“PMD Group” MMC törəmə şirkətləri PMD Projects, Facility Management Group (FMG) və Design Bureau ilə birlikdə 17–22 may 2026-cı il tarixlərində Bakıda keçirilən 13-cü Ümumdünya Şəhərsalma Forumunda (WUF13) iştirak edir.

Forum “Housing the World: Safe and Resilient Cities and Communities” mövzusu altında keçirilir və dayanıqlı şəhərsalma, təhlükəsiz yaşayış mühitləri, inklüziv inkişaf və şəhərlərin gələcəyi ilə bağlı qlobal müzakirələrə ev sahibliyi edir.

Dünya Şəhərsalma Forumu dayanıqlı urbanizasiya sahəsində dünyanın aparıcı qlobal platformalarından biri hesab olunur. WUF13 çərçivəsində PMD Group və törəmə şirkətləri C06 nömrəli stenddə təmsil olunur. Forum müddətində PMD Group-un stendində şirkətin və törəmə şirkətlərinin fəaliyyəti vahid konsepsiya altında təqdim olunur. PMD Projects tikinti layihələri üzrə təcrübəsini, Facility Management Group müasir əmlak idarəetməsi yanaşmalarını, Design Bureau isə memarlıq sahəsində insan yönümlü və dayanıqlı həllərini təqdim edir.

PMD Group WUF13 çərçivəsində yerli və beynəlxalq tərəfdaşlarla, o cümlədən Zaha Hadid Architects, Chapman Taylor kimi nüfuzlu şirkətlərin nümayəndələri ilə dialoq və görüşlər keçirib.

WUF13 çərçivəsində  19 may tarixində Azərbaycan Pavilyonunda Zaha Hadid Architects-dən Houzhe Xu, PMD Group-un Daşınmaz Əmlakın İnkişafı üzrə Direktoru Aykut Bülbül və Daşınmaz Əmlakın İnkişafı üzrə Rəhbəri Kamil Əliyevin iştirakı ilə “Designing the Mixed-Use City: Architecture, Complexity and the Future of Urban Life” mövzusunda panel müzakirəsi keçirilib.

Panel zamanı qarışıq funksiyalı şəhər mühitlərinin planlaşdırılması, memarlığın gündəlik şəhər həyatına təsiri və kompleks urban layihələrə yanaşma məsələləri müzakirə olunub. Müzakirədə bu mövzulara beynəlxalq baxış təqdim edilib, şəhərlərin yalnız tikili mühit kimi deyil, insanların yaşayış, hərəkət, ünsiyyət və ictimai məkanlardan istifadə təcrübəsini formalaşdıran sistem kimi qiymətləndirilməsi vurğulanıb. PMD Group üçün bu dialoqlar şəhər mühitinin gələcəyi ilə bağlı qlobal baxışa qoşulmaq, beynəlxalq tərəfdaşlarla bilik və təcrübə mübadiləsi aparmaq, həmçinin Azərbaycanın dayanıqlı urbanizasiya gündəliyinə özəl sektor nümayəndəsi olaraq töhfə vermək baxımından mühüm əhəmiyyət daşıyır.

Panelin yekununda PMD Group Zaha Hadid Architects ilə Bakı şəhərinin memarlığına töfhə verəcək yeni ekskluziy layihə üzərində işlədiyinin mesajını verib.