Qızılın qiyməti ABŞ və İran rəsmilərinin münaqişəyə son qoymaq üçün ilkin razılaşma əldə etdiklərini açıqlamasından sonra bazar ertəsi 3 faizə yaxın yüksəlib.

Marja xəbər verir ki, qızılın qiyməti 2,6 faiz qalxaraq bir unsiya üçün 4327,11 dollara çatıb və 9 iyundan bəri ən yüksək səviyyəsini görüb (Bakı vaxtı ilə saat 09:00-a olan məlumat).

ABŞ və İran rəsmiləri bazar günü bildiriblər ki, müharibəyə son qoyulmasını, ABŞ-ın İrana qarşı blokadasının aradan qaldırılmasını və Hörmüz boğazının yenidən açılmasını nəzərdə tutan çərçivə razılaşması üzrə anlaşma əldə olunub. Pakistanın Baş naziri Şahbaz Şərif “X” platformasında paylaşım edərək razılaşmanın cümə günü İsveçrədə rəsmi şəkildə imzalanacağını bildirib.

Razılaşma xəbəri neft qiymətlərini aşağı salıb, inflyasiya və daha yüksək faiz dərəcələri ilə bağlı narahatlıqları isə zəiflədib. ABŞ dolları son 10 günün ən aşağı səviyyəsinə geriləyib. Dolların ucuzlaşması dollarla qiymətləndirilən qızılı digər valyutalardan istifadə edən investorlar üçün daha əlçatan edib. Eyni zamanda, neft qiymətləri 4 faizdən çox azalıb.

KCM Trade-in baş bazar analitiki Tim Waterer bildirib ki, neft qiymətlərinin enməsi və dolların zəifləməsi geosiyasi risklərin azalması, həmçinin Hörmüz boğazının yenidən açılacağı gözləntiləri ilə bağlıdır.

“Bu proseslər inflyasiya gözləntilərini sakitləşdirir. Son həftələrdə qiymətli metallar üçün ən güclü dəstəkverici amil məhz bu kombinasiyadır. Lakin yüksəlişin davamlılığı sülh razılaşmasının nə dərəcədə dayanıqlı olacağından asılı olacaq”, - deyə analitik qeyd edib.

Qızılın qiyməti ABŞ və İsrailin fevralın sonunda İrana qarşı başlatdığı müharibənin əvvəlindən bəri təxminən 20 faiz geriləmişdi.

Qızıl ənənəvi olaraq inflyasiyaya qarşı qorunma aləti hesab olunur. Bununla belə, yüksək faiz mühitində faiz gəliri gətirməyən aktiv olduğu üçün onun cəlbediciliyi qismən azala bilir.

CME FedWatch məlumatlarına görə, bazarlar, sülh razılaşmasından sonra ABŞ Federal Ehtiyat Sisteminin (FED) dekabr ayında faiz artıracağına dair gözləntini 69 faizdən 47 faizə endirib.

Digər qiymətli metallarda da bahalaşma qeydə alınıb. Gümüş 3,1 faiz artaraq bir unsiyasının qiyməti  70,07 dollara, platinin qiyməti 3,1 faiz yüksələrək 1 771,27 dollara, palladium isə 3,3 faiz bahalaşaraq 1 325,76 dollara çatıb.

İş elanları AzVak.az-da