Macarıstanda keçirilən ümumi seçkilərdə Peter Magyar liderliyindəki Sayğı və Azadlıq Partiyası (Tisza), 16 ildir hakimiyyətdə olan Viktor Orban-ın rəhbərlik etdiyi Fidesz partiyasını geridə qoyaraq seçkilərdə qalib gəlib.

Macarıstan Milli Seçki Ofisinin (NVI) məlumatına görə, səslərin təxminən 94 faizi sayılıb. Nəticələrə əsasən, Tisza 53% səs toplayaraq öndədir, Orbanın rəhbərlik etdiyi Fidesz isə 37% səviyyəsində qalıb.

Səslərin təxminən yarısının sayıldığı ilkin nəticələrə görə, 199 yerlik parlamentdə 138 mandatın Magyarın rəhbərlik etdiyi Tisza tərəfindən qazanıldığı görünür. Fidesz-in 54 mandat əldə etdiyi, seçki baryerini keçərək parlamentə daxil olması gözlənilən üçüncü partiya Mi Hazankın isə 7 deputat qazandığı bildirilib.

Parlamentdə ən azı 100 mandat qazanan partiya və ya blok hökumət qurmaq hüququ əldə edir, konstitusion çoxluq üçün isə 133 mandat tələb olunur.

Seçicilər ölkə üzrə qurulan 10 min 47 seçki məntəqəsində səs veriblər.

Peter Magyar sosial media hesabında etdiyi paylaşımda “Macarıstan qazandı” ifadəsini yazıb.

Orban Magyar-ı təbrik edib

16 ildir hakimiyyətdə olan Baş nazir Orban seçkilərdə böyük fərqlə öndə olan Tisza partiyasının lideri Peter Magyar-a telefonla zəng edərək qələbəsi münasibətilə onu təbrik edib.

Tisza lideri Magyar sosial media hesabında paylaşım edərək bildirib: “Baş nazir Viktor Orban az öncə bizə zəng edərək qələbəmiz münasibətilə təbrik etdi”.

Digər tərəfdən, Baş nazir Orban keçirdiyi mətbuat konfransında nəticələri şərh edib. O bildirib ki, seçkinin nəticəsi açıq və acıdır:

“Seçicilər bizə ölkəni idarə etmək məsuliyyətini və imkanını vermədi. Qalib partiyanı təbrik etdim”.

Orban əlavə edib:

“Müxalifətdə olsaq belə, Macar xalqına və vətənimizə xidmət etməyə davam edəcəyik”.

Peter Magyar kimdir?

Macarıstan siyasətində son dövrdə önə çıxan simalardan biri olan 45 yaşlı hüquqşünas və keçmiş diplomat Peter Magyar, Viktor Orbanın 16 illik hakimiyyəti dövründə Brüsseldə fəaliyyət göstərib və müxtəlif dövlət qurumlarının idarə heyətlərində təmsil olunub.

Magyar ölkədə 2024-cü ilin əvvəlində uşaq istismarı cinayətinə görə məhkum edilmiş şəxslə bağlı əfv məsələsinin gündəmə gəlməsi ilə geniş ictimaiyyət tərəfindən tanınıb. Bu hadisə nəticəsində həmin dövrün prezidenti istefa verib, Magyarın 2023-cü ildə ayrıldığı keçmiş həyat yoldaşı və o zamankı ədliyyə naziri Judit Varga da siyasətdən çəkilib.

Bu prosesdən sonra hakim Fidesz partiyası ilə münasibətləri dəyişən Magyar, çalışdığı dövrlərə dair müşahidələri, hökumətə yönələn tənqidləri və iddiaları ilə diqqət çəkib.

Magyar 2024-cü ildə Tisza partiyasına rəhbərlik etməyə başlayıb və Avropa Parlamenti seçkilərində 29,6% səs toplayaraq parlamentdə 7 mandat qazanıb.

2025-ci ildə ümumi seçki kampaniyası çərçivəsində ölkəni “yenidən birləşdirmək” hədəfini açıqlayan Magyar, korrupsiya ilə mübarizə, hüququn aliliyinin bərpası və Avropa İttifaqı ilə münasibətlərin yaxşılaşdırılması kimi əsas mövzulara fokuslanıb.

Rusiya-Ukrayna müharibəsi ilə bağlı ehtiyatlı mövqe sərgiləyən və Rusiyadan enerji asılılığının azaldılmasının vacibliyini vurğulayan Magyar, Macarıstanın Avropa İttifaqı və NATO ilə daha uyğun siyasət yürütməsinin tərəfdarıdır.