Nazirlər Kabineti Bakı Şəhər İcra Hakimiyyəti başçısının tabeliyində olan bir sıra müəssisələrin fəaliyyətinin təkmilləşdirilməsi haqqında qərar qəbul edib.

Bununla bağlı qərarı Baş nazir Əli Əsədov imzalayıb.

Qərara əsasən, Bakı Şəhər İcra Hakimiyyəti başçısının tabeliyində fəaliyyət göstərəcək Mənzil-kommunal Təsərrüfatı, Lift Təsərrüfatı, İşıqlandırma Təsərrüfatı və Yaşıllaşdırma Təsərrüfatı müəssisələrinin nümunəvi strukturu və ştat vahidləri təsdiqlənib.

Sənədə əsasən, bu müəssisələrin nizamnamə kapitalı Bakı Şəhər İcra Hakimiyyətinin tabeliyində müvafiq sahələr üzrə xidmət göstərən mövcud qurumların əmlakı hesabına formalaşdırılacaq.

Qərara görə, Bakı Şəhər İcra Hakimiyyəti üç ay müddətində tabeliyində olan mənzil-kommunal, lift, işıqlandırma və yaşıllaşdırma təsərrüfatı sahələrində fəaliyyət göstərən qurumların bazasında məhdud məsuliyyətli cəmiyyət (MMC) statusunda müvafiq müəssisələrin yaradılması ilə bağlı təkliflərini Nazirlər Kabinetinə təqdim etməlidir. Həmçinin müəssisələrin nizamnamələri hazırlanmalı, təsdiq olunması üçün zəruri tədbirlər görülməli, struktur və ştat vahidləri təsdiqlənərək Nazirlər Kabinetinə məlumat verilməlidir.

Bundan əlavə, Bakı Şəhər İcra Hakimiyyəti yeni yaradılacaq müəssisələrin işçilərinin aylıq vəzifə maaşlarını dövlət büdcəsindən maliyyələşdirilən sahələr üçün müəyyən edilmiş Vahid Tarif Cədvəlinə uyğun müəyyən edəcək.

Qərara əsasən, Bakı Şəhər İcra Hakimiyyəti İqtisadiyyat Nazirliyi yanında Əmlak Məsələləri Dövlət Xidməti, Ekologiya və Təbii Sərvətlər Nazirliyi və digər aidiyyəti dövlət qurumları ilə birlikdə Kosmik Agentliyin ("Azərkosmos") informasiya ehtiyatlarının və sistemlərinin imkanlarından istifadə etməklə Bakı şəhərində müntəzəm sanitar təmizlik aparılan ərazilərin və xidmət göstərilən yaşıllıq sahələrinin həcmini müəyyən etməli, əldə olunan məlumatları Maliyyə Nazirliyinə təqdim etməlidir.

Sənəddə həmçinin qeyd olunub ki, qərara dəyişikliklər Prezidentin 6 oktyabr 2023-cü il tarixli fərmanı ilə təsdiq edilmiş "İcra hakimiyyəti orqanlarının normativ hüquqi aktlarının layihələrinin hazırlanması, razılaşdırılması, qəbul edilməsi və dərc edilməsi qaydası haqqında Əsasnamə"yə uyğun edilə bilər.

İş elanları AzVak.az-da