Beynəlxalq Valyuta Fondu (BVF) Çin iqtisadiyyatına dair böyümə (iqtisadi artım) proqnozlarını 2025-ci il üçün 4,8 faizdən 5 faizə, 2026-cı il üçün isə 4,2 faizdən 4,5 faizə qaldırıb.

Marja.az-ın məlumatına görə, BVF-nin açıqlamasında qeyd edilib ki, təşkilatın 4-cü Maddə (Məsləhətləşmə) çərçivəsində BVF heyətinin Çinə səfərindən sonra əldə olunan ilkin müşahidələr paylaşılır.

BVF qeyd edib ki, Çin iqtisadiyyatının 2025-ci ildə 5 faiz, 2026-cı ildə isə 4,5 faiz artacağı proqnozlaşdırılır. Əvvəlki proqnozlar müvafiq olaraq 2025 üçün 4,8 faiz, 2026 üçün 4,2 faiz idi.

Qeyd olunub ki, bu proqnozlar oktyabrda dərc edilən Dünya İqtisadi Proqnozlar hesabatındakı proqnozlar ilə müqayisədə müvafiq olaraq 0,2 və 0,3 bəndlik yuxarı korrektələri əks etdirir. Açıqlamada bu artımın məmnuniyyətlə qarşılanan makroiqtisadi siyasət stimullarına və Çin ixracına tətbiq olunan gözləniləndən aşağı tariflərə bağlı olduğu vurğulanıb.

Bildirilib ki, davamlı artıma baxmayaraq, zəif daxili tələbat və deflyasiya təzyiqləri davam edir, buna görə də iqtisadiyyatda qeyri-tarazlıqlar hələ də əhəmiyyətli olaraq qalır. Həmçinin, ticarət tərəfdaşlarına nisbətən daha aşağı inflyasiyanın real valyuta məzənnəsində dəyər itirilməsinə səbəb olduğu, bunun da güclü ixrac və artan cari profisitə təsir etdiyi qeyd olunub.

Əsas siyasət prioritetinin hökumətin 15-ci Beşillik Planında müəyyən etdiyi hədəflərdən biri olan istehlaka əsaslanan iqtisadi artım modelinə keçid olduğu qeyd  edilib. Bu transformasiyanın daha güclü və təcili ekspansiv makroiqtisadi siyasətlər, yüksək ailə təsərrüfatı yığımlarını azaltmağa yönəlmiş tənzimləmələr, səmərəsiz investisiyalar və lüzumsuz sənaye siyasəti dəstəklərinin azaldılmasını tələb etdiyi vurğulanıb.

Qeyd olunub ki, bu siyasət paketi eyni zamanda xarici qeyri-tarazlıqları da azaldacaq. Açıqlamada artan risklərlə mübarizə və güclü orta +müddətli artımın qorunması üçün əlavə addımların atılmasının vacibliyi vurğulanaraq, maliyyə və fiskal çərçivələrdə islahatların aparılması, dövlət, daşınmaz əmlak və maliyyə sektorlarında balansların sağlamlaşdırılması, xidmət sektorunun daha çox açılması və şirkətlər arasında rəqabətçi neytrallığın təşviqi daxil olmaqla bazar yönümlü islahatlara ehtiyac olduğu qeyd edilib.