Avstraliyanın bank və maliyyə xidmətləri şirkəti "ANZ Group Holdings" Yaxın Şərqdəki münaqişənin dünyada iqtisadi artımı yavaşlatması və mərkəzi bankların pul siyasətini yumşaltmasına səbəb olması fonunda qızılın qiymətinin 2027-ci ilin ortalarına qədər 1 unsiya üçün 6 min dollar səviyyəsinə yüksələcəyini proqnozlaşdırıb.

Marja xəbər verir ki, bankın analitikləri 3 ssenari irəli sürüblər.

Birinci ssenariyə görə, xam neftin bahalaşması inflyasiya gözləntilərini artıracaq və ABŞ Mərkəzi Bankı (FED) ehtiyatlı davranaraq sentyabr ayına qədər faiz dərəcələrini sabit saxlayacaq. Bu isə qızıl üçün mənfi təsir yaradacaq.

İkinci ssenaridə enerji böhranı iqtisadi artıma mənfi təsir göstərəcək, sənaye fəaliyyətini azaldacaq və istehlak xərclərini zəiflədəcək.

Üçüncü ssenaridə isə iqtisadi artım zəiflədikcə mərkəzi banklar daha yumşaq pul siyasətinə yönələcək. Bu isə qızılı dəstəkləyəcək.

Bank qısa müddətdə qızılın unsiyasının qiymətinin təxminən 4 min 500 dollara düşəcəyini, lakin qiymət azalmasının “yeni alışlar üçün bir fürsət” yaradacağı qeyd olunub.

Qurum 2026-cı ilin sonu üçün qızılın qiyməti üzrə proqnozunu 5 min 800 dollardan 5 min 600 dollara endirib. Qızılın 2027-ci ilin ortalarında isə 1 unsiya üçün 6 min dollar səviyyəsinə çatacağı gözlənilir. Əvvəlki proqnozda qızılın qiymətinin bu səviyyəyə 2027-ci ilin əvvəlində çatılacağı bildirilirdi.

Bankın analitikləri qeyd ediblər: “Daha ümumi mənada, pisləşən maliyyə mövqeləri, ABŞ dollarının diversifikasiyasının davam etməsi və geosiyasi qeyri-müəyyənlik qızılın sığorta rolu kimi əhəmiyyətini gücləndirməyə davam edəcək. Bundan əlavə, Yaxın Şərqdəki münaqişə fonunda mərkəzi banklar strateji olaraq qızıl ehtiyatlarını artırmağa davam edəcəklər.”

Qeyd edək ki, "ANZ Group Holdings"  Avstraliyanın “Böyük dördlük” banklarından biridir və Yeni Zealandiyada aparıcı maliyyə institutlarından sayılır. Qurum qlobal miqyasda təxminən 30 bazarda fəaliyyət göstərir.

İş elanları AzVak.az-da