"Azpulmat" tətbiqi və saytı vasitəsilə ilə fiziki şəxslərə kredit veri “Bank Olmayan Kredit Təşkilatı AZPUL” MMC 2025-ci ili 11 milyon 767 min 192 manat xalis mənfəətlə başa vurub. Şirkət 2024-cü ildə 64 milyon 134 min 383 manat xalis mənfəət əldə etmişdi. Beləliklə, BOKT-un xalis mənfəəti illik müqayisədə 52 milyon 367 min 191 manat və ya 81,7% azalıb.

Bu barədə Marja.az  “Bank Olmayan Kredit Təşkilatı AZPUL” MMC-nin 31 dekabr 2025-ci il tarixində başa çatmış il üzrə Maliyyə Hesabatlarına istinadən xəbər verir.

Hesabata görə, 2025-ci ildə təşkilatın faiz gəlirləri 18 milyon 617 min 551 manat təşkil edib. Bu göstərici 2024-cü ildə 78 milyon 99 min 4 manat idi. Beləliklə, faiz gəlirləri 59 milyon 481 min 453 manat və ya 76,2% azalıb.

2024-cü ildə təşkilatın 648 min 446 manat faiz xərci olduğu halda, 2025-ci ildə faiz xərci qeydə alınmayıb. Buna baxmayaraq, faiz gəlirlərindəki kəskin azalma əsas fəaliyyət üzrə nəticəyə ciddi təsir göstərib.

Kredit portfeli azalıb, faiz gəlirləri kəskin düşüb

2025-ci ildə “AZPUL” MMC-nin ehtimal olunan kredit zərərlərinin azalmasından əvvəlki xalis faiz gəliri 18 milyon 617 min 551 manat olub. Bu, 2024-cü illə müqayisədə 58 milyon 833 min 7 manat və ya 76% azdır.

Kreditlər və debitor borclar üzrə ehtimal olunan kredit zərərlərinin hesablanması 36 milyon 304 min 716 manat təşkil edib. 2024-cü ildə bu göstərici 45 milyon 307 min 154 manat idi. Beləliklə, bu istiqamətdə xərc 9 milyon 2 min 438 manat və ya 19,9% azalıb.

Buna baxmayaraq, təşkilatın xalis faiz nəticəsi 2025-ci ildə 17 milyon 687 min 165 manat zərər olub. 2024-cü ildə isə bu göstərici 32 milyon 143 min 404 manat gəlir idi. Başqa sözlə, xalis faiz nəticəsi 49 milyon 830 min 569 manat pisləşib.

Kredit satışlarından zərər 24,5 milyon manata çatıb

Hesabat ilində diqqətçəkən əsas məqamlardan biri kredit satışlarından yaranan xalis zərərlərin kəskin artmasıdır. 2025-ci ildə bu göstərici 24 milyon 513 min 856 manat olub. 2024-cü ildə kredit satışlarından yaranan xalis zərər cəmi 260 min 114 manat təşkil etmişdi. Beləliklə, bu maddə üzrə zərər 24 milyon 253 min 742 manat artıb.

Eyni zamanda, inzibati və digər əməliyyat xərcləri 2025-ci ildə 14 milyon 783 min 973 manat təşkil edib. 2024-cü ildə bu göstərici 15 milyon 255 min 645 manat idi. Xərclər 471 min 672 manat və ya 3,1% azalıb.

Şirkətin digər gəlirləri, xalis maddəsi isə 2025-ci ildə 71 milyon 258 min 839 manat olub. 2024-cü ildə bu göstərici 61 milyon 622 min 411 manat idi. Bu maddə üzrə artım 9 milyon 636 min 428 manat və ya 15,6% təşkil edib.

Mənfəət vergisindən əvvəl mənfəət 81,7% azalıb

2025-ci ildə “AZPUL” MMC-nin mənfəət vergisindən əvvəl mənfəəti 14 milyon 290 min 742 manat təşkil edib. 2024-cü ildə bu göstərici 78 milyon 152 min 483 manat idi. Beləliklə, vergidən əvvəl mənfəət 63 milyon 861 min 741 manat və ya 81,7% azalıb.

Mənfəət vergisi xərci isə 2024-cü ildəki 14 milyon 18 min 100 manatdan 2025-ci ildə 2 milyon 523 min 550 manata düşüb. Azalma 11 milyon 494 min 550 manat və ya 82% təşkil edib.

İş elanları AzVak.az-da

Aktivlər 12,5 milyon manat azalıb

2025-ci ilin sonuna “AZPUL” MMC-nin cəmi aktivləri 64 milyon 925 min 906 manat təşkil edib. 2024-cü ilin sonunda bu göstərici 77 milyon 429 min 116 manat idi. Beləliklə, təşkilatın aktivləri illik müqayisədə 12 milyon 503 min 210 manat və ya 16,1% azalıb.

Aktivlərdəki azalmanın əsas səbəbi müştərilərə verilmiş kreditlərin xalis məbləğinin kəskin azalmasıdır. Bu göstərici 2024-cü ildə 52 milyon 84 min 994 manat olduğu halda, 2025-ci ildə 23 milyon 46 min 580 manata düşüb. Azalma 29 milyon 38 min 414 manat və ya 55,8% təşkil edib.

Bunun əvəzində, təşkilatın pul vəsaitləri və onların ekvivalentləri 21 milyon 491 min 607 manatdan 29 milyon 904 min 984 manata yüksəlib. Artım 8 milyon 413 min 377 manat və ya 39,1% olub.

Digər aktivlər isə 3 milyon 79 min 393 manatdan 11 milyon 378 min 937 manata yüksəlib. Bu maddə üzrə artım 8 milyon 299 min 544 manat və ya 269,5% təşkil edib.

Öhdəliklər 81,7% azalıb, kapital 10,2% geriləyib

2025-ci ilin sonuna “AZPUL” MMC-nin cəmi öhdəlikləri 1 milyon 177 min 217 manat təşkil edib. 2024-cü ilin sonunda bu göstərici 6 milyon 447 min 619 manat idi. Beləliklə, öhdəliklər 5 milyon 270 min 402 manat və ya 81,7% azalıb.

Təşkilatın cəmi kapitalı 2025-ci ilin sonunda 63 milyon 748 min 689 manat olub. 2024-cü ilin sonunda kapital 70 milyon 981 min 497 manat təşkil edirdi. Bu isə 7 milyon 232 min 808 manat və ya 10,2% azalma deməkdir.

Nizamnamə kapitalı dəyişməyərək 300 min manat səviyyəsində qalıb. Bölüşdürülməmiş mənfəət isə 70 milyon 681 min 497 manatdan 63 milyon 448 min 689 manata düşüb. Azalma 7 milyon 232 min 808 manat və ya 10,2% təşkil edib.

Təhlil

2025-ci ildə “AZPUL” MMC-nin maliyyə nəticələrində ciddi zəifləmə müşahidə olunub. Şirkət ili mənfəətlə başa vursa da, xalis mənfəət 2024-cü illə müqayisədə 81,7% azalaraq 11 milyon 767 min manata düşüb.

Əsas mənfi faktor faiz gəlirlərinin kəskin azalmasıdır. Kredit portfelinin xalis məbləğinin 55,8% azalması faiz gəlirlərinin də 76,2% düşməsi ilə müşayiət olunub. Bu, təşkilatın əsas gəlir yaratma bazasının daraldığını göstərir.

Digər tərəfdən, kreditlər üzrə ehtimal olunan zərərlərin 19,9% azalması müsbət görünsə də, faiz gəlirlərindəki azalma və kredit satışlarından yaranan 24 milyon 514 min manatlıq xalis zərər ümumi nəticəyə ciddi təzyiq göstərib.

Təşkilatın müsbət tərəfi odur ki, pul vəsaitləri 39,1% artıb, öhdəliklər isə 81,7% azalıb. Bu, balansın daha az borclu struktura keçdiyini göstərir. Lakin aktivlərin ümumi həcminin 16,1% azalması, kredit portfelinin kəskin kiçilməsi və bölüşdürülməmiş mənfəətin azalması təşkilatın biznes həcminin əvvəlki illə müqayisədə daraldığını göstərir.

Ümumilikdə, “AZPUL” MMC 2025-ci ildə mənfəətli qalsa da, əsas fəaliyyət üzrə gəlirlərin azalması və kredit satışlarından yaranan böyük zərər nəticəsində maliyyə göstəriciləri 2024-cü illə müqayisədə əhəmiyyətli dərəcədə zəifləyib.

İş elanları AzVak.az-da