ABŞ Prezidenti Donald Tramp Ankarada başlayacaq NATO Sammitində Rusiya ilə Ukrayna arasındakı müharibənin başa çatdırılmasına yönəlmiş məsələləri NATO-nun gündəliyinə çıxaracağını bildirib və tərəflərin razılaşmaya yaxın olduğunu söyləyib.

Marja xəbər verir ki, Tramp Ağ Evdə jurnalistlərin Rusiya-Ukrayna müharibəsi və İranla aparılan danışıqlarla bağlı suallarını cavablandırıb.

Rusiya ilə Ukrayna arasındakı müharibəyə dair qiymətləndirmələr aparan Tramp “NATO-ya gedəcəyik, bu məsələni NATO-nun gündəliyinə çıxaracağam və düşünürəm ki, bunu bacaracağıq”, - deyib.

Ukraynadakı müharibənin başa çatmasına çox yaxın olunduğunu düşündüyünü bildirən Tramp “Ukraynadakı müharibəni sona çatdırmağa çox yaxın olduğumuzu düşünürəm. Həm Rusiya, həm də Ukrayna liderləri razılaşma əldə etmək istəyirlər”, - deyə bildirib.

Tramp Rusiya Prezidenti Vladimir Putin və Ukrayna Prezidenti Volodimir Zelenskinin müharibənin başa çatmasını istədiyini qeyd edib.

Müharibədə ön plana çıxan pilotsuz uçuş aparatlarının əhəmiyyətinə də toxunan Tramp “Dronların bu qədər böyük amilə çevriləcəyini kim düşünərdi? Onlar öldürmə maşınlarıdır. Bu, inanılmazdır. Ağacın arxasında gizlənirsən, o isə gəlib səni tapır. Mən görmək istəmədiyim səhnələr görmüşəm və sizin də bunları görməyinizi istəmirəm”, - ifadələrini işlədib.

“İran ya razılaşma əldə edəcək, ya da işi bitirəcəyik”

İranla aparılan danışıqlara da toxunan Tramp müzakirələrin müsbət istiqamətdə irəlilədiyini, lakin medianın bu prosesə kifayət qədər maraq göstərmədiyini iddia edib.

ABŞ ordusunun gücündən İrana qarşı “çox haqlı səbəblərlə” istifadə etdiklərini irəli sürən Tramp “Çünki İran heç vaxt nüvə silahına sahib ola bilməz. Buna heç vaxt icazə verilə bilməz”, - deyib.

Tramp İranın nüvə zənginləşdirmə fəaliyyəti ilə bağlı güzəştə getdiyini və zənginləşdirilmiş nüvə materialının təhvil veriləcəyini iddia edib.

Hər bir halda qalib gələcəklərini, ya razılaşma əldə edəcəklərini, ya da işi bitirəcəklərini bildirən Tramp razılaşma yolu ilə həlli üstün tutduğunu və 91 milyon İran vətəndaşının müharibədən təsirlənməsini istəmədiyini söyləyib.

Hörmüz Boğazı ilə bağlı qiymətləndirmələr də aparan Tramp İranla bu məsələdə problemlər yaşadıqlarını qeyd edərək, “Hörmüz Boğazı böyük pul maşınıdır. Onun adını əvvəllər çoxları eşitməmişdi”, - ifadələrini işlədib.

İş elanları AzVak.az-da