Son on il ərzində “Silk Way West Airlines” şirkəti Yaponiya istiqamətləri üzrə təxminən 1300 uçuş həyata keçirib və 145 min tondan çox yük daşıyıb.

Şirkətin yaydığı məlumata görə, bu göstəricilər Yaponiya bazarının aviaşirkət üçün əhəmiyyətini və şirkətin regionda dayanıqlı iştirakını əks etdirir.

Aviaşirkət 2016-cı ildə Bakı–Komatsu marşrutu üzrə ilk uçuşunu həyata keçirdikdən sonra Yaponiyadakı marşrut şəbəkəsini genişləndirərək Kansai və Narita istiqamətlərini də bu şəbəkəyə daxil edib. Hazırda “Silk Way West Airlines” Yaponiyaya həftədə iki uçuş həyata keçirir və bu ölkə ilə aviaşirkətin geniş beynəlxalq şəbəkəsi arasında mühüm yük bağlantısı yaradır.

“Silk Way West Airlines”ın Yaponiyaya uçuşlarının 10 illiyi bu ölkənin hava yükdaşımaları bazarının davamlı artım dövrünə təsadüf edir. Qiymətləndirmələrə görə, 2025-ci ildə bazarın həcmi əvvəlki illə müqayisədə təxminən 12 faiz artıb. Asiyanın aparıcı hava yük qovşaqlarından biri olan Yaponiya inkişaf etmiş infrastrukturu, müntəzəm beynəlxalq əlaqələri və yüksək dəyərli, vaxt baxımından həssas yüklərin daşınmasına xüsusi diqqəti ilə regional və qitələrarası ticarət axınlarının təmin edilməsində mühüm rol oynayır.

Bakıdakı habının imkanlarından istifadə edən “Silk Way West Airlines” Yaponiya ilə Mərkəzi Asiya, Şərqi Avropa, Yaxın Şərq və digər regionların bazarları arasında yük axınlarının inkişafına töhfə verir.

Qeyd edək ki, “Silk Way West Airlines” Yaponiyaya uçuşlarının 10 illiyini qeyd edir. 

Əsası 2012-ci ildə İpək yolunun qəlbi sayılan Bakıda qoyulmuş “Silk Way West Airlines” şirkəti Heydər Əliyev Beynəlxalq Hava Limanındakı “Boeing 777F”, “747-8F” və “747-400F” yük təyyarələrindən ibarət donanması ilə dünyanın müxtəlif ölkələrinə hər ay yüzlərlə uçuş həyata keçirir. Davamlılıq və səmərəlilik prinsiplərinə sadiq qalan Silk Way West Airlines 2030-cu ilə qədər donanmasını müasir “Boeing 777F”, “Boeing 777-8F” və “Airbus A350F” təyyarələri ilə yeniləməyi planlaşdırır. Aviaşirkət Avropa, MDB, Yaxın Şərq, Asiya və Amerika qitələrində 40-dan çox istiqamətə yükdaşıma xidmətləri göstərərək, illik 500 min tondan artıq yük dövriyyəsini idarə edir.