün yaradılmış məqsədli ehtiyatların məbləği 73,20 milyon manat və ya 13% artaraq 638,08 milyon manata yüksəlib. Ötən ilin sonunda bu göstərici 564,88 milyon manat idi.

Ehtiyatlar çıxıldıqdan sonra ABB-nin müştərilərə verilmiş xalis kreditlərinin məbləği 6 milyard 963,88 milyon manat təşkil edib. Xalis kredit portfeli ötən ilin sonu ilə müqayisədə 448,78 milyon manat və ya 6,9% artıb.

İş elanları AzVak.az-da