Cənubi Koreyada quş qripi səbəbindən istehsalın azalması yumurta qiymətlərinin sürətlə bahalaşmasına səbəb olub. Qiymət artımını nəzarətə almaq üçün hökumət idxal qərarı verib.

Marja.az xəbər verir ki, Cənubi Koreya iyulun sonuna qədər ABŞ və Taylanddan 21 milyon 120 min ədəd yumurta idxal edəcək.

Qlobal miqyasda iqlim riskləri, heyvan xəstəlikləri və təchizat zəncirində yaranan pozulmalar ərzaq qiymətlərinə təzyiqi artırdığı bir vaxtda Seul administrasiyası daxili bazarı dəstəkləmək üçün yeni addım atıb.

Cənubi Koreya hökuməti yumurta qiymətlərindəki artımı məhdudlaşdırmaq məqsədilə iyulun sonuna qədər yerli marketlərə həftəlik təxminən 4 milyon 500 min ədəd yumurta çıxarmağı planlaşdırır.

Cənubi Koreyanın Kənd Təsərrüfatı, Ərzaq və Kənd İşləri Nazirliyinin açıqlamasına görə, ABŞ və Taylanddan idxal olunacaq yumurtalar daxili bazarda təklifin artırılmasına yönəldiləcək. Məqsəd qış aylarında qeydə alınan quş qripi epidemiyalarından sonra azalan təklifi dəstəkləmək və istehlak qiymətlərindəki artımı zəiflətməkdir.

Quş qripi istehsalı azaldıb

Yüksək patogenli quş qripi hallarının yayılması Cənubi Koreyada yumurta istehsalının azalmasına səbəb olub. Təklifin daralması nəticəsində ölkədə yumurta qiymətləri sürətlə yüksəlib.

İyunun ortalarında 30 ədədlik yumurta qutusunun pərakəndə satış qiyməti 7 min 506 vona, təxminən 4,9 dollara çatıb. Bu, illik müqayisədə 7,1% artım deməkdir.

Eyni dövrdə ölkədə gündəlik orta yumurta istehsalı 47 milyon 50 min ədədə düşüb. Bu göstərici ötən ilin eyni dövrü ilə müqayisədə 3,3% azdır.

Bloomberg-in məlumatına görə, bazarda təklifi azaldan digər amil Cənubi Koreyanın heyvan rifahı və biotəhlükəsizlik siyasəti çərçivəsində quşçuluq təsərrüfatlarında heyvan sıxlığının azaldılmasına yönəlmiş tədbirlərdir.

Cənubi Koreyanın Kənd Təsərrüfatı Nazirliyi mövcud qıtlığın müvəqqəti xarakter daşıdığını hesab edir. Rəsmilər bildirirlər ki, gənc toyuqların yumurtlama dövrünə daxil olması ilə iyul ayında istehsalın yenidən normal səviyyələrə yaxınlaşacağı gözlənilir.

İş elanları AzVak.az-da