Azərbaycanda süni intellektin tətbiqini nəzərdə tutan yeni data mərkəzləri ilə bağlı yaxın aylarda mühüm elanların verilməsi gözlənilir.

Marja.az xəbər verir ki, bunu İqtisadiyyat naziri Mikayıl Cabbarov bildirib.

Nazirin sözlərinə görə, Prezident İlham Əliyevin 2026-cı ilin yanvarında Davos İqtisadi Forumunda, həmçinin fevral ayında Münxen Təhlükəsizlik Konfransında keçirdiyi görüşlərin nəticəsi olaraq texnoloji tərəfdaşlarla aparılan işlər yekun mərhələyə yaxınlaşıb.

“Mən öncədən hansısa böyük anonslar vermək istəməzdim. Amma bildirmək istəyirəm ki, bu ilin əvvəlindən sürətləndirilmiş və yekun mərhələdə olan işlərin nəticəsində yaxın aylarda tanınmış, hətta məşhur texnoloji tərəfdaşlarla yeni data mərkəzlərinin, süni intellektin tətbiqini nəzərdə tutan data mərkəzlərinin elanı olacaq”, - deyə Mikayıl Cabbarov qeyd edib.

Nazir bildirib ki, Azərbaycanda superkompüter infrastrukturunun inkişafı və ondan istifadə istiqamətində işlər uğurla həyata keçirilir.

Onun sözlərinə görə, hazırda İqtisadiyyat Nazirliyində mövcud olan superkompüterdən istifadə üzrə dövlət qurumları və özəl sektordan daxil olan sorğuların həcmi mövcud texniki imkanları üstələyir.

“Bu, çox yaxşı xəbərdir. Bu onu göstərir ki, iqtisadiyyatda, elmi və təhsil sistemində, dövlət idarəçiliyində, tibbi xidmətlərin göstərilməsində, vergi və gömrük fəaliyyətinin tənzimlənməsində, eləcə də bir sıra digər mühüm sahələrdə süni intellektə əsaslanan həllərin tətbiqi böyük sürətlə artır”, - deyə nazir vurğulayıb.

Mikayıl Cabbarov qeyd edib ki, rəqəmsal transformasiya və süni intellektə əsaslanan həllərin geniş tətbiqi insan kapitalının inkişafı ilə birbaşa bağlıdır.

Nazirin sözlərinə görə, süni intellekt əsaslı tətbiqlərin hazırlanması, mövcud bizneslərdə əlavə dəyərin artırılması və yeni bizneslərin yaradılması elmi-təhsil sistemi, universitetlər və xarici tərəfdaş ali məktəblərlə əməkdaşlığın dərinləşdirilməsini zəruri edir.

O bildirib ki, bu istiqamətdə əsas məqsəd süni intellekt texnologiyalarının iqtisadiyyatın müxtəlif sahələrinə inteqrasiyasını sürətləndirmək, dövlət və özəl sektorun texnoloji imkanlarını genişləndirmək, eləcə də yeni nəsil rəqəmsal bacarıqlara malik insan kapitalını formalaşdırmaqdır.