ABŞ Prezidenti Donald Tramp Yaxın Şərqdə müharibəni dayandırmaq üçün irəli sürülən son təklifə İranın cavabını rədd etməsindən sonra neft bahalaşıb.

Bu vəziyyət strateji əhəmiyyətə malik Hörmüz boğazının faktiki olaraq bağlı qalma müddətini uzadır.

Brent nefti üzrə fyuçerslər 4,2%-ə qədər yüksələrək bir barel üçün 105,54 dollara çatıb, ABŞ xam nefti – West Texas Intermediate (WTI) isə 99 dolların üzərinə qalxıb. Tramp sosial şəbəkədəki paylaşımında İranın cavabını “TAMAMİLƏ QƏBULEDİLƏMƏZ” adlandırıb.

Fevral ayının sonunda başlayan müharibə səbəbindən Hörmüz boğazında keçidlərin böyük ölçüdə dayanması xam neft, təbii qaz və yanacaq daşımalarını ciddi şəkildə pozub. Bu vəziyyət enerji qiymətlərinin artmasına və qlobal inflyasiya narahatlıqlarının güclənməsinə səbəb olub.

"ING Group"un əmtəə strategiyası üzrə rəhbəri Warren Patterson bildirib: “ABŞ ilə İran arasında yaxın zamanda razılaşma əldə olunacağına dair nikbinlik azalıb və bu da neft qiymətlərini yuxarı qaldırıb. Münaqişənin yenidən kəskinləşə biləcəyi ilə bağlı narahatlıqlar arta bilər və bu da qiymətlərin daha da yüksəlməsi üçün yeni imkan yaradır.”

Bildirilir ki, İran yüksək səviyyədə zənginləşdirilmiş uran ehtiyatının bir hissəsini üçüncü ölkəyə verməyi təklif edib, lakin nüvə obyektlərini sökmək ideyasını rədd edib. "The Wall Street Journal"ın xəbərinə görə, Tehran bu iddianı təkzib edib.

Digər tərəfdən, bazar günü Qətər sahilləri yaxınlığında bir yük gəmisinə pilotsuz uçuş aparatı ilə hücum edilib və nəticədə qısa müddətli yanğın baş verib. Bu hadisə aprel ayının əvvəlində əldə olunan atəşkəsdən sonra bölgədə dəniz daşımalarına qarşı həyata keçirilən son hücum olub.

"Saudi Aramco"nun baş icraçı direktoru Amin Nasser bildirib ki, Hörmüz boğazı üzərindən daşımalar bir neçə həftə də məhdud qalarsa, bazarın yalnız 2027-ci ildə normallaşması mümkün ola bilər. Şirkət itirilmiş təchizatı kompensasiya etmək üçün neft daşımalarının bir hissəsini ölkənin qərb sahilində yerləşən Yanbu Limanı vasitəsilə yönləndirib.

İş elanları AzVak.az-da