Azercell Telekom Müdafiə Nazirliyi ilə əməkdaşlıq çərçivəsində hərbi xidmətə çağırılan şəxslər üçün “Əsgərcell” adlı xüsusi təklif təqdim edir.

Marja.az xəbər verir ki, yeni təklifin məqsədi əsgərlərin xidmət müddəti ərzində ailə üzvləri və yaxınları ilə təhlükəsiz, etibarlı və nəzarətli şəkildə əlaqə saxlamasına imkan yaratmaqdır.

“Əsgərcell” paketi smart-funksiyaları olmayan xüsusi mobil telefon, yeni Azercell nömrəsi və 1 manat ilkin balansdan ibarətdir. Təhlükəsizlik tələblərinə uyğun olaraq cihazda internet və digər əlavə funksiyalar deaktiv edilib. Əsgərlər yalnız səsli zəng xidmətindən istifadə edə biləcəklər.

Təklif çərçivəsində hərbi xidmət keçən şəxs əvvəlcədən təsdiqlənmiş 5 nömrə seçərək müəyyən edilmiş vaxtlarda ailə üzvləri və yaxınları ilə əlaqə saxlaya biləcək. Bundan başqa, təcili hallar üçün xüsusi nömrəyə zəng etmək imkanı da nəzərdə tutulub.

Təklifin dəyəri 88 manatdır

Tarif şərtlərinə əsasən, şəbəkədaxili zənglərin 1 dəqiqəsi 0,03 manat, şəbəkəxarici zənglərin 1 dəqiqəsi isə 0,04 manat təşkil edir. Mesaj və internet xidmətləri bağlı olacaq. Nömrə və tarifdən istifadə müddəti 18 ay müəyyən edilib.

Xidmət yalnız müəyyən olunmuş saatlarda aktiv olacaq. Bazar ertəsi–cümə günləri saat 18:00-dan 21:00-dək, şənbə günləri saat 15:00-dan 22:00-dək, bazar günləri isə saat 10:00-dan 21:00-dək zəng xidmətindən istifadə mümkün olacaq. Qeyri-iş saatlarında xidmət göstərilməyəcək.

Əsgər təklifə hərbi hissələrdə xüsusi ayrılmış ərazidə fəaliyyət göstərən müvəqqəti satış məntəqəsinə yaxınlaşaraq və şəxsiyyət vəsiqəsinin surətini təqdim etməklə qoşula bilər.

Məlumata görə, 18 ay ərzində balansın artırılıb-artırılmamasından asılı olmayaraq xətt açıq qalacaq.

“Əsgərcell”in əsas üstünlükləri sırasında xidmət müddəti ərzində ailə və yaxınlarla etibarlı əlaqə imkanı, sadə istifadə olunan mobil telefon, təhlükəsizlik tələblərinə uyğun rabitə həlli və hərbi xidmət şəraitinə uyğun hazırlanmış xüsusi kommunikasiya modeli yer alır.

Ətraflı: https://www.azercell.com/az/personal/esgercell.html

Bu təşəbbüs hərbi xidmət dövründə əsgərlərin ailələri ilə rabitə imkanlarını daha əlçatan edir, eyni zamanda informasiya təhlükəsizliyi tələblərinə uyğun nəzarətli əlaqə mühiti yaradır.

Hər gün yeni vakansiyalar - AzVak.az-da

Əlavə məlumat:

Telefonun modeli: A-CELL Z1

Təklif nə vaxtdan etibarən qüvvəyə minəcək?

Əsgərcell təklifi 1 iyul 2026-cı il tarixindən etibarən qoşulma üçün əlçatan olacaq.

Bu təklifdən neçə dəfə yararlanmaq olar?

Hər bir əsgər təklifdən cəmi 1 dəfə yararlana bilər.

Nömrəni digər cihazda istifadə etmək mümkündür?

Nömrəni digər cihazda istifadə etmək olar.

Cihazda digər nömrədən istifadə etmək olar?

Cihazda digər nömrədən istifadə mümkün deyil.

1.5 ildən sonra cihazdan istifadə etmək mümkün olacaq?

1.5 ildən sonra cihazdan istifadə mümkün deyil, çünki cihazda digər nömrə çalışmır.

Nömrənin istifadə müddəti bitdikdən sonra ondan istifadə mümkündür?

Etibarlılıq müddəti bitdikdən sonra nömrədən istifadə mümkün deyil.

Balansı necə artırmaq olar?

Balansı bank kartları və ya xüsusi terminallar (eManat, MilliÖn və s.) vasitəsilə artırmaq mümkündür.