Enerji Məsələlərini Tənzimləmə Agentliyinin (EMTA) Qarabağ filialının Xankəndi şəhərində yerləşən “Xankəndi” Biznes Mərkəzində rəsmi açılış mərasimi keçirilib.

Marja xəbər verir ki, tədbirdə EMTA-nın İdarə Heyətinin sədri Samir Axundov, Xankəndi şəhəri, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsinin müavini Səbuhi Qəhrəmanov, Xüsusi nümayəndəliyin və EMTA-nın Qarabağ filialının əməkdaşları iştirak ediblər. 

Açılış mərasimində Samir Axundov bildirib ki, Xankəndidə Qarabağ filialının açılması həm tarixi, həm də strateji hadisədir. Prezident İlham Əliyevin rəhbərliyi ilə II Qarabağ müharibəsindəki şanlı qələbə nəticəsində torpaqlarımız işğaldan azad olunub. Qarabağa qayıdış dövlət siyasətinin əsas prioritetlərindəndir və bu bölgədə əhalinin yaşayışının təmin olunması, müxtəlif dövlət qurumlarının fəaliyyətinin bərpası əsas vəzifələrdən biridir.

Səbuhi Qəhrəmanov Qarabağa qayıdış çərçivəsində dövlət qurumlarının bölgədə fəaliyyətinin bərpa olunduğunu vurğulayıb. O, işğaldan azad edilmiş ərazilərə Böyük Qayıdışın bu gün də davam etdiyini və respublikanın müxtəlif yerlərində müvəqqəti məskunlaşmış ailələrin doğma yurdlarına qayıtdıqlarını qeyd edib.

Bildirilib ki, filialın ofisinin Xankəndidə açılması həm bu bölgənin sakinləri, həm də burada fəaliyyət göstərən və göstərəcək müəssisələr üçün əlçatan xidmət deməkdir. Bu, dövlət siyasətinin bölgələrdə təhlükəsiz, davamlı və effektiv şəkildə həyata keçirilməsini təmin edir. Xankəndi şəhərində filialın açılması Qarabağa qayıdışın, işğaldan azad olunmuş torpaqlara geri dönən vətəndaşların yaşayışının təmin olunması ilə yanaşı, bölgədə sabitliyin və inkişafın bərqərar olmasının göstəricisidir.

Qeyd edək ki, Qarabağ filialının fəaliyyət ərazisinə Şuşa və Xankəndi şəhərləri, Ağdam, Füzuli, Cəbrayıl, Xocavənd, Xocalı, Zəngilan, Qubadlı və Laçın rayonları daxildir.

Xatırladaq ki, Enerji Məsələlərini Tənzimləmə Agentliyi (EMTA) Azərbaycan Respublikası Prezidentinin 22 dekabr 2017-ci il tarixli Fərmanı ilə Energetika Nazirliyinin tabeliyində publik hüquqi şəxs statusu ilə yaradılıb. Agentliyin Bakı, Sumqayıt, Gəncə, Şirvan, Mingəçevir, Xaçmaz, Lənkəran, Kürdəmir, Tovuz, Şəki, Qarabağ olmaqla, ümumilikdə 11 filialı fəaliyyət göstərir.