Çinin böyük avtomobil istehsalçısı BYD-nin cəmi minik avtomobillərinin (elektromobillərinin) satışı aprel ayında səkkizinci ay ardıcıl olaraq azalıb. Onun daxili bazardakı rəqibləri olan Leapmotor və Zeekr aylıq tədarüklərdə rekord səviyyələrə çatıblar. Bazarın daha rəqabətli olması bu dinamikanı gücləndirib.

Marja.az-ın məlumatına görə, BYD bazar günü açıqlayıb ki, ötən ay (apreldə) 314 100 yeni enerji ilə işləyən minik avtomobili (batareyalı elektrik və plug-in hibrid modellər daxil olmaqla) təhvil verib. Bu göstərici ötən ilin eyni dövrü ilə müqayisədə 15,7% azalma, mart ayı ilə müqayisədə isə 6,2% artım deməkdir.

İxrac göstəriciləri isə rekord səviyyəyə yüksəlib. Hong Kong Stock Exchange-ə təqdim olunan sənədə əsasən, BYD-nin ixracı 135 098 ədədə çataraq tarixdə ən yüksək səviyyə qeydə alınıb. CNBC-nin hesablamalarına görə, bu, 2025-ci ilin eyni dövrü ilə müqayisədə 70%-dən çox artım deməkdir. Şençjen (Shenzhen) şəhərində yerləşən avtomobil istehsalçısının daxili və xarici bazarlardakı nəticələri arasındakı fərq şirkətin daxili bazarda güclənən rəqabət fonunda xarici bazarlardan daha çox asılı olduğunu göstərir.

Apreldə bazarın lideri olan elektromobil nəhəngi BYD - ilk rübdə mənfəətinin illik müqayisədə təxminən 55,4% azaldığını açıqlayıb. Eyni dövrdə əməliyyat gəlirləri 11,8% azalaraq 150 milyard yuan (22 milyard dollar) olub. Bu azalma əsasən yerli rəqiblərin eyni rübdə güclü nəticələr göstərməsi ilə əlaqələndirilir.

Çinin ikinci ən böyük elektromobil istehsalçısı olan Leapmotor aprel ayında tarixində ən yüksək aylıq tədarük göstəricisini əldə edib. Şirkət 71 387 avtomobil təhvil verib ki, bu da 2025-ci ilin eyni dövrü ilə müqayisədə 73,9% artım deməkdir. Mərkəzi ofisi Hollandiyada yerləşən Stellantis şirkəti (Jeep, Dodge, Fiat, Chrysler və Peugeot kimi tanınmış brendlərin sahibi olan korporasiya) tərəfindən dəstəklənən Leapmotor bundan əvvəlki rekordunu 2025-ci ilin noyabrında qeydə almışdı və ötən il ilk illik mənfəətini əldə edib.

Geely-nin premium elektromobil markası olan Zeekr də aylıq satışlarda yeni rekord müəyyən edib. Apreldə 31 787 avtomobil satılıb ki, bu da illik müqayisədə 131,6% artım deməkdir.

Çinin texnologiya nəhəngi Xiaomi isə aprel ayında 30 mindən çox elektromobil təhvil verib. Bu göstərici ötən ilin eyni dövrü ilə müqayisədə 7,1%-dən çox artım deməkdir. Şirkətin yenilənmiş Xiaomi SU7 sedan modeli üçün 70 mindən çox ilkin sifariş aldığı da bildirilir.

Nio aprel ayında 29 356 elektromobil təhvil verib ki, bu da ötən ilin eyni dövrü ilə müqayisədə 22,8% artım deməkdir. Bu rəqəmə şirkətin daha ucuz qiymətli Onvo və Firefly markalarının satışları da daxildir.

Startap olan Li Auto isə aprel ayında 34 085 avtomobil təhvil verib. Bu göstərici ötən ilin eyni dövrü ilə müqayisədə cəmi 0,4% artım deməkdir.

Ayın ortalarında yeni Xpeng GX SUV modelini təqdim etdikdən sonra Xpeng-in satışlarında illik azalma qeydə alıb. Beləliklə, BYD ilə birlikdə satışları illik müqayisədə azalan yeganə avtomobil istehsalçısı olub. Şirkət 31 011 avtomobil təhvil verib ki, bu da ötən illə müqayisədə 11,5% azalma deməkdir.

Hər gün yeni vakansiyalar - AzVak.az-da

Xarici bazarlara çıxış

2026-cı ildə bir milyondan çox avtomobil ixrac etməyi planlaşdıran BYD xarici bazarlarda mövqeyini getdikcə daha da gücləndirir.

Konsaltinq şirkəti Latam Mobility-nin hesablamalarına görə, 2025-ci ildə şirkət Meksikada elektromobil satışlarının ən azı 70%-ni, Argentinada isə 75%-ni təşkil edib.

Avropa Avtomobil İstehsalçıları Assosiasiyası (European Automobile Manufacturers Association - ACEA) tərəfindən açıqlanan məlumatlara görə, 2026-cı ilin birinci rübündə BYD-nin minik elektromobillərinin yeni qeydiyyatları Avropa İttifaqı, Avropa Azad Ticarət Assosiasiyası və Birləşmiş Krallıq üzrə illik müqayisədə 155%-dən çox artıb.

Bloomberg agentliyinin xəbərinə görə, Avropada təsirini artırmaq məqsədilə BYD apreldə Avropanın avtomobil sənayesi lobbi təşkilatı olan European Automobile Manufacturers Association (ACEA)-ya üzv olmaq üçün müraciət edib. 

BYD geniş daxili istehsal imkanları ilə tanınsa da, şirkət Braziliya və Macarıstanda istehsal müəssisələri qurub. Bununla belə, avtomobil istehsalçısının xaricdəki zavodları əmək hüquqlarının pozulması ilə bağlı mübahisələrlə də gündəmə gəlib.

Digər Çin elektromobil şirkətləri də xarici bazarlarda pay qazanmağa çalışır. Leapmotor avtomobil konserni Stellantis ilə birgə müəssisəsi vasitəsilə fəaliyyətini genişləndirməyi planlaşdırır. Şirkətin 2025-ci ilin sonuna qədər Avropada 800-dən çox satış və servis mərkəzi, Latın Amerikasında isə ən azı 30 belə məntəqəsi olacaq.

Leapmotor aylıq ixrac rəqəmlərini açıqlamasa da, şirkət fevral ayında 100 000–150 000 avtomobil ixrac etməyi hədəflədiyini bildirib.

Apreldə Pekində yerləşən Li Auto isə Yaxın Şərq bazarına daxil olduğunu elan edib. Şirkət avtomobillərini Səudiyyə Ərəbistanı və Birləşmiş Ərəb Əmirliklərinə gətirmək üçün yerli distribyutorlarla anlaşma memorandumu imzalayıb. Eyni zamanda şirkət fəaliyyətini Kamboca, Laos, Makao və Myanma bazarlarına genişləndirməyi planlaşdırdığını açıqlayıb.

İş elanları AzVak.az-da