ABŞ Prezidenti Donald Tramp və NATO-nun Baş katibi Mark Rutte Ankaradakı NATO Liderlər Sammitində mətbuat konfransında çıxış ediblər.

Marja xəbər verir ki, Tramp çıxışında İspaniya ilə bütün ticarət əlaqələrini kəsməyi düşündüyünü bildirib.

İspaniyanın pis NATO tərəfdaşı olduğunu deyən Tramp bildirib: “Nə iştirak edirlər, nə də pul ödəyirlər. Bütün ticarəti kəsməyi düşünürəm. Artıq onlarla ticarət etməyimizə ehtiyac yoxdur”.

Bir jurnalistin İranla bağlı sualını cavablandıran Tramp deyib: “Məncə, İranla atəşkəs başa çatıb. Onlar yalançıdır”.

İranla atəşkəsin bitdiyini bildirən Tramp əlavə edib: “Mənə görə, anlaşma memorandumu da artıq qüvvədən düşüb. İranı xəstə insanlar idarə edir. Onlar həqiqətən dələduzluq edirlər. Biz bir razılaşma əldə etdik, nüvə silahı olmayacağını dedilər, sonra isə belə bir məsələni müzakirə etmədiklərini bildirdilər. Mənim fikrimi soruşsanız, məncə, hər şey bitib”.

“Türkiyə F-35-ləri alacaq”

Prezident Rəcəb Tayyib Ərdoğanla bağlı da fikirlərini bildirən Tramp deyib: “Ərdoğanı çox sevirəm. Netanyahunu da çox sevirəm. Türkiyə F-35-ləri alacaq. Türkiyənin çox yeni və güclü ordusu var. Bunu Netanyahuya da dedim. Mən olmasaydım, bəlkə də Türkiyə İran müharibəsinə qarşı tərəfdə qoşulardı. Netanyahuya dedim ki, mən olduğum üçün Türkiyə neytral qaldı”.

Trampın açıqlamalarından digər əsas məqamlar belədir:

“NATO-dan razı deyiləm. İran məsələsində bizə kömək etmədilər, amma bizim köməyə ehtiyacımız yoxdur. Mən sadəcə bizə kömək edib-etməyəcəklərini test etdim.

Almaniya, Fransa və İngiltərə ilə görüşdüm, İspaniya ilə görüşmədim. Onlar dəhşətli tərəfdaşdır. Səfərlər, ticarət daxil olmaqla onlarla bütün əlaqələrimizi kəsdik. İspaniya öz payını da ödəmir, heç nədə iştirak etmir. Daim onları qorumağa davam edə bilmərik. Pis insanlardır, onlarla heç danışmıram da”.

Rutte: İran məsələsində sizin yanınızdayam

Trampın açıqlamalarından sonra Rutte bunları bildirib:

“İran məsələsində sizin yanınızdayam. İranın nüvə silahından təmizlənməsini dəstəkləyirəm. Bu, İsrail üçün də çox vacib idi.

İspaniya da əslində müdafiə xərclərini 2 faiz səviyyəsinə çatdıraraq müsbət addım atıb.

Qrenlandiya ilə bağlı Davosda bir razılaşma əldə etdiniz, bu razılaşmanın icrasını təmin etməyə çalışacağam”.

İş elanları AzVak.az-da