Dünyanın ən böyük maliyyə və investisiya banklarından biri olan UBS 2026-cı ilin ortası üçün qızılın qiyməti üzrə proqnozunu 1 unsiya üçün 4200 dollardan 4500 dollara yüksəldib. Banka həmçinin optimist ssenarisini 4700 dollardan 4900 dollara yeniləyib, lakin aşağı yönlü gözləntisini 3700 dollar səviyyəsində saxlayıb.

Marja xəbər verir ki, UBS, qızıla olan tələbin gələn il daha da artacağını proqnozlaşdırır. Bankanın bu gözləntisini dəstəkləyən əsas faktorlar belə sıralanır:

- Fed-in mümkün faiz endirimləri,

- Aşağı real faiz gəlirləri,

- Qlobal səviyyədə davam edən geosiyasi risklər,

- ABŞ daxili siyasətindəki qeyri-müəyyənliklər.

UBS-ə görə, bu amillər investorların “təhlükəsiz liman” tələbinin davam etməsini təmin edərək qızıl qiymətlərinə yuxarı istiqamətdə dəstək verəcək (daha da bahalaşacaq).

2025-ci ildə unsiya qızıl qiymətləri rekorddan-rekorda keçərkən, bu ilki artım 54%-i aşıb. Qızılın unsiyasının qiyməti 20 oktyabrda 4381 dollar çataraq indiyədək ən yüksək səviyyəsini görmüşdür.

Hazırda beynəlxalq bazarlarda qızıl 4070 dollara yaxın səviyyələrdə ticarət olunur (20 Noyabr, saat 13:00-a olan məlumat). 

UBS — qlobal səviyyədə tanınmış İsveçrə bankıdır və investisiya məsləhətləri, aktiv idarəçiliyi və maliyyə araşdırmaları ilə məşhurdur. Məsələn, qızıl proqnozları kimi iqtisadi analizləri tez-tez yayımlayır.

Goldman Sachs: Qızılın qiyməti 2026-cı ilin sonuna qədər 4900 dollara çatacaq

Son həftələrdə qızıl qiymətlərində yaşanan azalma investorların diqqətini bazarın istiqamətinə yönəldib. Digər nəhəng banka - Goldman Sachs-ın analitikləri, qızılın unsiyasının qiymətinin 2026-cı ilin sonuna qədər 4900 dollar səviyyəsinə çata biləcəyini proqnozlaşdırır və mövcud qiymətlərlə müqayisədə təxminən 21% artım gözləyirlər.

Son bir ay ərzində qızılın qiymət təxminən 6% düşüb. ABŞ dollarının güclənməsi və dekabr ayında faiz endirimi ehtimalının azalması qızıl üzərində təzyiqi artıran əsas amillər arasında olub. Buna baxmayaraq, Goldman Sachs qızılın qiymətindəki bu geri çəkilmənin davamlı ucuzlaşma trendinin başlanğıcı olmadığını vurğulayır. Bank bildirir ki, qızıl ilin əvvəlindən bəri kəskin bahalaşaraq güclü performans nümayiş etdirib və bu, investorların “təhlükəsiz liman” axtarışı ilə dəstəklənib. Analitiklərə görə, mövcud qiymət düşməsi uzunmüddətli yüksəliş perspektivini pozmayan müvəqqəti bir hərəkətdir.

2026-cı ildə 1 unsiya qızılın qiymətinin 5000 dollar səviyyəsinə yaxınlaşması gözlənilir. Ekspertlər qısa müddətdə ABŞ dollarının güclü qalması və faiz gözləntilərindəki dəyişiklik səbəbindən dalğalanmaların davam edə biləcəyini, lakin orta müddətdə qızılın “təhlükəsiz liman” statusu sayəsində sabit qalacağını vurğulayırlar.