Meta Platforms şirkət üzrə aparılan yenidənqurma çərçivəsində yüzlərlə əməkdaşı ilə yollarını ayırır.

Marja xəbər verir ki, Bloomberg-ə danışan mənbənin məlumatına görə, ixtisarlar yalnız ABŞ ilə məhdudlaşmayacaq, şirkətin fəaliyyət göstərdiyi digər beynəlxalq bazarlarda da tətbiq olunacaq. Təsirə məruz qalan əməkdaşların bir hissəsinə şirkət daxilində fərqli vəzifələr təklif edilə biləcəyi və ya işlərini davam etdirə bilmələri üçün başqa ölkələrə keçmək imkanı veriləcəyi bildirilir.

Bundan əlavə, Reality Labs bölməsində çalışan bəzi əməkdaşlara ixtisarlara hazırlıq məqsədilə uzaqdan işləmə tapşırığı verildiyi qeyd olunub.

Təxminən min nəfər ixtisar ediləcək

Meta sözçüsü açıqlamasında bildirib: “Meta daxilində komandalar hədəflərinə ən yaxşı şəkildə çatmaq üçün mütəmadi olaraq yenidən strukturlaşdırılır və ya dəyişikliklər edilir. Mümkün olan hallarda, vəzifəsini itirən əməkdaşlar üçün şirkət daxilində fərqli imkanlar yaratmağa çalışırıq.”

İxtisarların ümumilikdə min nəfərdən az əməkdaşı əhatə etdiyi bildirilir. Meta-nın ilin əvvəlində dünya üzrə təxminən 79 min əməkdaşı mövcud idi.

Süni intellektə böyük investisiya davam edir

Şirkət xüsusilə süni intellekt sahəsində texnologiya sektorunun ən aqressiv investorlarından biri hesab olunur. Meta bu il kapital xərclərinin rekord səviyyəyə çatacağını proqnozlaşdırır və xərclərin 135 milyard dollara qədər yüksələ biləcəyini açıqlayıb.

Şirkətin Baş icraçı direltoru Mark Zuckerberg 2028-ci ilə qədər ABŞ-dakı infrastruktur layihələrinə ümumilikdə 600 milyard dollar sərmayə yatırmağı planlaşdırdıqlarını bildirib. Zuckerberg həmçinin süni intellektin şirkət daxilində iş proseslərini köklü şəkildə dəyişdirdiyini vurğulayaraq, mühəndislərin artıq kodlaşdırma və müxtəlif layihələrdə süni intellekt agentlərindən istifadə etdiyini qeyd edib.

Yanvar ayında da ixtisarlar olmuşdu

Meta bu ilin əvvəlində də əməkdaş sayını azaltmışdır. Artırılmış reallıq eynəkləri və virtual reallıq başlıqları hazırlayan Reality Labs bölməsi yanvar ayında da min nəfərdən çox əməkdaşını ixtisar etmişdi. Bu addımın metaverse layihələrindən tədricən uzaqlaşma və süni intellekt əsaslı geyilə bilən texnologiyalara yönəlmə strategiyası çərçivəsində atıldığı bildirilir.