İran müharibəsinin neft qiymətləri üzərində yaratdığı təzyiq, ticarət edilən kənd təsərrüfatı məhsullarına, o cümlədən şəkərə də təsir edir.

Marja xəbər verir ki, neftin barelinin qiyməti 100 dolların üzərində qaldıqca, etanol istehsalı daha cəlbedici hala gəlib. Bu da xam şəkər qiymətlərini bir ayın ən yüksək səviyyəsinə qaldırıb.

Neft və şəkər qiymətləri arasında etanol istehsalına bağlı olaraq bir korelyasiya mövcuddur və son dövrlərdə şəkər bazarındakı qiymətləri yuxarı çəkən iki əsas amil önə çıxır:

1. 2026-2027 mövsümünə dair təklif gözləntiləri

Bazarda, gələcək mövsümdə təklifin daha aşağı olacağı gözləntiləri güclənməkdədir. Bu proqnoz, şəkər qiymətlərinin artmasını dəstəkləyən əsas amillərdən biri hesab olunur.

2. Yüksələn enerji qiymətləri

Enerji qiymətlərinin artması şəkər bazarına əlavə təzyiq yaradır. Çünki enerji xərclərinin yüksəlməsi, başda nəqliyyat olmaqla, istehsal və logistika zəncirində də xərcləri artırır.

Daha ciddi təsir isə dünyanın ən böyük şəkər qamışı istehsalçısı olan Braziliyada görünür. Bloomberg xəbərinə görə, yüksək enerji qiymətləri, Braziliya fabriklərini 2026-2027 mövsümünün başlanğıcında şəkər qamışının daha böyük hissəsini şəkər əvəzinə etanol istehsalına yönəltməyə sövq edə bilər. Bu da qlobal şəkər təklifini azaldaraq qiymətlərin dəstək tapmasına səbəb ola bilər.

Lakin Braziliyada etanol bazarının gələcəyi, böyük ölçüdə ölkənin enerji nəhəngi "Petrobras"ın benzin qiymətlərinə bağlı olacaq. Şirkətin benzin qiymətləri 5 mart tarixinə qədər beynəlxalq qiymətlərdən 24% aşağı olub. Qlobal qiymətlərin kəskin yüksəlməsinə baxmayaraq, "Petrobras" keçən həftə açıqlayıb ki, idxal və ixrac əməliyyatlarında hər hansı fasilə riski yoxdur.

Nyu York birjasında xam şəkər qiyməti 2,9% artaraq 1 poundu (453.59237 qram) 14,51 sent olub.

London bazarında isə ağ şəkərin qiyməti 1,1% yüksəlib.

Bu vəziyyət göstərir ki, şəkər bazarında qiymətlərin hərəkəti yalnız mövcud tələbat və təkliflə deyil, həm də enerji və yanacaq siyasətləri ilə müəyyən olunur.

Xüsusilə Braziliyanın şəkər-etanol balansı, gələcəkdə qlobal şəkər qiymətlərinin istiqaməti baxımından həlledici əhəmiyyət daşıyacaq.

İş elanları AzVak.az-da