Martın sonlarından başlayan yağıntılar Azərbaycanın müxtəlif ərazilərində sel və daşqınlara səbəb olmaqla həm fərdi şəxslərə, həm də biznesə böyük maddi zərər vurmaqdadır.

Bir sıra yerlərdə sel suları insan amilindən asılı olmayaraq ətrafa zərər vurursa, bəzi ərazilərdə bu, daha çox insan amili, həm də əlaqədar qurumlarla bağlıdır.

Belə ərazilərdən biri də Xızı rayonu, Sitalçay kəndi ərazisidir.

Belə ki, köhnə Samur-Abşeron kanalı Sovet dövründə tikilərək fəaliyyət göstərib. Bu kanalla axan su başlanğıç nöqtəsindən başlayaraq Xızı rayon Sitalçay kəndinə qədər öz axarı ilə gəlir. Ancaq Sitalçay kəndindən sonra su öz axarı ilə bu ərazini keçə bilmədiyinə görə suyun ötürülməsi üçün Sitalçay kəndində böyük nasosxana qurulub. Bu kanalın bütün fəaliyyəti dövründə bu nasosxana fəaliyyət göstərib. Çünki nasosxana fəaliyyət göstərməsə bu kanalın işləməsi, kanalla hərəkət edən suyun ötürülməsi mümkün deyildi.

Yeni Taxtakörpü-Ceyranbatan su kanalı inşa edildikdən sonra köhnə su kanalının fəaliyyəti dayandırılılb. Uzun illərdir ki, köhnə kanal və nasosxana baxımsız vəziyyətdə qaldığından işləmir. Köhnə kanal istismar edildiyi dövrdə kanalın təmiri və yaxud dayandırılması zərurəti yarandıqda su kanalın üzərində olan qapaqlar vasitəsilə dənizə axıdılırdı ki, daşaraq əraziyə zərər verməsin. Ancaq kanalın fəaliyyəti dayandırıldıqdan sonra baxımsızlıq ucbatından kanalda olan qapaqların üstü torpaqla örtülüb, onlar işləmir.

Bundan əlavə, Bakı-Quba yolu yenidən inşa edilərkən Sovet dövründə yolun altından sel sularını ötürmək üçün tikilmiş tunel bağlanıb, yenisi isə qoyulmayıb. Bu da sel sularının yolun bir tərəfində toplanmasına gətirib çıxarır.

Buna görə də son 2 ildə yazbaşı fasiləsiz yağan yağışlar nəticəsində kanal Sitalçay kəndinə qədər yerləşdiyi əraziyə və Sitalçay kəndinin ərazisinə çox böyük zərər verir. Kanalın başlanğıcından Sitalçay kəndinin ərazisinə qədər olan böyük bir ərazinin sel suları bu kanala toplanaraq Sitalçay kəndinə qədər axıb gəlir. Sitalçay kəndindən su öz axarı ilə keçə bilmədiyinə görə böyük miqdarda su daşaraq sel şəklində bütün ərazini yuyub aparır. Özəlliklə son 2 ildə vəziyyət daha da acınacaqlı hal alıb. Sel suları fərdi şəxslərlə yanaşı, ərazidə yerləşən bir neçə quşçuluq təsərrüfatlarının da işini iflic edib: quşlar saxlanan damlar su ilə dolub, elektrik, su, qaz təminatı sistemi sıradan çıxıb.

Nə ötən il, nə də indi ərazidə yerləşən bizneslə əlaqədar qurumlardan dəstək verilir. Hazırda Sitalçay kəndi ərazisində vəziyyət acınacaqlı həddə çatıb.

Əldə etdiyimiz məlumata görə, ərazidə yerləşən quşçuluq təsərrüfatları fəaliyyətlərini dayandırmaq üzrədilər. Bu isə Azərbaycanın daxili bazarında toyuq əti və yumurtanın qiymətində artımlara səbəb ola bilər.

Bundan əlavə, Bakı-Quba yolunu sel basdığına görə onunla hərəkət dayandırılıb. Biznesin məsələ ilə bağlı əlaqədar qurumlara müraciətlərinə hələ də reaksiya verilməyib.

İş elanları AzVak.az-da

© Musavat.com