Azərbaycanın regionlarının iqtisadi inkişafına həsr edilmiş ən geniş miqyaslı platformalardan biri olan "Regional Biznesin İnkişafı və Rəqəmsallaşma Sammiti — QUBA 2026" 22 may 2026-cı il tarixində Quba Olimpiya İdman Kompleksində qapılarını açacaq.

"TECHERA" şirkəti və QİAD (Quba İş Adamlarına Dəstək) MMC-nin birgə təşkilatçılığı ilə həyata keçirilən bu platformaya dövlət qurumları, Bakının aparıcı şirkətləri, regional sahibkarlar, texnologiya şirkətləri, banklar və peşə inkişafına yönlənmiş gənclər — 100-dən çox müəssisə nümayəndəsi iştirak edəcək.

TƏDBİR ÜZRƏ ƏSAS MƏLUMAT

Sammit 22 May 2026-cı il, cümə günü Quba Olimpiya İdman Kompleksində "Prometech" şirkətinin Qızıl Sponsorluğu ilə keçiriləcək.

Tədbirin formatı açıq sərgi, B2B görüşlər, panel sessiyalar və karyera sərgisindən ibarətdir. Hədəf auditoriya sahibkarlar, texnologiya şirkətləri, banklar, gənclər və dövlət qurumlarıdır. Tədbirə 100-dən çox müəssisə, minlərlə tələbə, işaxtaran və sahibkarın iştirakı gözlənilir.

SAMMİTİN STRATEJİ ƏHƏMİYYƏTİ

Müasir Azərbaycanın iqtisadiyyatının inkişafı siyasəti çərçivəsində regionların iqtisadi potensialının açılması prioritet istiqamətə çevrilmişdir. Paytaxtdan kənar bölgələrdə sahibkarlığın rəqəmsallaşdırılması və gəncliyin məşğulluğu — bu hədəflər indi Quba sammitinin özəyini təşkil edir.

Sammit Azərbaycanın şimal-şərq regionunu — Quba, Qusar, Xaçmaz — vahid iqtisadi platform ətrafında birləşdirəcək. Bu bölgənin sahibkarları Bakıdan aparıcı şirkətlər, dövlət qurumları, banklar və texnologiya şirkəti nümayəndələri ilə eyni məkanda real danışıqlar aparacaq, tərəfdaşlıqlar quracaq.

SƏRGİ VƏ FƏALİYYƏT ZONALARI

Sammit sərgi formatında keçiriləcək — iştirakçılar aşağıdakı tematik zonalar üzrə fəaliyyət göstərəcək:

•     Banklar və Maliyyə Dəstəyi Bölməsi — sahibkarlıq kreditləri, mikro-KOB proqramları

•     Texnologiya və Rəqəmsal Transformasiya Zonası — IT həlləri, ERP/CRM sistemləri, e-ticarət, avtomatlaşdırma

•     Karyera Sərgisi — gənclər üçün iş, təcrübə və karyera məsləhəti imkanları

•     Regional Məhsul və Xidmət Sərgisi — yerli istehsalçıların məhsullarının bazara çıxışı

•     B2B Əlaqə Masası — sahibkarlar arasında birbaşa görüş və əməkdaşlıq platforması

•     Gənclər üçün Mentorluq Küncü — gənc sahibkarlar üçün ixtisaslaşmış mentorluq sessiyaları

Əlaqə:  010 437 55 65

info@techera.az