“PAŞA Bank” ASC 2026-cı ilin ilk yarısını 67 milyon 747 min manat xalis mənfəətlə başa vurub. “PAŞA Bank” 2025-ci ilin eyni dövründə 91 milyon 585 min manat xalis mənfəət əldə etmişdi. Beləliklə, Bankın xalis mənfəəti 23 milyon 838 min manat və ya 26 faiz azalıb.

Faiz gəlirlərində 33 milyon manata yaxın azalma

Marja.az Bankın maliyyə hesabatlarına istinadən xəbər verir ki, 2026-cı ilin yanvar–iyun aylarında “PAŞA Bank”ın faiz gəlirləri 32 milyon 774 min manat və ya 12,7 faiz azalaraq 224 milyon 815 min manata düşüb.

Müştərilərə verilmiş kreditlərdən faiz gəlirləri 18 milyon 133 min manat və ya 12,7 faiz artaraq 160 milyon 834 min manata yüksəlib.

Lakin ticarət və investisiya qiymətli kağızlarından faiz gəlirləri 37 milyon 420 min manat və ya 59,6 faiz azalaraq 25 milyon 316 min manata, banklardakı depozitlərdən faiz gəlirləri isə 38 faiz azalaraq 23 milyon 301 min manata düşüb.

Depozitlər üzrə faiz xərcləri kəskin artıb

“PAŞA Bank”ın faiz xərcləri 23 milyon 277 min manat və ya 26,8 faiz artaraq 110 milyon 24 min manata çatıb. Faiz xərclərinin əsas hissəsini təşkil edən depozitlər üzrə ödənişlər 25 milyon 614 min manat və ya 33,8 faiz artaraq 101 milyon 422 min manat olub.

Bankın təqdim etdiyi hesabatda xalis faiz gəliri 173 milyon 704 min manat göstərilib. Bu, illik müqayisədə 6 milyon 190 min manat və ya 3,7 faiz çoxdur. Bununla belə, cədvəldə göstərilən faiz gəlirləri, faiz xərcləri və ehtiyat məbləğləri açıqlanan xalis faiz gəliri ilə arifmetik baxımdan uzlaşmır.

Qeyri-faiz gəlirləri 22 faiz azalıb

Bankın qeyri-faiz gəlirləri 32 milyon 86 min manat və ya 21,9 faiz azalaraq 114 milyon 140 min manata düşüb.

Haqq və komissiya gəlirləri 4,7 faiz artaraq 88 milyon 95 min manata yüksəlsə də, xarici valyuta əməliyyatlarından gəlir 19,9 faiz azalaraq 17 milyon 751 min manat olub.

Digər gəlirlər isə 39 milyon 667 min manatdan 8 milyon 289 min manata düşərək 79,1 faiz azalıb.

Əməliyyat mənfəəti cüzi azalıb

“PAŞA Bank”ın qeyri-faiz xərcləri 22 milyon 661 min manat və ya 12 faiz azalaraq 166 milyon 849 min manat təşkil edib. Əməkhaqqı və digər kompensasiya xərcləri 13,1 faiz artaraq 56 milyon 708 min manata yüksəlib. Digər xərclər isə 17,9 faiz azalaraq 100 milyon 409 min manata düşüb.

Bankın əməliyyat mənfəəti 3 milyon 235 min manat və ya 2,6 faiz azalaraq 120 milyon 996 min manat olub.

Ehtiyat ayırmaları mənfəəti aşağı çəkib

Mümkün zərərlər üçün yaradılmış məqsədli ehtiyatlar 9 milyon 91 min manatdan 32 milyon 873 min manata yüksəlib. Beləliklə, ehtiyat ayırmaları 23 milyon 782 min manat və ya 3,6 dəfə artıb.

Nəticədə mənfəət vergisindən əvvəlki mənfəət 27 milyon 17 min manat və ya 23,5 faiz azalaraq 88 milyon 123 min manata düşüb. Bank hesabat dövründə 20 milyon 376 min manat mənfəət vergisi hesablayıb.

“PAŞA Bank”ın xalis mənfəətinin azalmasında əsas rol əməliyyat fəaliyyətindəki geriləmədən daha çox ehtiyat xərclərinin kəskin artmasına məxsusdur. Əməliyyat mənfəəti cəmi 2,6 faiz azaldığı halda, mümkün zərərlər üzrə ayırmaların 3,6 dəfə yüksəlməsi yekun nəticəyə ciddi təzyiq göstərib.

Müştərilərə verilmiş kreditlərdən faiz gəlirlərinin artması müsbət göstəricidir. Lakin qiymətli kağızlardan və banklardakı depozitlərdən əldə olunan gəlirlərin azalması, eyni zamanda depozitlər üzrə faiz xərclərinin 34 faizə yaxın yüksəlməsi Bankın gəlir və maliyyələşmə strukturunda təzyiqin artdığını göstərir.

Ümumilikdə, “PAŞA Bank” yüksək əməliyyat mənfəətini qoruyub, lakin maliyyələşmə xərcləri və kredit riskləri üzrə ehtiyatların artması xalis gəlirliliyi zəiflədib.

PAŞA Bankın aktivləri 555 milyon manat artıb

“PAŞA Bank” ASC-nin cəmi aktivləri 30 iyun 2026-cı il tarixində 9 milyard 522 milyon 354 min manat təşkil edib. Aktivlər 2025-ci ilin eyni tarixi ilə müqayisədə 555 milyon 54 min manat və ya 6,2 faiz artıb. Bankın aktivləri ötən ilin iyun ayının sonunda 8 milyard 967 milyon 300 min manat idi.

Kredit portfeli 10,5 faiz böyüyüb

“PAŞA Bank”ın müştərilərə verdiyi kreditlərin ümumi məbləği 343 milyon 925 min manat və ya 10,5 faiz artaraq 3 milyard 624 milyon 791 min manata çatıb.

Biznes kreditləri 386 milyon 374 min manat və ya 13,2 faiz artaraq 3 milyard 309 milyon 885 min manat təşkil edib. Biznes kreditlərinin ümumi kredit portfelində payı 89,1 faizdən 91,3 faizə yüksəlib.

Daşınmaz əmlak kreditləri 22 milyon 420 min manat və ya 9,7 faiz artaraq 254 milyon 548 min manata çatıb. İstehlak kreditləri isə 64 milyon 869 min manat və ya 51,8 faiz azalaraq 60 milyon 358 min manata düşüb.

Kreditlər üzrə yaradılmış məqsədli ehtiyatlar 53 milyon 820 min manat və ya 66,8 faiz artaraq 134 milyon 347 min manat olub. Ehtiyatlar çıxıldıqdan sonra xalis kredit portfeli 290 milyon 104 min manat və ya 9,1 faiz artaraq 3 milyard 490 milyon 443 min manata yüksəlib.

Likvid vəsaitlərin strukturu dəyişib

Bankın nağd pul vəsaitləri 198 milyon 677 min manat və ya 15 faiz azalaraq 1 milyard 128 milyon 195 min manata, ticarət və investisiya qiymətli kağızları isə 865 milyon 198 min manat və ya 35,6 faiz azalaraq 1 milyard 567 milyon 13 min manata düşüb.

Bunun əvəzində banklar və digər maliyyə institutlarındakı depozitlər 1 milyard 301 milyon 642 min manat və ya 85,5 faiz artaraq 2 milyard 824 milyon 577 min manata çatıb.

Beləliklə, Bankın likvid aktivləri artsa da, onların strukturunda qiymətli kağızlardan və nağd vəsaitlərdən bank depozitlərinə doğru əhəmiyyətli dəyişiklik baş verib.

Depozitlər 7,2 milyard manatı ötüb

“PAŞA Bank”ın depozit portfeli 508 milyon 311 min manat və ya 7,6 faiz artaraq 7 milyard 216 milyon 161 min manata çatıb.

Hüquqi şəxslərin depozitləri 420 milyon 276 min manat və ya 8,5 faiz artaraq 5 milyard 362 milyon 111 min manat, fiziki şəxslərin depozitləri isə 88 milyon 35 min manat və ya 5 faiz artaraq 1 milyard 854 milyon 50 min manat olub.

Bankın kredit təşkilatları və digər maliyyə institutları qarşısındakı öhdəlikləri 15,7 faiz azalaraq 845 milyon 179 min manata düşüb. Eyni zamanda, REPO əməliyyatları üzrə 162 milyon 311 min manat öhdəlik yaranıb.

Cəmi öhdəliklər 587 milyon 497 min manat və ya 7,3 faiz artaraq 8 milyard 600 milyon 708 min manata yüksəlib.

Kapital 32 milyon manat azalıb

“PAŞA Bank”ın cəmi kapitalı illik müqayisədə 32 milyon 443 min manat və ya 3,4 faiz azalaraq 921 milyon 646 min manat olub.

Dövriyyəyə buraxılmış adi səhmlərin həcmi 50 milyon 673 min manat və ya 14,3 faiz artaraq 405 milyon 185 min manata yüksəlib. Bölüşdürülməmiş mənfəət isə 70 milyon 708 min manat və ya 13,2 faiz azalaraq 465 milyon 490 min manata düşüb.

Nəticədə kapitalın aktivlərə nisbəti 2025-ci ilin iyunundakı 10,6 faizdən 9,7 faizə geriləyib.

“PAŞA Bank”ın balansındakı böyümə əsasən biznes kreditlərinin, hüquqi şəxslərin depozitlərinin və banklardakı depozitlərin artması hesabına təmin olunub. Biznes kreditlərinin portfeldə 91 faizdən yüksək paya çatması Bankın korporativ maliyyələşmə istiqamətini daha da gücləndirdiyini göstərir.