Dünya İqtisadi Forumu (WEF) tərəfindən yayımlanan yeni hesabat yaşıl iqtisadiyyatın qlobal artımın ən güclü mühərriklərindən birinə çevrildiyini ortaya qoyub. Hazırda dəyəri 5 trilyon dolları aşan sektorun 2030-cu ilə qədər illik həcminin 7 trilyon dolları keçəcəyi gözlənilir.

Marja xəbər verir ki, Dünya İqtisadi Forumunun Boston Consulting Group (BCG) ilə əməkdaşlıq çərçivəsində hazırladığı hesabat dayanıqlı texnologiyaların və yaşıl bazarların iqtisadi gələcəyini aydın şəkildə nümayiş etdirib. Hesabata görə, yaşıl iqtisadiyyat son on ildə texnologiya sektorundan sonra ən sürətlə böyüyən ikinci sektor olub.

Araşdırmanın ən diqqətçəkən nəticələrindən biri yaşıl gəlirlərin ənənəvi fəaliyyət sahələri ilə müqayisədə orta hesabla iki dəfə daha sürətlə artmasıdır. Yaşıl bazarlarda fəaliyyət göstərən şirkətlər yalnız ekoloji deyil, maliyyə baxımından da rəqiblərini qabaqlayır. Gəlirlərinin 50 faizindən çoxunu yaşıl bazarlardan əldə edən şirkətlər kapital bazarlarında 12–15 faiz arasında dəyişən qiymətləndirmə mükafatlarından yararlanır və eyni zamanda daha aşağı maliyyətli kapitala çıxış imkanı qazanırlar.

Xərclərdə kəskin azalma transformasiyanı sürətləndirir

Texnoloji inkişafların xərcləri aşağı salması yaşıl transformasiyanı iqtisadi baxımdan daha cəlbedici edir. Hesabatda yer alan məlumatlara görə, 2010-cu ildən bəri günəş enerjisinin (fotovoltaik) və litium batareyalarının dəyəri 90 faiz, dənizdə qurulan külək enerjisinin dəyəri isə 50 faiz azalıb.

Bu xərclərin azalması sayəsində qlobal emissiyaların azaldılması üçün zəruri olan həllərin 55 faizi artıq ənənəvi üsullarla rəqabət apara biləcək səviyyəyə çatıb.

İş elanları AzVak.az-da

Çin yaşıl transformasiyanın liderliyini öz üzərinə götürür

Qlobal təmiz enerji investisiyalarında Çinin dominant rolu diqqət çəkir. 2024-cü ildə təmiz enerjiyə 659 milyard dollar sərmayə yatıran Çin, 2030-cu ilə qədər dünyada yeni bərpa olunan enerji gücünün artımının 60 faizindən çoxunu təkbaşına reallaşdıracaq. Günəş panelləri, elektrik avtomobilləri və batareya texnologiyaları sahəsində patent lideri olan ölkə yaşıl innovasiyanın mərkəzini Şərqə doğru yönəldir.

WEF-in İqlim və Təbiət İqtisadiyyatı üzrə rəhbəri Pim Valdre hesabatla bağlı açıqlamasında bildirib:

“İki il əvvəl yaşıl bazarlara sərmayə qoymağın riskli bir mərc olduğunu deyənlər var idi. Lakin bu hesabat sübut edir ki, yaşıl iqtisadiyyat uzaq gələcəyin imkanı deyil, məhz bu onilliyin əsas artım mühərrikidir.”

BCG-nin İdarəedici Tərəfdaşı Patrik Herhold isə ictimai qeyri-müəyyənliyə baxmayaraq yaşıl texnologiya investisiyalarının rekordlar qırmaqda davam etdiyini vurğulayaraq qeyd edib:

“Bu gün cəsarətli addımlar atan şirkətlər üçün 7 trilyon dollarlıq bu nəhəng bazarda böyük imkanlar mövcuddur.”

CEO-lar üçün yol xəritəsi

Hesabat təkcə məlumat təqdim etməklə kifayətlənmir, eyni zamanda CEO Climate Leaders alyansının üzvü olan 14 qabaqcıl şirkətin nümunə təhlillərini əhatə edən “CEO Təlimatı” da təqdim edir. Bu bələdçi liderlərə texnologiyanı necə miqyaslandırmaq, tənzimləyici ekosistemləri necə formalaşdırmaq və şaxələndirilmiş maliyyə mənbələrinə necə çıxış əldə etmək barədə strateji tövsiyələr verir.

Yaşıl iqtisadiyyatın gələcəyi 19–23 yanvar 2026-cı il tarixlərində Davosda keçiriləcək Dünya İqtisadi Forumu İllik Toplantısının da əsas gündəm mövzularından biri olacaq.