Türkiyə Statistika Qurumunun (TÜİK) məlumatına görə, ölkə turizmində üçüncü rübdə 24,2 milyard dollarlıq rüblük rekord gəlir qeydə alınıb.

Marja xəbər verir ki, ölkənin Mədəniyyət və Turizm naziri Mehmet Nuri Ersoy bildirib:

“İlkin doqquz aylıq nəticələr ötən il 47,3 milyard dollar idi. Bu il 50 milyard dollarlıq rəqəmə çatdıq. Doqquz aylıq dövr üzrə 50 milyard dollarla, Türkiyə turizmdə rekord gəlir əldə etmişdir. İl sonu üçün 64 milyard dollarlıq hədəfimizə çatacağıq,” – deyə o qeyd edib.

TÜİK-in məlumatına əsasən, iyul, avqust və sentyabr aylarını əhatə edən üçüncü rübdə turizm gəliri ötən ilin eyni dövrü ilə müqayisədə 3,9% artaraq 24 milyard 257 milyon 815 min dollar təşkil edib. Turistlərdən əldə edilən gəlir 24 milyard 46 milyon 779 min dollar, transfer səfərləri vasitəsilə əldə edilən gəlir isə 211 milyon 37 min dollar olub.

“50 milyon turistə çatdıq”

Nazir Mehmet Nuri Ersoy turizm göstəricilərini təqdim etdiyi tədbirdə deyib:

“2024-cü ildə İtaliyanı geridə qoyaraq turizm liqasında dördüncü yerə yüksəldik. İndi isə 2025-ci ilin ilk doqquz ayının göstəricilərini və qiymətləndirmələrimizi paylaşmaq istəyirəm. Əgər turist saylından başlasaq, 2017-ci ili 30 milyon 518 min ziyarətçi ilə bağlamışdıq. Ötən il bu rəqəm 49 milyon 181 minə yüksəldi. Bu ilin ilk doqquz ayının son məlumatına görə isə 49 milyon 993 min turistə çatdıq. Yəni ötən illə müqayisədə 1,6%-lik artım əldə etmişik.”

“İl sonu hədəfi reallaşacaq”

Nazir əlavə edib:

“2017-ci ildə adambaşına gecəlik xərcləmə 83 dollar idi. 2024-cü ildə bu rəqəmi 107 dollara qaldırmışdıq. 2025-ci ilin ilk doqquz ayında isə 116 dollara yüksəldiyini görürük. Bu da 9%-lik artım deməkdir. Keçən il ilk doqquz ayında 47,3 milyard dollar gəlir əldə etmişdik, bu il isə 50 milyard dollara çatdıq. Bu da 5,7%-lik artıma bərabərdir. İlk doqquz aylıq dövr ərzində Türkiyə 50 milyard dollarlıq gəlirlə turizmdə rekord əldə edib.

Ooktyabr ayı üzrə ilkin göstəricilər də olduqca müsbətdir. Dəqiq məlumatlar noyabrın sonunda açıqlanacaq. İlkin nəticələrə əsasən, oktyabr göstəriciləri də yaxşı olub və müsbət tendensiyalar özünü göstərməyə başlayıb. İl sonu üçün 64 milyard dollarlıq hədəfimizə çatacağımıza inanırıq.”