Asiya İnkişaf Bankı (ADB) Azərbaycanın ÜDM-nin 2026-cı ildə 2 %, 2027-ci ildə isə 1,8 % artacağını gözləyir.

Bu barədə ADB-nin "Asiyanın İnkişaf Perspektivləri" adlı aprel icmalında bildirilir.

Azərbaycan iqtisadiyyatının 2026-cı il üçün artım proqnozu sentyabr proqnozu ilə müqayisədə dəyişməz qalıb, 2027-ci il üzrə göstərici isə bank tərəfindən ilk dəfə təqdim edilib. Beləliklə, 2026-2027-ci illər ərzində ÜDM-in orta illik artım tempi 1,9 % səviyyəsində qiymətləndirilir.

"Əvvəlki illə müqayisədə artım tempinin yavaşlaması neft hasilatının azalması fonunda baş verəcək", - hesabatda qeyd olunub.

Bankın qiymətləndirmələrinə görə, aqrar sektor 2026-cı ildə 1,4 %, 2027-ci ildə isə 1 % artım nümayiş etdirəcək, sənaye istehsalı isə müvafiq olaraq 0,2 % və 0,1 % səviyyəsində artacaq.

"Dövlət büdcəsinin kəsirinin 2026-cı ildə ÜDM-in 2,2 %, 2027-ci ildə isə 2,1 % olacağı gözlənilir. 2026-cı ildə Azərbaycan Dövlət Neft Fondundan (ARDNF) transfertlər ÜDM-in 9,3 %-i təşkil edəcək. Bununla yanaşı, dövlət büdcəsinin xərcləri ÜDM-in 30,3 %-i təşkil edəcək ki, bunun da 10,2 %-i dövlət əsaslı vəsait qoyuluşlarının payına düşəcək", - ADB-də qeyd edilib.

Xatırladaq ki, İqtisadiyyat Nazirliyi ÜDM-in artımını 2026-cı ildə 2,9 %, 2027-ci ildə 3,3 %, Azərbaycan Mərkəzi Bankı isə ölkədə iqtisadi artımı cari ildə 2,4 %, növbəti il isə 2,9 % səviyyəsində proqnozlaşdırır.

Beynəlxalq reytinq agentliklərinin qiymətləndirmələri isə fərqlənir: "S&P Global" 2026-cı ildə 2 %, "Fitch Ratings" - 2,5 %, "Moody's" - 2,5 %. Beynəlxalq Valyuta Fondu (IMF) bu il üçün 2,1 % səviyyəsində iqtisadi artım gözləyir.

Niderlandın ən böyük bank qrupu olan "ING Group" Azərbaycanda iqtisadi artımın 2026-cı ildə 2,5 %, 2027-ci ildə isə 3 % təşkil edəcəyini proqnozlaşdırır, Avropa Yenidənqurma və İnkişaf Bankı 2026-cı ildə 2 %, 2027-ci ildə isə 2,5 % səviyyəsində proqnozlaşdırır.

Dünya Bankının proqnozlarına görə, Azərbaycanın ÜDM artım templəri 2026-cı ildə 2 %, 2027-ci ildə isə 1,8 % təşkil edəcək.

BMT-nin qiymətləndirmələrinə görə, Azərbaycanda iqtisadi artım 2026-cı ildə 2,7 %, 2027-ci ildə 2,6 % təşkil edəcək.

"Fitch Solutions"un gözləntilərinə əsasən, Azərbaycanın real ÜDM artımı 2026-cı ildə 2,5 % təşkil edəcək.

2025-ci ildə Azərbaycan iqtisadiyyatı 1,4 % artıb.

ADB Azərbaycanda 2026-cı il üçün inflyasiya proqnozunu yüksəldib

Asiya İnkişaf Bankı (ADB) Azərbaycanda orta illik inflyasiyanın 2026-ci ildə 5,7 %-dək yüksələcəyini, 2027-ci ildə isə 4,9 %-dək azalacağını proqnozlaşdırır.

2026-cı il üzrə proqnoz sentyabr qiymətləndirmələri ilə müqayisədə 2,2 faiz bəndi artırılıb. 2027-ci il üçün isə proqnoz açıqlanmamışdı.

"2026-cı ilin yanvarında yanacaq və 2025-ci ilin oktyabrında nəqliyyat xidmətləri qiymətlərinin artması müvəqqəti inflyasiya təzyiqləri formalaşdıracaq. Bu səbəbdən, inflyasiyanın 2026-ci ildə 5,7 %-dək yüksələcəyi və 2027-ci ildən etibarən neft qiymətlərinin azalması ilə 4,9 %-dək azalacağı proqnozlaşdırılır", - hesabatda qeyd olunub.

Dövlət Statistika Komitəsinin məlumatlarına əsasən, 2025-ci ildə Azərbaycanda orta illik inflyasiya 2024-cü ildəki 2,2 %-lə müqayisədə 5,6 % təşkil edib.

Azərbaycan İqtisadiyyat Nazirliyinin proqnozlarına görə, ölkədə orta illik inflyasiya 2026-cı ildə 4,8 %, 2027-ci ildə isə 4,5 % təşkil edəcək. Azərbaycan Mərkəzi Bankının son proqnozlarına (fevral 2026-cı il) əsasən, cari ildə illik inflyasiya 5,5 %, 2027-ci ildə isə 4 % olacaq.

BMT isə bu il Azərbaycanda inflyasiyanın 3,1 % olacağını proqnozlaşdırır. Dünya Bankı 2026-cı ildə Azərbaycanda orta illik inflyasiyanın 2,3 % səviyyəsində olacağını gözləyir.

"Moody's" beynəlxalq reytinq agentliyi cari ildə Azərbaycanda orta illik inflyasiyanı 3 %, "Fitch Ratings" 4,6 %, "Fitch Solutions" 2026-cı ildə 5,5 %, 2027-ci ildə isə 4,8 % səviyyəsində olacağını proqnozlaşdırır.

Niderlandın ən böyük bank qrupu olan "ING Group" Azərbaycanda illik inflyasiyanı 2026-cı ildə 5 %, 2027-ci ildə isə 5,5 % səviyyəsində olacağını gözləyir.

Azərbaycanın tədiyyə balansının cari əməliyyatlar hesabının profisitinin 2026-cı ildə ÜDM-in 5,3 %-i səviyyəsində olacağı proqnozlaşdırılır.

Asiya İnkişaf Bankının (ADB) "Asiyanın İnkişaf Perspektivləri" adlı aprel icmalına görə, gözləntilər bu il neft qiymətlərinin artması ilə əlaqədardır.

"2027-ci ildə ixrac gəlirlərinin azalması fonunda cari əməliyyatlar hesabı profisitinin ÜDM-in 3,5 %-dək azalması gözlənilir", - hesabatda qeyd olunub.

2025-ci ilin yekunlarına görə, bu göstərici 3,475 milyard ABŞ dolları səviyyəsində qeydə alınıb, bu da ÜDM-in 4,6 %-nə bərabərdir.

Niderlandın ən böyük bank qrupu olan "ING Group" Azərbaycanın tədiyyə balansının cari əməliyyatlar hesabının profisitini 2026-cı ildə ÜDM-in 6,5 %-i, 2027-ci ildə isə 1,7 %-i səviyyəsində qiymətləndirir.

"Moody's" beynəlxalq reytinq agentliyi cari hesabın profisitini 2026-cı ildə ÜDM-in 5 %-i, növbəti il isə ÜDM-in 5,2 %-i həcmində proqnozlaşdırır.

İş elanları AzVak.az-da

© "Report"