2025-ci ildə reklam və abunə gəlirləri üzrə 60 milyard dollar həddini aşan YouTube qlobal liderliyini möhkəmləndirib.

Marja.az-ın məlumatına görə, platformanın aylıq aktiv istifadəçi sayı 2,7 milyarda çatıb. İlin ən çox gəlir əldə edən kontent istehsalçısı isə 85 milyon dollar qazanc ilə “MrBeast” kimi tanınan Cimmi Donaldson (Jimmy Donaldson) olub.

21 ildə qlobal platformaya çevrilib

YouTube 14 fevral 2005-ci ildə keçmiş PayPal əməkdaşları — Chad Hurley, Steve Chen və Jawed Karim (Chad Hurley, Steve Chen və Jawed Karim) tərəfindən yaradılıb.

Platformaya yüklənən ilk video 23 aprel 2005-ci ildə Jawed Karim tərəfindən paylaşılan 19 saniyəlik “Me at the zoo” adlı görüntü olub. Bu video internet mədəniyyətinin ilkin simvollarından biri hesab edilir.

Bu gün platformada 20 milyarddan çox məzmunun yerləşdirildiyi bildirilir. YouTube illər ərzində təkcə video izləmə vərdişlərini deyil, həm də reklamçılıq, media, təhsil və əyləncə sektorlarını dəyişdirib.

Google-un satınalması böyüməni sürətləndirib

2006-cı ilin noyabrında Google YouTube-u 1,65 milyard dollara satın alıb. Bu addım platformanın qlobal miqyasda inkişafında dönüş nöqtəsi kimi qiymətləndirilir.

Artan istifadəçi axını texniki infrastruktur və müəllif hüquqları ilə bağlı çətinliklər yaratsa da, sonradan məzmun nəzarəti və hüquqi mexanizmlər gücləndirilib.

2010-cu illərdə tətbiq edilən reklam gəlirlərinin bölüşdürülməsi modeli kontent istehsalını gəlir gətirən peşəyə çevirib. 17 may 2018-ci ildə istifadəyə verilən YouTube Premium xidməti reklamsız baxış və musiqi imkanları təqdim edib.

Son dövrdə isə generativ süni intellekt alətləri, mətn komandası ilə video yaradılması və real vaxt dil tərcüməsi kimi funksiyalar platformaya inteqrasiya olunub.

Hüquqi proseslər və məxfilik məsələləri

2007-ci ildə media şirkəti Viacom tərəfindən açılan 1 milyard dollarlıq müəllif hüquqları iddiası məzmunun nəzarət sistemlərinin təkmilləşdirilməsinə səbəb olub.

Bundan əlavə, ABŞ-də uşaqların məlumat məxfiliyi ilə bağlı aparılan araşdırmalar nəticəsində alqoritm və nəzarət mexanizmlərində dəyişikliklər edilib.

2,7 milyard aktiv istifadəçi

2026-cı ilin yanvar məlumatlarına əsasən, platformanın aylıq aktiv istifadəçi sayı 2,7 milyarddır. Hindistan təxminən 500 milyon istifadəçi ilə birinci yerdədir. 

Hər gün 122 milyondan çox insan platformanı ziyarət edir və istifadəçilər gündə ümumilikdə 1 milyard saatdan artıq video izləyirlər. Orta gündəlik istifadə müddəti isə 49 dəqiqədir.

YouTube hazırda YouTube Kids, YouTube Music, YouTube Premium, YouTube Shorts və YouTube TV kimi müxtəlif xidmətlərlə fəaliyyətini davam etdirir.

2025-ci ilin nəticələri göstərir ki, platforma həm gəlir, həm də istifadəçi sayı baxımından qlobal lider mövqeyini qoruyur.