ABŞ Prezidenti Donald Tramp bütün ölkələrə 10 faizlik qlobal gömrük rüsumunun tətbiqinə dair qərarı imzaladığını açıqlayıb.

Marja xəbər verir ki, Tramp məsələ ilə bağlı "Truth Social" hesabında paylaşım edib.

Paylaşımında “Bütün ölkələrə qlobal 10 faizlik gömrük rüsumunu az öncə imzalamış olmaqdan böyük qürur duyuram” ifadəsini işlədən Tramp, bu tariflərin tezliklə qüvvəyə minəcəyini bildirib.

Bəzi məhsullar bu tarifdən azad olacaq

Ağ Evdən verilən açıqlamada da Trampın idxal vergisinin tətbiqinə dair qərarı imzaladığı bildirilib.

Trampın 1974-cü il Ticarət Qanununun 122-ci maddəsi üzrə səlahiyyətindən istifadə etdiyinə diqqət çəkilən açıqlamada, bu maddənin Prezidentə beynəlxalq ödəniş problemlərini əlavə rüsumlar və digər xüsusi idxal məhdudiyyətləri vasitəsilə həll etmək səlahiyyəti verdiyi vurğulanıb.

Açıqlamada, bu çərçivədə ABŞ-yə idxal edilən məhsullara 150 gün müddətinə 10 faiz həcmində idxal vergisinin tətbiq olunduğu, qərarın 24 fevral tarixindən etibarən qüvvəyə minəcəyi qeyd edilib.

Bəzi məhsulların müvəqqəti idxal vergisinə tabe olmayacağı bildirilib. Kritik minerallar, enerji məhsulları, bəzi kənd təsərrüfatı məhsulları, dərmanlar, müəyyən elektronika və avtomobil məhsulları, aviasiya məhsulları və informasiya materialları kimi bəzi kateqoriyaların vergidən azad edildiyi açıqlanıb.

Ali Məhkəmə qərarını vermişdi

ABŞ Ali Məhkəməsi bir gün öncə Tramp tərəfindən tətbiq olunan tariflərin əsaslandığı Beynəlxalq Fövqəladə İqtisadi Səlahiyyətlər Qanununun (IEEPA) prezidentə tarif tətbiq etmək səlahiyyəti vermədiyinə hökm çıxarmışdı.

Tramp qərarla bağlı keçirdiyi mətbuat konfransında, “İllərdir bizi talayan xarici ölkələr çox xoşbəxtdir, küçələrdə rəqs edirlər. Amma uzun müddət rəqs edə bilməyəcəklərindən əmin ola bilərsiniz”, – demişdi.

Prezident kimi istifadə edə biləcəyi IEEPA tariflərindən də daha güclü üsulların olduğunu bildirən Tramp, 1974-cü il Ticarət Qanununun 122-ci bölməsi çərçivəsində hazırda tətbiq edilən tariflərə əlavə olaraq 10 faizlik qlobal tarif tətbiqinə dair qərar imzalayacağını açıqlamışdı.

Tramp ABŞ-ni digər ölkələrin və şirkətlərin ədalətsiz ticarət hərəkətlərindən qorumaq üçün 301-ci bölmə və digər maddələr çərçivəsində də müxtəlif araşdırmalar başladacaqlarını bildirib.

İş elanları AzVak.az-da